ମୋ’ବିହୁନେ
ରାଗ —-ରାମକେରୀ
ଇନ୍ଦ୍ରଧନୁ ରୂପ ବିଭବେ
ଖେଳି କାମ ଚପଳା
ମାର୍ଗଚ୍ୟୁତ କରେ ମୁନିଙ୍କି
ଚିପି କୋମଳ ଗଳା |13|
ଚନ୍ଦନ ଶଇଳେ ଚନ୍ଦନ
ପେଡି ଫିଟାଇ ଧୀରେ
ମହକାଇ ଦେଲେ ବାଳାଏ
ଦଶଦିଗ ସମୀରେ |14|
କଜ୍ଜଳ ପର୍ବତୁ କଜ୍ଜଳ
ପେଡି ଖୋଲି ଆଦରେ
ଭ୍ରୂଲତା ସଜାଉଁ ଦିଶିଲେ
ମନୋରମ ନଗରେ |15|
ଶ୍ୟାମ କେଶୀ ମତ୍ତ କାଶିନୀ
ଚାରୁ ରୂପ ସମ୍ଭାରେ
ମୁଗ୍ଧ ହୋଇ ମେଘ ଧାଇଁଲେ
ଟାଣ ପଦ ପ୍ରହାରେ |16|
ଘଟିଲା ଏକାଳେ ସେସ୍ଥଳେ
ଯେଉଁ ଅଦ୍ଭୁତ କଥା
ଲକ୍ଷ୍ୟ କଲେ ସବୁ ଅମରେ
ଆଶୁ ଟୁଙ୍ଗାରି ମଥା |17|
ବେନି କୁମାରୀଙ୍କ ପଛରେ
ହରି ଧାଆନ୍ତି ଖରେ
ତାଙ୍କୁ ଦେଖି ପ୍ରାଣ ବିକଳେ
ଦୁହେଁ ପଳାନ୍ତି ଡରେ |18|
ମେଘରାଜ ପଦ ପ୍ରହାରେ
ମେଘନାଦ କଟକ
ଫାଟିପଡୁଥିଲା ସହସା
କରିନୁହେଁ ଅଟକ |19|
କୁଶଳୀ ଧାଇଁଲା ପୂରୁବେ
ଲମ୍ବ ଲମ୍ଫ ବଢା଼ଇ
ମୁଷଳୀ ଧାଇଁଲା ଉତ୍ତରେ
କାମାନ୍ଧକୁ ଅନାଇ |20|
ମାଂସ ଲୋଭୀ ବ୍ୟାଘ୍ରଯେସନ
ଧାଏଁ ମୃଗ ପଶ୍ଚାତେ
ବାଳାପ୍ରେମ ଲୋଭୀ ଧାଇଁଲେ
ତଥା ବରଷା ହାତେ |21|
ଅଞ୍ଜଳୀରେ ଭରି ସହସ୍ର
ମଞ୍ଜୁ ରତନ ହାର
ଡାକିଲେ ବାଳାଙ୍କୁ ବିନୟେ
ପ୍ରେମେ କରି ଜୁହାର |22|
“ଆଣିଛି ଆଣିଛି ସଜନୀ
ତୁମ ଲାଗି ଗହଣା
କୃପାକରି ଘେନ ଏଥର
ଆଗୋ ପୀକ ବଚନା |23|
ମୁଁ ନୁହେଁ ଶାର୍ଦୁଳ କିଅବା
ମାଂସ ଲୋଭୀ କେଶରୀ
ମେଘରାଜ ବିଶ୍ୱକଲ୍ୟାଣ –
କାରୀ ନୁହେଁ କେ’ସରି |24|
ମୋ’କରୁଣା ଲାଭେ ଜଗତ
ଧନ୍ୟା ହୋଇ ସତତ
ଦାରିଦ୍ରତା ରୂପୀ ରାକ୍ଷସ
ଆଶୁ ହୁଏ ନିହତ |25|
ତରୁବଲ୍ଲୀ ଶସ୍ୟ ସକଳ
ଲଭି ନବ ଜୀବନ
ସୁନାର ସଂସାର ଗଢ଼ନ୍ତି
ଭୂଲି ଦୁଃଖ କଷଣ |26|
ମୋହ ଆଗମନେ ଧରଣୀ
ଧରି ଶସ୍ୟ ରତନ
ବିଶ୍ୱର ସକଳ ସଜୀବେ
କରିଥାନ୍ତି ପାଳନ |27|
ମୁଁନୁହେଁ ହରିଙ୍କ ସମାନ
ଭୟଙ୍କର ଯୁବକ
ମୁଁ ଅଟେ ଶ୍ରୀ ହରି ସମାନ
ବିଶ୍ୱ ଜୀବ ପାଳକ |28|
ଶୁଷ୍କ ମହୀ ବକ୍ଷେ ଫୁଟାଏ
ସଦା ସହସ୍ର ଫୁଲ
ମୋହ ଦର୍ପେ ବର୍ଷେ ମହୀରେ
ଶତ ଅନଳ ଝୁଲ |29|
ଫଳ ପୁଷ୍ପେ ଲକ୍ଷ୍ମୀ ଭଣ୍ଡାର
ପରି ପୂର୍ଣ୍ଣ କରଇ
ମୋ’ବିହୁନେ ଜୀବ, ଆତୁରେ
କ୍ଷୁଧା କଷ୍ଟ ଭୋଗଇ |30
ଶ୍ରୀ ବିଦ୍ୟାଧର ମହାନ୍ତ
ତମ୍ବାହରା , ହରି ଚନ୍ଦନ ପୁର, କେନ୍ଦୁଝର
