କୃତଜ୍ଞତା ଜ୍ଞାପନ
ନବରଙ୍ଗପୁର ୦୫/୨୩: (ମସିହା)ରାଜ୍ୟପାଳ ପୁରସ୍କାରପ୍ରାପ୍ତ ଶିକ୍ଷୟିତ୍ରୀ ତଥା ପ୍ରାକ୍ତନ ଓଡ଼ିଶା ସାହିତ୍ୟ ଏକାଡେମୀ ସଦସ୍ୟା ଶ୍ରୀମତୀ ଜେମାମଣି ବିଷୋୟୀ ତାଙ୍କର ଚୋରିଯାଇଥିବା ସୁନାଚେନ୍ ଫେରିପାଇଥିବାରୁ ନବରଙ୍ଗପୁର, କୁନ୍ଦ୍ରା ଓ ଜୟପୁର ପୋଲିସ୍ଙ୍କୁ କୃତଜ୍ଞତା ଜ୍ଞାପନ କରିଛନ୍ତି । ସୂଚନାଯୋଗ୍ୟ ଯେ, ତିନିଜଣ ଦୁର୍ବୃତ୍ତ ଅଗଷ୍ଟ ୨୩ ତାରିଖ ଦିନ ୨:୪୫ରେ ଶ୍ରୀମତୀ ବିଷୋୟୀ ଘର ରାସ୍ତାରେ ଫେରୁଥିବାବେଳେ ପଛଆଡ଼ୁ ବେକରୁ ଦୁଇଟି ସୁନାଚେନ୍ ଝାମ୍ପି ନେଇଯାଇଥିଲେ । ସଙ୍ଗେ ସଙ୍ଗେ ଶ୍ରୀମତୀ ବିଷୋୟୀ ନିକଟସ୍ଥ ଥାନାରେ ଅଭିଯୋଗ କରିଥିଲେ । କେଶ୍ ନଂ ୩୫୮/୨୩ ବଳରେ ପୋଲିସ ରାତିଦିନ ପରିଶ୍ରମ କରି ଅଗଷ୍ଟ ୩୧ ତାରିଖରେ କୁନ୍ଦ୍ରାରୁ ତିନିଜଣଙ୍କୁ ଗିରଫ କରି ସୁନାଚେନ୍ ଉଦ୍ଧାର କରିଥିଲେ । ଆଜି ନବରଙ୍ଗପୁର ପୋଲିସ ଶ୍ରୀମତୀ ବିଷୋୟୀ ଙ୍କୁ ଥାନାକୁ ଡାକି ସୁନାଚେନ୍ ଦେଇଥିଲେ । ଗୁରୁଦିବସ ଭଳି ଏକ ପବିତ୍ର ଦିବସରେ ନିଜର ସୁନାଚେନ୍ ଫେରି ପାଇଥିବାରୁ ଶ୍ରୀମତୀ ବିଷୋୟୀ ନବରଙ୍ଗପୁରର ଆରକ୍ଷୀ ଅଧିକ୍ଷକ ମିସ୍ ଏସ୍. ସୁଶ୍ରୀ, ଉପ-ଆରକ୍ଷୀ ଅଧିକ୍ଷକ ଚନ୍ଦ୍ରଶେଖର ହୋତା, ଅତିରିକ୍ତ ଆରକ୍ଷୀ ଅଧିକ୍ଷକ ବଟକୃଷ୍ଣ ମିଶ୍ର, ନବରଙ୍ଗପୁର ଥାନାର ଏସ୍ଡିପିଓ ନିହାର ରଞ୍ଜନ ପ୍ରଧାନ, ଆଇଆଇସି ସମ୍ବିତ ବେହେରା, ପୋଲିସ ବାହିନୀ, ଥାନାର କର୍ମଚାରୀବୃନ୍ଦଙ୍କୁ ଧନ୍ୟବାଦ ଅର୍ପଣ କରିଛନ୍ତି । ମାତ୍ର ଅଳ୍ପଦିନରେ ଅପରାଧୀଙ୍କୁ ଧରିଥିବା ଯୋଗୁଁ ପୋଲିସ୍ ଉପରେ ଜନସାଧାରଣଙ୍କ ଆସ୍ଥା ନିଶ୍ଚୟ ବଢ଼ିବ ଏବଂ ନବରଙ୍ଗପୁରର ଶାନ୍ତିପୂର୍ଣ୍ଣ ଓ ସୌହାର୍ଦ୍ଦ୍ୟପୂର୍ଣ୍ଣ ବାତାବରଣ ଫେରାଇ ଆଣିବାରେ ପୋଲିସ୍ର ଏହି କାର୍ଯ୍ୟକୁ ନବରଙ୍ଗପୁରବାସୀ ନିଶ୍ଚୟ ମନେ ରଖିବେ ବୋଲି ଶ୍ରୀମତୀ ବିଷୟୀ କହିଛନ୍ତି । ଆଗାମୀ ଦିନରେ ଅପରାଧୀଙ୍କୁ ଧରିବା ନିମନ୍ତେ ପୋଲିସ୍କୁ ଜନସାଧାରଣ ସହଯୋଗ କରିବା ଉଚିତ ବୋଲି ସେ ମତ ରଖିଛନ୍ତି ।