ଜିଲ୍ଲାସ୍ତରୀୟ ସଞ୍ଚୟ ପକ୍ଷ ଉଦଯାପିତ
ରାୟଗଡ଼ା ତା.14/11 – ରାୟଗଡ଼ା ଜିଲ୍ଲା ସ୍ୱଳ୍ପ ସଞ୍ଚୟ ସଂସ୍ଥା ତରଫରୁ ସଞ୍ଚୟ ପକ୍ଷର ସମାପନ ସମାରୋହ ରାୟଗଡ଼ା ସ୍ବୟଂଶାସିତ ମହାବିଦ୍ୟାଳୟରେ ପାଳନ କରାଯାଇଅଛି | ସଂଚୟ ପକ୍ଷ ଅବସରରେ ଜିଲ୍ଲାବ୍ୟାପୀ ଆର୍ଥିକ ଅନ୍ତର୍ଭୁକ୍ତିକରଣ ଶିବିର ମାନ ଅନୁଷ୍ଠିତ କରାଯାଇ ଜନତାଙ୍କ ମଧ୍ୟରେ ଆର୍ଥିକ ସାକ୍ଷରତା ଓ ସଂଚୟର ଉପଯୋଗୀତା ଉପରେ ବାର୍ତା ଦିଆଯାଇଥିଲା | ସଚେତନତା ପାଇଁ ଏକ ବିଦ୍ୟାଳୟ ଓ ମହାବିଦ୍ୟାଳୟ ସ୍ତରୀୟ ଭାଷଣ ପ୍ରତିଯୋଗିତା ଅନୁଷ୍ଠିତ ହୋଇଥିଲା ଯେଉଁଥିରେ ପ୍ରତିଯୋଗୀମାନେ ସାନଶ୍ରେଣୀରେ “ଉଜ୍ଜ୍ୱଳ ଭବିଷ୍ୟତ ନିମନ୍ତେ ସଞ୍ଚୟ ର ଆବଶ୍ୟକତା” ଓ ଉଚ୍ଚଶ୍ରେଣୀରେ “ଭାରତୀୟ ପାଠ୍ୟକ୍ରମ ଖସଡାରେ ଆର୍ଥିକ ଶିକ୍ଷାର ଗୁରୁତ୍ୱ” ଉପରେ ନିଜର ପ୍ରତିଭାଶିଳ ବକ୍ତବ୍ୟ ରଖି ବିଭିନ୍ନ ଆର୍ଥିକ ଦୃଷ୍ଟିକୋଣକୁ ଲୋକାଲୋଚନକୁ ଆଣିଥିଲେ ଓ ତନ୍ମଧ୍ୟରୁ କୃତି ପ୍ରତିଯୋଗୀଙ୍କୁ ପୁରସ୍କୃତ କରାଗଲା | କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବରେ ମହାବିଦ୍ୟାଳୟର ପ୍ରଧାନ ଅଧ୍ୟାପିକା ଶ୍ରୀମତୀ ବବିଲତା ସରାଫ ଯୋଗଦାନ କରିଥିଲେ ଓ ଉପସ୍ଥିତ ଛାତ୍ରଛାତ୍ରୀ, ଏଜେଣ୍ଟ ଓ ସାଧାରଣ ଜନତାଙ୍କୁ ରାଷ୍ଟ୍ରୀୟ ଅର୍ଥନୀତିରେ କିପରି ସଞ୍ଚୟ ଏକ ଅଗ୍ରିମ ଭୂମିକା ନିର୍ବାହ କରିଛି ପ୍ରଗତି ପାଇଁ, ତାହା ବୁଝାଇଥିଲେ | ମୁଖ୍ୟବକ୍ତା ଭାବେ ଶ୍ରୀ ସାଇ ମାଧବ, ଅର୍ଥନୀତିଶାସ୍ତ୍ର ବିଭାଗ ମୁଖ୍ୟ, ଅନ୍ତରାଷ୍ଟ୍ରୀୟ ଅର୍ଥନୀତି ରୁ ନେଇକି ଆଖପାଖର ଅର୍ଥନୀତି ରେ କିପରି ସଂଚୟ ଦ୍ୱାରା ଜନତା ଦେଶ ଓ ସମାଜ ଉପକୃତ ହୁଏ ତାହା ପ୍ରାଞ୍ଜଳ ଭାବରେ ଦର୍ଶାଇଥିଲେ | ଉପଜିଲ୍ଲା ସାମାଜିକ ସୁରକ୍ଷା ଅଧିକାରୀ ଶ୍ରୀକାନ୍ତ ପାଣିଗ୍ରାହୀ ସଂଚୟ ଓ ସାମାଜିକ ସୁରକ୍ଷା ଭିତରେ ଥିବା ସମ୍ପର୍କକୁ ଉଜାଗର କରିଥିଲେ | ଭାରପ୍ରାପ୍ତ ଜିଲ୍ଲା ଆର୍ଥିକ ସେବା ଓ ସଂଚୟ ଅଧିକାରୀ ଶ୍ରୀ ବିଠଲ ନୀଳୋତ୍ପଳ ଷଡ଼ଙ୍ଗୀ ତାଙ୍କ ବକ୍ତବ୍ୟରେ ସ୍ୱଳ୍ପ ସଂଚୟ ଯୋଜନା ଓ ଭାରତୀୟ ରିଜର୍ଭ ବ୍ୟାଙ୍କ ଦ୍ୱାରା ଜାରିକରାଯାଇଥିବା ଜନହିତକାରୀ ପଦକ୍ଷେପ ଉପରେ ଜଣାଇଥିଲେ | ଇଂଗ୍ରାଜ଼ୀ ଅଧ୍ୟାପକ ଶ୍ରୀନିବାସ ଆଚାର୍ଯ୍ୟ କାର୍ଯ୍ୟକ୍ରମ କୁ ସଂଚାଳନ କରିଥିଲେ ଓ ତାଙ୍କ ମନ୍ତବ୍ୟ ଉପସ୍ଥାପନା କରିଥିଲେ |
ରାୟଗଡ଼ା ରୁ ଗୌରୀ ପଟ୍ଟନାୟକ ଙ୍କ ରିପୋର୍ଟ୍
