ଶ୍ରାବଣ

ଚନ୍ଦ୍ରକଳା ଦେବୀ,ବନ୍ଧୁଗାଁ,କୋରାପୁଟ

ଶ୍ରାବଣ ଆସନ୍ତେ ଧରଣୀ ବକ୍ଷରେ

ହସ ଖୁସି ଯାଏ ଭରି,

ଶୁଷ୍କ ନଦ ନଦୀ ଗାଡ଼ିଆ ପୋଖରୀ

ପାଣିରେ ଯାଏତ ପୂରି ||

ଲାଲ ଟୁକୁ ଟୁକୁ ସାଧବ ବୋହୂଟି

ମଥାରେ ଓଢଣୀ ଦେଇ,

ସବୁଜ ରଙ୍ଗର ଦୁବ ଘାସ ପରେ

ଚାଲେ ଥିରି ଥିରି ହୋଇ ||

ଝର ଝର ବର୍ଷା ଆକାଶ ମାର୍ଗରୁ

ପ୍ରୀତିର ଅମୃତ ଧାରା,

ସୁଲୁ ସୁଲୁ ବାଆ ବହି ଆସି ଥାଏ

ପୁଲକିତ ବସୁନ୍ଧରା ||

କଳାମେଘ ଦେଖି ପୁଚ୍ଛମେଲି ନାଚେ

ଆତ୍ମହରା ହୋଇ କେକୀ,

ସପ୍ତ ରଙ୍ଗଧାରୀ ଇନ୍ଦ୍ରଧନୁ ଶୋଭା

ଉଲ୍ଲସିତ ସର୍ବେ ଦେଖି ||

ଶ୍ରାବଣ ମାସରେ ଚିତାଲାଗି ପର୍ବ

ରକ୍ଷା ବନ୍ଧନ ଝୁଲଣ,

ଶ୍ରାବଣ ମାସଟି ମହାଦେବଙ୍କର

ପ୍ରିୟମାସ ଭାଇ ଜାଣ ||

ଶ୍ରାବଣ ମାସରେ ଶଇବ ପୀଠରେ

କାଉଡିଆଙ୍କର ଭିଡ଼,

କାନ୍ଧେ ଜଳଭାର ଶିବଙ୍କ ଚିନ୍ତନେ

ଚାଲିଥାନ୍ତି ବର୍ଷା ଝଡ଼ ||

ଶ୍ରାବଣ ଆସିଲେ ଚାଷୀ ମନ ଖୁସି

ଦିନ ସାରା ତା’ର କାମ,

ଲହୁଲୁହ ଢାଳି ଫଳାଏ ଫସଲ

ଦେଶ ମେରୁଦଣ୍ଡ ଜାଣ ||

ଶ୍ରାବଣ ମାସରେ ପିଲା ମନ ଖୁସି

ପାଣିରେ ଭସାଏ ଡ଼ଙ୍ଗା,

ଅଗଷ୍ଟ ପନ୍ଦର ପାଳନ କରନ୍ତି

ଉଡାନ୍ତି ଜାତୀୟ ଧ୍ବଜା ||

ବର୍ଷାରାଣୀ ପରା ଶ୍ରାବଣୀର ମିତ

ହସୁଥାଏ ମନ ଖୋଲି,

ଜଗତ ମଙ୍ଗଳେ ଶ୍ରାବଣ ଆଗତ

ଖେଳୁଥାଏ ଲୁଚକାଳି ||

ଧନ୍ୟ ତୁ ଶ୍ରାବଣ ଧନ୍ୟତୋ ମହିମା

ସଦା ପର ଉପକାରେ,

ଅନ୍ତର ବେଦନା ମନ ମଧ୍ୟେ ଚାପି

ବୁହାଏ ଲୋତକ ଧାରେ ||

ସେ ଲୋତକ ଧାର ମଙ୍ଗଳ ଧାରାର

ସୁଖ ଐଶ୍ଚର୍ଯ୍ୟରେ ଭରା,

ଶସ୍ୟ ଶ୍ୟାମଳାରେ ପରିପୂର୍ଣ୍ଣ ହୋଇ

ହସୁଥାଏ ବସୁନ୍ଧରା ||