ବାଲେଶ୍ଵର,୧୩/୧୦/୨୨- ବିଦ୍ୟାଳୟରେ ହେଉଥିବା ଦୁର୍ନୀତି ଓ ଛଟେଇ ବିରୋଧରେ ଧାରଣା । ଆତ୍ମହତ୍ୟା ଭଳି ଚରମ ନିଷ୍ପତ୍ତି ନେଲେ ଅନଶନକାରୀ । ଏଭଳି ଏକ ଘଟଣା ଦେଖିବାକୁ ମିଳିଛି ବାଲେଶ୍ଵର ଜିଲ୍ଲା ଖଇରା ବ୍ଲକ ପଳସା ପଞ୍ଚାୟତ ପଳସା ଗ୍ରାମରେ । ଉକ୍ତ ଗ୍ରାମରେ ଥିବା ଗୋବିନ୍ଦ ଚନ୍ଦ୍ର ହାଇସ୍କୁଲ ଦୁର୍ନୀତିର ଗନ୍ତାଘର ପାଲଟିଛି । ବିଭାଗୀୟ ଅଧିକାରୀ ଜାଣିଶୁଣି ନିରବଦ୍ରଷ୍ଟା ସାଜିଥିବା ଜଣାଯାଇଛି । ବିଦ୍ୟାଳୟ ପ୍ରତିଷ୍ଠାତା ଓ ତାଙ୍କ ପରିବାର ଏସ.ସି. ଓ ଏସ.ଟି.(SC/ST) ବିଦ୍ୟାଳୟ ଖୋଲି କରୁଛନ୍ତି ବେପାର । ଶିକ୍ଷକ ନିଯୁକ୍ତି ନାମରେ ମୋଟା ଅଙ୍କର ଅର୍ଥ ନେଇ ନୂତନ ଶିକ୍ଷକ ନିଯୁକ୍ତି ଦେଇ ପୁରୁଣା ଶିକ୍ଷକ ଓ ଶିକ୍ଷା କର୍ମଚାରୀଙ୍କୁ କରୁଛନ୍ତି ଛଟେଇ । ବାହାର ଜିଲ୍ଲାରୁ ପିଲାଙ୍କୁ ଆଣି ହଷ୍ଟେଲରେ ରଖି ହଡପ କରୁଛନ୍ତି ଷ୍ଟାଇପେଣ୍ଡ ଟଙ୍କା । ସରକାରୀ ନଥିପତ୍ରରେ କମ୍ ପିଲାଙ୍କୁ ବେଶି ଦର୍ଶାଇ ଲୋଟିବାରେ ଲାଗି ପଡିଛନ୍ତି ପ୍ରତିଷ୍ଠାତା ପୂର୍ଣ୍ଣ ଚନ୍ଦ୍ର ପଣ୍ଡାଙ୍କ ପୁତ୍ର ମାନସ ରଞ୍ଜନ ଓରଫ ସୁଦାମ ପଣ୍ଡା । ଯିଏକି ଜଣେ ଜାଲ୍ ସାର୍ଟିଫିକେଟ ରାକେଟଧାରୀ ଧାରଣାକାରୀ କରିଛନ୍ତି ପ୍ରକାଶ । ସବୁଠାରୁ ବଡ଼ ଆଶ୍ଚର୍ଯ୍ୟର କଥା ବିଦ୍ୟାଳୟର ପିଲାମାନେ ପ୍ରଧାନ ଶିକ୍ଷକଙ୍କୁ ଦେଖି ନାହାନ୍ତି କେବେ । ବିଭିନ୍ନ ସମୟରେ ପିଲା ମାନଙ୍କୁ ଗୃହ ନିର୍ମାଣ ଓ ଧାନ କାଟିବା କାର୍ଯ୍ୟରେ ନିୟୋଜିତ କୁରୁଛନ୍ତି ଶ୍ରୀ ପଣ୍ଡା । ସଠିକ୍ ଭାବେ ଗଠନ ହେଉନି ବିଦ୍ୟାଳୟ ପରିଚାଳନା କମିଟି । ଏଭଳି ଅନେକ ଅବ୍ଯବସ୍ଥା ଓ ଦୁର୍ନୀତିକୁ ନେଇ ଚାଲୁଛି ବିଦ୍ୟାଳୟ । ଏଠାରେ ପ୍ରଶ୍ନ ଉଠେ, ଏତେପରେ ସ୍ଥାନୀୟ ଓ ଜିଲ୍ଲା ବିଭାଗୀୟ ଅଧିକାରୀ ମାନେ କରୁଛନ୍ତି କ’ଣ ? ସମସ୍ତେ କ’ଣ ସ୍ବାର୍ଥରେ ବନ୍ଧା ? ନା ଏଭଳି କାର୍ଯ୍ୟ କରିବାରେ ଶ୍ରୀ ପଣ୍ଡାଙ୍କୁ କରୁଛନ୍ତି ସହଯୋଗ ? ବାରମ୍ବାର ଅଭିଯୋଗ ପରେ କୌଣସି ସୁଫଳ ନ ମିଳେବାରୁ ଅନଶନରେ ବସିଛନ୍ତି ଗ୍ରାମବାସୀ, ଅଭିଭାବକ, ଶିକ୍ଷକ ଓ ଶିକ୍ଷାକର୍ମଚାରୀ । ଯଦି ଏହାର ସ୍ଥାୟୀ ସମାଧାନ ଦିଗରେ ଜିଲ୍ଲାପାଳ, ସ୍ଥାନୀୟ ପ୍ରଶାସନ କିମ୍ବା ବିଭାଗୀୟ ଅଧିକାରୀ କୌଣସି ପଦକ୍ଷେପ ନ ନିଅନ୍ତି, ତେବେ ଦେହରେ କିରାସିନି ଢାଳି ଆତ୍ମହତ୍ୟା କରିବେ ବୋଲି ଧମକ ଦେଇଛନ୍ତି ଅନଶନକାରୀ । କିନ୍ତୁ ବଡ଼ ଦୁଃଖର ବିଷୟ ଧାରଣା ସ୍ଥଳକୁ କୌଣସି ଅଧିକାରୀ, ରାଜନେତା, ମନ୍ତ୍ରୀ କିମ୍ବା ବିଧାୟକ ଆସିନଥିଲେ । ଯେ ପର୍ଯ୍ୟନ୍ତ ସମସ୍ୟା ସମାଧାନ ନ ହୋଇଛି ସେ ପର୍ଯ୍ୟନ୍ତ ଏ ଅନଶନ ଚାଲୁ ରହିବ ବୋଲି ଅନଶନକାରୀ ପ୍ରକାଶ କରିଛନ୍ତି । ଘଟଣା ସ୍ଥଳରୁ ଛାତ୍ର, ଅଭିଭାବକ, ଗ୍ରାମବାସୀ କର୍ମଚାରୀ ମାନଙ୍କ ଠାରୁ କରାଯାଇଛି ଖବର ସଂଗ୍ରହ ।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ