ସାହିତ୍ୟ ଅଗଣା

 

 

         ବିଶ୍ୱ ପଖାଳ ଦିବସ

 

ଓଡ଼ିଆ ପଖାଳ ସବୁଠୁ ବଢିଆ

ପ୍ରତି ଓଡ଼ିଆଙ୍କ ପାଇଁ

ପଖାଳ ସାଥୀରେ ଶାଗ ବଢିଚୁରା

ଲଙ୍କା ଲେମ୍ବୁ ଟିକେ ଦହି ।1।

 

ପୋଟଳ କଲରା ଭେଣ୍ଡି ବାଇଗଣ

ମସଲାରେ ଗୋଟାଭଜା

ପଖାଳକୁ ପୁଣି ଆମ୍ବର ଚଟଣି

ଖାଇବାକୁ ବଡ଼ ମଜା ।2।

 

ଓଡ଼ିଆ ପଖାଳ ପେଟେ ଖାଇଦେଇ

ଚଷା ଭାଇ କ୍ଷେତେ ଖଟେ

ପଖାଳ ତୋରାଣି ଖାଦ୍ୟସାର ଭରା

ଶୋଷ ଲାଗେନାହିଁ ମୋଟେ ।3।

 

କେବେ ପଖାଳରେ କାକୁଡି ସାଲଟ

ବଢାଏ ଜଳୀୟ ଅଂଶ

ସାରା ଓଡ଼ିଶାରେ ପଖାଳ ତୋରାଣି

ଖାଦ୍ୟର ବିଶେଷ ଅଂଶ ।4।

 

ବଡ଼ ଦେଉଳରେ କାଳିଆ ଠାକୁର

ପଖାଳ ଭାତରେ ଘିଅ

ଖାଇବାର ମଜା ଖାଇବାରେ ରାଜା

ନୀଳାଚଳେ ବଡ଼ ଦିଅଁ ।5।

 

ଓଡ଼ିଆ ଘରରେ ବାହାଘର ପରେ

ଜ୍ବାଇଁର ଦହି ପଖାଳ

ଖାଇବାର ବିଧି ଆମ ଚଳଣିରେ

ଲାଗେ ଭାରି କୌତୁହଳ ।6।

 

ଦେଶ ବିଦେଶରେ ଓଡ଼ିଆ ପଖାଳ

ଓଡ଼ିଶାର ସ୍ୱାଭିମାନ

ବିଶ୍ୱ ଦରବାରେ ଆଦୃତ ହୋଇଛି

ବିଶ୍ୱ ପଖାଳର ଦିନ ।7।

 

ଖରାଦିନ ସବୁ ଭୋଜନାଳୟରେ

ପଖାଳ ପରି ବେଷଣ

ପଖାଳ କଂସାରେ ହାତ ଛୁଆଁଇଲେ

ବଢେ ଓଡ଼ିଆଙ୍କ ମାନ ।8।

 

ପଖାଳ ମହିମା କାହାକୁ ଅଜଣା

ବିଶ୍ୱ ଦରବାରେ ନାହିଁ

ଆଜି ପରା ବିଶ୍ୱ ପଖାଳ ଦିବସ

ଏକଥା ଭୁଲିବା ନାହିଁ ।9।

 

ସୁରେନ୍ଦ୍ର କୁମାର ବେହେରା ।

ଜିତିପୁର ,ହରିପୁର ହାଟ ,ଯାଜପୁର ।