ଜୟପାଟଣା:୧୪/୦୭/୨୩ଗ୍ରାମାଞ୍ଚଳ ଜନସାଧାରଣଙ୍କର ଆର୍ଥିକ ମାନଦଣ୍ଡ କୃଷି ଉପରେ ନିର୍ଭରଶୀଳ । ଆମ ରାଜ୍ୟରେ ଶତକଡା ୮୦ଭାଗ ଜନସାଧାରଣ ଗ୍ରାମାଞ୍ଚଳରେ ବସବାସ କରନ୍ତି । ବିଶେଷ କରି ଏମାନେ କୃଷିକାର୍ଯ୍ୟ ସହିତ ଜଡିତ ହୋଇଥାଆନ୍ତି । ଗ୍ରାମାଞ୍ଚଳର କୃଷକ ମାନଙ୍କର ଆର୍ଥିକ ପରିସ୍ଥିତି ସୁଦୃଢ଼ କରିବା ପାଇଁ କୃଷି ସମବାୟ ସମିତି ଗଠନ ହୋଇଥିଲା । ୧୯୬୬-୬୭ ମସିହାରେ ଆରମ୍ଭ ହୋଇଥିବା ସବୁଜ ବିପ୍ଲବ ଫଳରେ ଆଜି ଆମ 
ଦେଶ ଖାଦ୍ୟ ପଦାର୍ଥ ଉତ୍ପାଦନ କ୍ଷେତ୍ରରେ ସ୍ୱାବଲମ୍ବନଶୀଳ ହୋଇପାରିଅଛି । ଫଳରେ ଖାଦ୍ୟ ପଦାର୍ଥ କୃଷି ଉତ୍ପାଦନ ବୃଦ୍ଧି କରିବା ପାଇଁ ଦେଶର କୃଷି ଗବେଷଣା କେନ୍ଦ୍ରମାନଙ୍କରୁ ବିଭିନ୍ନ ପ୍ରକାର ଅଧିକ ଉତ୍ପାଦନକ୍ଷମ ବିହନ ଓ କୃଷି କୌଶଳ ଉଦ୍ଭାବନ ହେଲେ ମଧ୍ୟ ଏହି ଉନ୍ନତ ଚାଷ ପ୍ରଣାଳୀ ବ୍ୟୟସାପେକ୍ଷ । ସାରା, ଶସ୍ୟ ସଂରକ୍ଷଣ ଉନ୍ନତ କୃଷି ଯନ୍ତ୍ରପାତି ଶୁଷ୍କ ଅଞ୍ଚଳରେ ଉନ୍ନତ କୃଷି ପଦ୍ଧତି ଅବଲମ୍ବନ ନିମିତ୍ତ ଅଧିକ ଅର୍ଥ ଲଗାଣ ଅପରିହାର୍ଯ୍ୟ । ଗାଁ ଗହଳରେ କ୍ଷୁଦ୍ର, ନାମମାତ୍ର ଚାଷୀମାନେ ଏହି ଉନ୍ନତ ଚାଷ ପ୍ରଣାଳୀ ଅବଲମ୍ବନ କରିବା ପାଇଁ ସକ୍ଷମ ନୁହନ୍ତି । ଏଣୁ ଖାଦ୍ୟ 
ଉତ୍ପାଦନ ବୃଦ୍ଧିକୁ ଆହୁରି ତ୍ୱରାନ୍ୱିତ କରିବା ପାଇଁ ଚାଷୀମନଙ୍କୁ ଅଳ୍ପ ସୁଧରେ ଋଣ ଠିକ୍ ସମୟରେ ଯୋଗାଇ ଦେବା ଅପରିହାର୍ଯ୍ୟ ହୋଇପଡିଛି । ଏହି ଗୁରୁଦାୟିତ୍ଵ ଦେଶର ସମବାୟ ବିଭାଗକୁ ମୁଖ୍ୟତଃ ସମର୍ପଣ କରାଯାଇଛି । ଗ୍ରାମ୍ୟ ଉନ୍ନୟନର ଦ୍ଵିତୀୟ ପଦକ୍ଷେପ ହେଉଛି ଶ୍ଵେତ ବିପ୍ଲବ, ଏହାଦ୍ଵାରା କ୍ଷୁଦ୍ରଚାଷୀଠାରୁ ଆରମ୍ଭ କରି ଜମିହୀନ ବେକାର ଗାମ୍ୟ ଯୁବକମାନେ ମଧ୍ୟ କର୍ମ ସଂସ୍ଥାନ ପାଇପାରିବେ । ଗ୍ରାମାଞ୍ଚଳରେ ଚାଷୀଭାଇମାନେ ସମବାୟ ଦୁଗ୍ଧ ଉତ୍ପାଦନ ସଂଘ ପ୍ରତିଷ୍ଠା କରି ଲାଭବାନ ହୋଇପାରିବେ । ସମବାୟ ବିଭାଗ ସର୍ବଦା ଦୁର୍ବଳକୁ ଆତ୍ମରକ୍ଷା କରିବାରେ ସହାୟକ ହୋଇସାରିଛି, ଖାଉଟି ଦ୍ରବ୍ୟର ସଂଗ୍ରହ ଓ ସୁଷମ ବଣ୍ଟନ ଗ୍ରାମାଞ୍ଚଳରେ ସମବାୟ ଅନୁଷ୍ଠାନ ମାଧ୍ୟମରେ ବହୁ ପରିମାଣରେ ହୋଇଥାଏ । ଗ୍ରାମ୍ୟ ଉନ୍ନୟନ ନିମିତ୍ତ ଯେଉଁସବୁ ବ୍ୟବସ୍ଥା ରହିଛି ତାହାର ସୁଫଳ ସମବାୟ ମାଧ୍ୟମରେ ଲୋକଙ୍କ ପାଖରେ ସହଜରେ ପହଞ୍ଚିପାରିବ । ଗ୍ରାମାଞ୍ଚଳରେ ସମବାୟ ହିଁ ଏକମାତ୍ର ଅନୁଷ୍ଠାନ ଯାହାର ମାଧ୍ୟମରେ ଆର୍ଥିକ ଦୁର୍ବଳ ଲୋକମାନଙ୍କର ସ୍ଵାର୍ଥ ସୁରକ୍ଷା ହୋଇପାରିବ ।
ସମବାୟ ଅନୁଷ୍ଠାନ ଏକ ସ୍ଵତଃପ୍ରବୃତ୍ତ ସଂଘବଦ୍ଧ, ଗଣତାନ୍ତ୍ରିକ ପଦ୍ଧତିରେ ପରିଚାଳିତ, ନିରପେକ୍ଷ ଅନୁଷ୍ଠାନ । ମିତବ୍ୟୟିତା ସେବା ମନୋଭାବ ନୀତି ଉପରେ ନିର୍ଭର କରି ଏହା ପରିଚାଳିତ ହୋଇଥାଏ ।
କଳାହାଣ୍ଡି ଜିଲ୍ଲା ଜୟପାଟଣା ବ୍ଲକ ଏକ କୃଷି ପ୍ରଧାନ ଅଞ୍ଚଳର । ଏହାକୁ ଲକ୍ଷ କରି ଆଜି ବ୍ଲକର ସର୍ଗିଗୁଡ଼ା ଏବଂ କୁଚାଗାଁ ଠାରେ କୃଷି ସମବାୟ ସମିତି କାର୍ଯ୍ୟାଳୟର ଉଦ୍ଘାଟନ ହୋଇ ଯାଇଛି । ସ୍ଥାନୀୟ ଲାଞ୍ଜିଗଡ଼ ବିଧାୟକ ପ୍ରଦୀପ ଦିଶାରୀ ଏହାକୁ ଉଦ୍ଘାଟନ କରିଛନ୍ତି । ସର୍ଗିଗୁଡ଼ା ସରପଞ୍ଚ ମନ୍ଦାକିନୀ ଠାକୁରଙ୍କର ନେତୃତ୍ୱରେ କାର୍ଯ୍ୟକ୍ରମର ସଫଳ ଆୟୋଜନ ହୋଇଥିଲା । କୁଚାଗାଁରେ ମଧ୍ୟ ଲାଞ୍ଜିଗଡ଼ ବିଧାୟକ ଶ୍ରୀ ଦିଶାରୀ କୃଷି ସମବାୟ ସମିତିର ଉଦ୍ଘାଟନ କରିଥିଲେ । ଏହି କାର୍ଯ୍ୟକ୍ରମରେ ଜୟପାଟଣା ବ୍ଲକ ପେକ୍ସ ସଭାପତି ରବିନ ସିଂଦେଓ ଯୋଗଦେଇଥିଲେ । କୁଚାଗାଁ ସରପଞ୍ଚ ଅଷ୍ଟମୀ ଦୁର୍ଗାଙ୍କର ନେତୃତ୍ୱରେ କାର୍ଯ୍ୟକ୍ରମର ଆୟୋଜନ ହୋଇଥିଲା ।
ଜଗମୋହନ ପଟ୍ଟନାୟକ, ବରିଷ୍ଠ ସାମ୍ବାଦିକ
