ନିଷ୍ଠା ଓ ଲକ୍ଷ୍ୟ
ନିଷ୍ଠା ଆଉ ଲକ୍ଷ୍ୟ ଯାଆଁଳା ସ୍ୱରୂପ
ମୁଦ୍ରାର ଦୁଇଟି ପାଶ
ନିଷ୍ଠା ବିନା ଲକ୍ଷ୍ୟ ହୁଏନି ପ୍ରାପତ
ଲକ୍ଷ୍ୟଟି ହୁଅଇ ନାଶ ॥
ପଞ୍ଚ ଲକ୍ଷଣର ନିଷ୍ଠା ହୃଦେ ଥିଲେ
ଉତ୍ତମ ବିଦ୍ୟାର୍ଥୀ ହୁଏ
ଜ୍ଞାନର ଆଲୋକେ ଉଦ୍ଭାସିତ ହୋଇ
ସମାଜରେ ପୂଜା ପାଏ ॥
ଖରା ବର୍ଷା ଶୀତ ଖାତର ନକରି
ଚଷାଭାଇ କାମ କରେ
ତାର ନିଷ୍ଠା କର୍ମେ ଲକ୍ଷ୍ୟ ପ୍ରାପ୍ତି ହୁଏ
ଅମାର ତାହାର ପୁରେ ॥
ଯୋଗ ଆର।ଧନା ନିର୍ବାଣ ନିମନ୍ତେ
ମୁନି ଯୋଗୀ ସନ୍ଥ ସାଧୁ
ନିଷ୍ଠାରେ ସାଧନା ଜାରି ରଖିବାରୁ
ପାଇଥାନ୍ତି ବିଭୁ ମଧୁ ॥
ଗୃହସ୍ଥ ପାଳିଲେ ସ୍ଵଧର୍ମ ନିଷ୍ଠାରେ
ସୁଖ ଶାନ୍ତି ପ୍ରାପ୍ତହୁଏ
ନୋହିଲେ ଅଶାନ୍ତି ଅଗ୍ନିର ଜ୍ୱଳନେ
ଲକ୍ଷ୍ୟଚ୍ୟୁତ ହୋଇଥାଏ ॥
ବାୟା ଚଢ଼େଇଟି ନିଷ୍ଠାର ସହିତ
ବସା ତାର ଗଢି ଥାଏ
ଯେତେ ଝଡ଼ଝଞ୍ଜା ଆସିଲେ ତାସାଥେ
ଲକ୍ଷ୍ୟୁ ବିଚ୍ୟୁତ ନ ହୁଏ ॥
ତଟିନୀର ଧର୍ମ ସାଗର ସଙ୍ଗମ
ଏକ ଲକ୍ଷ୍ୟ ନେଇ ବହେ
ଘାତ ପ୍ରତିଘାତେ ଅତିକ୍ରମି ପଥ
ଅନେକ କଷଣ ସହେ ॥
ନିଷ୍ଠା ସହଚର ଆନୁଗତ୍ୟ ସେବା
ପ୍ରେମ ତପ ଆଚରଣ
ସେ ପାଇଁ ସାବିତ୍ରୀ ଲକ୍ଷ୍ୟ ପ୍ରାପ୍ତି ହେଲେ
ପାଇଲେ ସ୍ୱାମୀଙ୍କ ପ୍ରାଣ ॥
ଏକଲବ୍ୟ ପାର୍ଥ ଆରୁଣି ନଚିଙ୍କ
ଲକ୍ଷ୍ୟ ପ୍ରାପ୍ତି ନିଷ୍ଠା ପାଇଁ
ପୁରାଣେ ରହିଛି ଅନେକ ବାରତା
ଆମକୁ ସୂଚାଇ ଥାଇ ॥
ଏଣୁ ହେ ମାନବ ନିଷ୍ଠା ଜାରିରଖ
ପ୍ରତିଟି କରମ ପାଇଁ
ତେବେ ଯାଇ ଲକ୍ଷ୍ୟ ପ୍ରାପତ ହୋଇବ
ଜଗତେ ଜିତିବ ଯାଇ ॥
~~~~~~~~~~~~~~~~~~