ସର୍ବଦା ସନ୍ତୁଷ୍ଟ
ମୁଁ ଛୋଟ
ହଁ ମୋ ଛୋଟ ପଣିଆରେ ମୁଁ ବେଶ୍ ସନ୍ତୁଷ୍ଟ
ଏଥିପାଇଁ ମଧ୍ୟ ତୁମ ହୃଦେ ଭରପୂର କଷ୍ଟ
ତଥାପି ——
ତୁମର ଈର୍ଷା !
କାହା ଗୋଡ ଟାଣି ଆଗକୁ ମୁଁ ଯିବାକୁ ଚାହୁଁନି
ପାଦ ତଳେ ମୁଣ୍ଡ ଚାପି ଚାପି ନିଶୁଣି ଗଢୁନି।
ତଥାପି —-
ମୋ ବିରୁଦ୍ଧେ ଷଡ଼ଯନ୍ତ୍ର !
ଈଶ୍ବର କୃପାରୁ ମତେ ମିଳିଥିବା ଆସନ ମୋ ପାଇଁ ଯଥେଷ୍ଟ
ସେ ଆସନର ମର୍ଯ୍ୟାଦା ରଖିବାକୁ ମୁଁ ସତତ ଚେଷ୍ଟିତ
ତଥାପି —-
ମତେ ଆକ୍ରମଣ !
ଚାହେଁ ନାହିଁ ଝିଙ୍କିବାକୁ ଆଉ କାହା ଆସନ
ମୋ ପ୍ରାପ୍ଯ ମତେ ମିଳିଛି, ହୁଏ ନାହିଁ ମତିଚ୍ଛନ୍ନ
ତଥାପି—–
ମୋ ଶାନ୍ତିଭଙ୍ଗର ମସୁଧା !
ତୁମ ଈର୍ଷା,ଷଡ଼ଯନ୍ତ୍ର,ଆକ୍ରମଣ, ଶାନ୍ତିଭଙ୍ଗ ମସୁଧାର ଫଳ ହେବ ଶୂନ
କେବଳ ଅନ୍ତରେ ତୁମ ପ୍ରଜ୍ଜ୍ବଳିବ ହୁତ୍
ହୁତ୍ ଘୃଣା ହୂତାଶନ
କାରଣ —-
ମୁଁ ପରା ସଦାସର୍ବଦା ଈଶ୍ୱର ଆଶ୍ରିତ
ମୋ କର୍ମରେ ଦୃଢ,ବରିଅଛି ସତ୍ ପଥ
ହୁଏତ —-
କିଛି କ୍ଷଣ ସମ୍ମୁଖେ କୁଜ୍ଝଟିକା ଛାଇଯିବ
ପୁନରାୟ ପୂର୍ବାପେକ୍ଷା ଉଜ୍ଜ୍ୱଳ ହୋଇବ
ମମତା ଶତପଥୀ
କେନ୍ଦ୍ରାପଡ଼ା