ପ୍ରୟାସ…
(ଲକ୍ ଡାଉନ୍ ସନେଟ୍)
ସବୁଠି ଶୂନ୍ୟତାର ପ୍ରଭାବ ଅସମ୍ଭବ ଏକ ଖାଁ ଖାଁ ଭାବ…!
କେହି ଚିହ୍ନା ନ ଥିଲେ କେହି ନ ଥିଲେ ଆପଣାର ବୋଲି…!!
କିଏ ଏଠି କାହାକୁ ପଚାରିବ କିଏ ବା କାହା ଖବର ନେବ…??
ସତେ ଯେପରି ମରଣଜନ୍ତା ଜଗିଥିଲା ନିଜ ଦୁଆରକୁ ଖୋଲି…!!
ଶୁନଶାନ୍ ଥିଲା ରାସ୍ତାଘାଟ ଶୁନଶାନ୍ ଥିଲା ବଜାର ହାଟ…!
କୁଆ କୋଇଲି କୁକୁର ଗାଈ ରାସ୍ତାରେ ଆଁ କରି ଦେଖୁଥିଲେ…!!
ମଣିଷ ସହରରେ ମଣିଷର ଅଭାବ ଅଦ୍ଭୁତ ଏକ ଦୃଶ୍ୟପଟ…!!
କିଏ କେଉଁଠି ଲୁଚିଗଲେ କି ହଜିଗଲେ ବୋଧେ ଭାବୁଥିଲେ…??
ଠେଲାପେଲା ରାଜରାସ୍ତାକୁ ଏ କି ଶୂନ୍ୟତା ଗ୍ରାସ କରିଥିଲା…??
କାହିଁକି ଚଳଚଞ୍ଚଳ ପୃଥିବୀଟା ହଠାତ୍ ଏମିତି ସ୍ଥିର ହେଇଗଲା…??
ସମୟ ତ ଅଟକିଲାନି ହେଲେ ଗତି ସବୁ ବନ୍ଦ୍ ହୋଇଗଲା…!!
ଅଜଣା କୋକୁଆ ଭୟ ଆଗରେ ସବୁକିଛି କି ହାର ମାନିଗଲା…??
ଅଦୃଶ୍ୟ ନିଶବ୍ଦ ପଦଶବ୍ଦଟି ଏତେ ଭୟଙ୍କର ଶବ୍ଦଟେ କରିଲା…
ନିଃଶ୍ୱାସ ନେବା ପାଇଁ ବିଶ୍ବ ପୁନଃ ବିଶ୍ଵାସର ଦ୍ଵାର ଖୋଜିଲା…!!??
ମଧୁମିତା ମିଶ୍ର
ଭୁବନେଶ୍ଵର
