ତୁଳସୀ ତୁଳସୀ ବାସେ
ଉପେନ୍ଦ୍ର କୁମାର ବସ୍ତିଆ
ସଖି ଗୋ ଆଜି •••
ତୁଳସୀ ତୁଳସୀ ବାସେ
ଚୁଆ ଚନ୍ଦନର ମହକ ଛୁଟଇ
ଦେଖତ କିଏସେ ଆସେ
ଆଜି ତୁଳସୀ ତୁଳସୀ ବାସେ ।
ଦୁରୁଦିଶୁଅଛି ବାଙ୍କ ଚୁଳିଆର
ଛଇଳ ଛଟକ ଚାଲି
ଗୁଣ୍ଠୁଣୀ ହାତୀଟି ଚାଲେ ଢଳି ଢଳି
ସେତ ଆମ ବନ ମାଳୀ
ସଖି ଅଳପ ଅଳପ ହସେ
ଦଧିସର ଚୋର ସେ ନାଗର ବର
ବାନ୍ଧଇ ପୀରତି ଫାଶେ
ସଖି ! ତୁଳସୀ ତୁଳସୀ ବାସେ ।
ତା ବାଙ୍କ ଚାହାଣୀ ରସିକିଆ ଠାଣି
ନେଇଁଯାଏ କିଣି ମନ
ରୁଣୁଝୁଣୁ ବାଜେ ତା ପାଦ ନୁପୁର
ଶୁଭେ ମିଠା ବଂଶୀ ସ୍ଵନ
ସଖି ଦେଖତ ଏ ଣିକି ଆସେ
ରାଧାମନ ଚୋର ରସିକ ନାଗର
କଳା କାହ୍ନୁ ପ୍ରାୟ ଦିଶେ
ସଖି ! ତୁଳସୀ ତୁଳସୀ ବାସେ ।
ତା ପ୍ରେମ ପୀରତି ସକଳ ଯୁବତୀ
ତା ପ୍ରେମେ ହୁଅନ୍ତି ବାଇ
ହେଲେ କି କରିବୁ ତା ବଂଶୀ ଡାକୁଛି
ସଦାବେଳେ ରାଇରାଇ
ସଖି ! ରସିବାକୁ ତାର ରସେ
ମନ ଛନଛନ ହୁଅଇ ଊଛନ
ବହଇ ମଦନ ତ୍ରାସେ
ସଖି !ତୁଳସୀ ତୁଳସୀ ବାସେ ।
ଚାଲଚାଲ ସଖି ଆଣିବା ପାଛୋଟି
ବସାଇବା ରାସ କୁଞ୍ଜେ
ଆଦରେ କରିବା ଭାବ ଦିଆନିଆ
ପ୍ରୀତି ବେପାର ବାଣିଜେ
ସଖି ! ମିଳିବା ଆଜି ତା ରସେ
ଖୋଜିଲେ ମିଳେନା ସହଜେ ତା ସଙ୍ଗ
ଏଦୀନ ଉପେନ୍ଦ୍ର ଭାଷେ
ସଖି ! ତୁଳସୀ ତୁଳସୀ ବାସେ ।
ରାଉରକେଲା
