ହସୁଛି ଲୋ କଳାଚାନ୍ଦ
ଦେଖ ଲୋ ମିତଣୀ ଦେଖ
ନନ୍ଦବଳା କେଡେ ଛଳ କରିଦେଲା
ଚୌଦିଗେ ଉତ୍ସବ ମୁଖ
ଦେଖ ଲୋ ମିତଣୀ ଦେଖ…….।
କଳା କଳେବର କାଳିଆ ନୁପୁର
ଲାଜ ଢାଙ୍କିଦେଲା ସତେ
ବନ୍ଦୀଶାଳୁ ରାଜ ଉଆସକୁ ଗଲା
କପଟ ଜଣା ଯା’ କେତେ…….।
ଘୋର ଗର୍ଜନରେ ଯମୁନା ଲଙ୍ଘିଲା
ଉଛୁଳା ପାଣିକୁ ଚିରି
ବାପା ମୁଣ୍ଡରେ ସେ ଟୋକେଇ ଭିତରେ
ହସୁଛି ଲୋ କିରିକିରି……।
ନଟକୁଟିଆ ସେ ଲୀଳା କରିବାକୁ
ଯାଉଛି ଲୋ ନନ୍ଦଘର
ଦେବକୀ କୁମର ଆନନ୍ଦେ ବିଭୋର
ଦୁଇ କୁଳ ଅଧୀଶ୍ବର……..।
ଯଶୋମତୀ ରାଣୀ ହୁଏ ଲୋ ବାୟାଣୀ
ଦେଖି କୁନି ପାଦ ଛିଟା
କୃଷ୍ଣମେଘ ବାଙ୍କ ଚୂଳିଆର ହସ
ଅଧର ନାଲି ଚହଟା…….।
ରଜା ଘରେ ପୁଅ ଜନମ ହୋଇଛି
କାଳିଆ କୁନି ବାମନ
ସଖା ସଖୀ ଠାରୁ ଗୋପବାଳା ଯାଏଁ
କିଣିଛି ସଭିଁଙ୍କ ମନ……।
ଉଠୁଛି ପଡୁଛି ଗଉଡ ଘର ଲୋ
ମୁରୁକା ହସର ଛନ୍ଦେ
କେତେ ନାଚ ଗୀତ ଭୁରି ଭୋଜନରେ
ନନ୍ଦ ଘର କି ଆନନ୍ଦେ……..।
ଏତେ ଆନନ୍ଦରେ ଛଳିଆ ଠାକୁର
ଛଳ କରି କରି ହସେ
ସଭିଏଁ ଦେଖନ୍ତି ନନ୍ଦ ସୁତକୁ ଲୋ
କଳାମୁଖ ସତେ ତୋଷେ……।
ଦେଖ ଲୋ ମିତଣୀ ଦେଖ………
ସେପଟେ ଆନନ୍ଦ ଏପଟେ ଗୋବିନ୍ଦ
ମୋହୁଛି ଲୋ କଳାଚାନ୍ଦ
ନନ୍ଦ ଘରେ ଆଜି କି ଆନନ୍ଦ ସତେ
ହସନ୍ତି କଳା ଗୋବିନ୍ଦ…….।
ଶ୍ରୀକାନ୍ତ ପଣ୍ଡା,
ବସନ୍ତିଆ,ଭଦ୍ରକ
