ବିଘ୍ନହର ବିଘ୍ନରାଜ
ଚିନ୍ମୟୀ ସାହୁ
ଅଗ୍ରପୂଜ୍ୟ ଗଜାନନହେ
ଗୈାରୀପୁତ୍ର ଗଣେଶ
ବିଦ୍ୟା-ବୁଦ୍ଧି-ସିଦ୍ଧି ଦାତାହେ
ଘଟରୂପୀ ବିଘ୍ନେଶ।
ଲମ୍ବୋଦର ପୀତ ଅମ୍ବରେ
ଶୋହେ ତବ ଶରୀର
ବିଘ୍ନହର ବିଘ୍ନରାଜ ହେ
ଘେନ କୋଟି ଜୁହାର।
ଅଜ୍ଞାନ ଅନ୍ଧାର ନାଶ ହେ
ଜାଳି ଜ୍ଞାନର ଜ୍ୟୋତି।
ବରଦାନ ଦିଅ ହୃଦୟେ
ଥାଉ ତବ ଭକତି।
ରିଦ୍ଧି ସିଦ୍ଧି କାନ୍ତ ତୁମେ ଯେ
ଶୁଭ ଲାଭ ଦାୟକ
ମାତା ଆଜ୍ଞା ପାଳି ହୋଇଛ
ତୁମେ ଗଜମସ୍ତକ।
କପାଳେ ଚନ୍ଦନ ସିନ୍ଦୂର
ଗଳେ ଭୁଜଙ୍ଗ ହାର
ଭୋଜନରେ ପ୍ରିୟ ସର୍ବଦା
ସୁନ୍ଦର ନଟବର।
କରେ ଲଡୁ -ପାଶ- ଅଙ୍କୁଶ
ଘାଘୁଡିଯେ କଟିରେ
ଗଳେ ଉପବିତ ଧାରଣେ
ପାଦ ଶୋହେ ନୂପୁରେ।
ମନ୍ଦ ମନ୍ଦ ଚାଲି ସୁନ୍ଦର
ମୂଷିକବାହନରେ
ଭାଦ୍ରବ ଶୁକ୍ଳ ଚତୁର୍ଥୀରେ
ଆସର ମଞ୍ଚପୁରେ।
ଗଣପତି ଶିବସୁପୁତ୍ର
ଉମା ଜୀବନଧନ
ତବ ଆଗମନେ ସଂସାର
ହେଲା ଭକ୍ତିମଗନ।
ଜୟ ଗଣପତି ନାଦରେ
ଶୁଭଇ ଜୟଗାନ
ଉଲ୍ଲସିତ ପ୍ରତି ପରାଣ
ଆନନ୍ଦ ସବୁମନ।
ଲିଖନ ପଠନ ସ୍ଥଗିତ
ଲେଖନୀ ହୁଏ ପୂଜା
ଚାରିଆଡେ ତୁମ ଭକ୍ତିର
ଉଡ଼ଇ ଦେଖ ଧ୍ଵଜା।
ମୂଳିସିଂ, ସହର , ଜଗତସିଂହପୁର
