ଟେମରୀ(ମ ନି ସ):- ୦୪/୦୪ : ଓଡ଼ିଶା ର ପୁରପଲ୍ଲୀରେ ଚୈତ୍ର ପର୍ବରେ ଦେବାଦେବୀ ପୂଜା ହେଉଛି ଅତ୍ୟନ୍ତ ପ୍ରାଚୀନ ଓ ନିଆରା ପରମ୍ପରା। ଏହି ପରମ୍ପରା କାହିଁ କେତେ ଅନାଦି କାଳରୁ ଆନନ୍ଦ ଉଲ୍ଲାସରେ ପାଳିତ ହୋଇ ଆସୁଅଛି ତାହା ଆକଳନ କରିବା ଦୁଃସାଧ୍ୟ । ଓଡ଼ିଶାରେ ବିଭିନ୍ନ ଭାଷା ଭାଷୀ ଲୋକ ବସ ବାସ କରୁଥିବା ବେଳେ ନିଜ ପରମ୍ପରାନୁଯାଇ ବିଭିନ୍ନ ଦେବାଦେବୀଙ୍କୁ ପୂଜା ବିଧି ରହିଛି । ଏହି ଚୈତ୍ର ପର୍ବରେ କେତେକ ଗ୍ରାମରେ କିଛି ଦେବାଦେବୀ ଭାବରେ ଅଭିନୟ କରୁଥିବା ପୁରୁଷ ବା ମହିଳା ମୁଣ୍ଡରେ କଳସୀ ବୁହିବା, ଲୁହା କଣ୍ଟା ଦୋଳି ଝୋଲିବା ଦୃଶ୍ୟ ଦେଖିବାକୁ ମିଳିଥାଏ । ଏହି ଦିନରେ ଗ୍ରାମର ଲୋକମାନେ ଗ୍ରାମର ମଙ୍ଗଳ ଓ ନିଜ ପରିବାର ମଙ୍ଗଳ ସକାଶେ ନିଜ ନିଜ ଦେବା ଦେବୀଙ୍କୁ ପୂଜା କରି ଗାଁ ଠାକୁରାଣୀଙ୍କ ପୀଠ ସ୍ଥଳୀରେ ଏକତ୍ରିତ ହୋଇ ଛେଲି, ମେଣ୍ଢା, କୁକୁଡ଼ା, ପାରା, ନଡ଼ିଆ, ଧୂପଦୀପ ଦେଇ ପୂଜା କରି ଥାନ୍ତି । ଗୋଲାମୁଣ୍ଡା ବ୍ଲକ ଅନ୍ତର୍ଗତ ପଣ୍ଡକୁଲ , ଟେମରୀ ,ଚିଚିଆ, ଲିମସେର, ଫରଙ୍ଗ, ଫୁଣ୍ଡା, ଗୋଲାମୁଣ୍ଡା, ବୃନ୍ଦାବାହାଲ, ଦଶପୁର, ରେଙ୍ଗାସାପାଲି, ବନ୍ଦାଗାଁ ସମେତ ବିଭିନ୍ନ ଗ୍ରାମରେ ଚୈତ୍ର ପର୍ବ ପାଳିତ ହୋଇ ଥିବା ବେଳେ କୁମ୍ଭାରି ଗ୍ରାମ ମାଆ ଠାକୁରାଣୀ ଗୁଡ଼ିରେ ମହାଆଡମ୍ବର ଭାବରେ ପାଳିତ ହୋଇଯାଇଛି । ମାଆ ଠାକୁରାଣୀ ମୁଣ୍ଡରେ କଳସୀ ବୁହି ଝାଙ୍କର ଘରୁ ବାହାରି ପ୍ରଥମେ ଗହନ୍ତିଆ ଘରକୁ ପୂଜା ପାଇବା ପାଇଁ ଯାଇଥାଏ ଓ ପରେ ଘର ଘର ବୁଲି ଗ୍ରାମ ର ମାଆ ଭୁଆସୁଣୀ ଙ୍କ ବନ୍ଧାପଣା ସାରି ମାଆ ଠାକୁରାଣୀ ଗୁଡି କୁ ଯାଇଥାଏ । ସେଠାରେ ପ୍ରାଚୀନ ପରମ୍ପରା ଅନୁଯାୟୀ ଛେଲି ମେଣ୍ଢା, କୁକୁଡା, ପାରା ବଳି ଦେଇ ନଡ଼ିଆ ଧୂପକାଠି ପୂଜା ବିଧି କରାଯାଇଥାଏ ।
ଜଗଜ୍ଜୀବନ ସା ଙ୍କ ରିପୋର୍ଟ