ମଙ୍ଗଳ ଦାୟକ ପ୍ରଭୁ ଗଜାନନ
ମଙ୍ଗଳ ଦାୟକ ପ୍ରଭୁ ଗଜାନନ
ବିଦ୍ୟା ବୁଦ୍ଧିରେ ପଣ୍ଡିତ,
ଜ୍ଞାନଦାତା ପ୍ରଭୁ ହେ ଗଣାଧିପତି
ସୁର ନରଙ୍କ ବନ୍ଦିତ l
ଏକଦନ୍ତ ପ୍ରଭୁ ହେରମ୍ବ ବିଘ୍ନେଶ
ବିନାୟକ ଗଣପତି,
ଗିରିଜାନନ୍ଦନ ମହେଶଙ୍କ ପ୍ରିୟ
ଗଣେଶ୍ୱର ବିଦ୍ୟାପତି l
ପୁରାଣ ଶାସ୍ତ୍ରର ଆରମ୍ଭରେ ନାମ
ବିଦ୍ୟା ଆରମ୍ଭରେ ପୁଣି,
ବିଦ୍ୟାଦାତାଙ୍କର ନାମ ସୁମରିଲେ
ଜଗତକୁ ଯିବା ଜିଣି l
ବଟରେ ଗଣେଶ କାଞ୍ଚିରେ ଗଣେଶ
କାମଦ ଗଣେଶ ନାମ,
ଚାରଗଣେଶ ପ୍ରଭୁ ନୃତ୍ୟଗଣେଶ
ଧନ୍ୟ ସେହି ପୁରୀ ଧାମ l
ଦେଖି କଟେ ପାପ ସେ ଅପୂର୍ବ ରୂପ
ଶ୍ରୀକ୍ଷେତ୍ରରେ ହାତୀବେଶ,
ଗଣପତି ଭଟ୍ଟ ଦର୍ଶନ କରିଲେ
ରହିଛି ପ୍ରଭୁଙ୍କ ଯଶ l
ଅଜ୍ଞାନ ଅନ୍ଧାର ଦୂରକର ପ୍ରଭୁ
ବିଦ୍ୟା ବୁଦ୍ଧି ଦେଇ ଭରି,
ବିଘ୍ନବିନାୟକ ସିଦ୍ଧି ପ୍ରଦାୟକ
ବିଦ୍ୟାର୍ଥୀ ମାନଙ୍କ ଶିରୀ l
ସିଦ୍ଧିଦାତା ପ୍ରଭୁ ଗଣପତି ବାପା
ଅଗ୍ର ପୂଜ୍ଯ ବିନାୟକ,
ମୂଷିକବାହନ ପ୍ରଭୁ ଗଣାଧିପ
ସୁଖଶାନ୍ତି ପ୍ରଦାୟକ l
ଆହେ ସିଦ୍ଧିଦାତା ପ୍ରଭୁ ବିଦ୍ୟାଦାତା
ସକଳ ଭାଗ୍ୟ ବିଧାତା,
କୃପା କଟାକ୍ଷରେ ଚାହିଁଥାଅ ପ୍ରଭୁ
ବୁଦ୍ଧିଦାତା ନିଧିଦାତା l
ଡ.ପ୍ରଶାନ୍ତ କୁମାର ଶତପଥୀ
ଛତ୍ରପୁର, ଗଞ୍ଜାମ