ବର୍ଷ ସାରା ରାସ୍ତାରେ ବହୁଛି ଆବର୍ଜନା ପାଣି, ସୋକ୍ ପିଟ୍ କେଉଁ କାମକୁ
କାମାକ୍ଷାନଗର (ମନିସ )1/2/24 // କାମାକ୍ଷାନଗର ୧୦ ନମ୍ବର ଓ୍ବାର୍ଡରେ ପାନୀୟ ଜଳ ସମସ୍ୟା ଦୀର୍ଘ ବର୍ଷର । ଲୋକଙ୍କ ସୁବିଧା ପାଇଁ ମଙ୍ଗଳା ମନ୍ଦିର ଛକ ନିକଟରେ ନଳକୂପ ନିର୍ମାଣ ହୋଇଛି । ହେଲେ ଦୁଃଖର କଥା ନଳକୂପରୁ ବହାରୁଥିବା ବଳକା ପାଣି ଯିବାକୁ ବାଟ ହିଁ ନାହିଁ । ବର୍ଷ ତମାମ୍ ଏମିତି ରାସ୍ତା ଉପରେ ଲୋକଙ୍କ ଗାଧୁଆ ପାଣି ରାସ୍ତାରେ ଗଡୁଛି । ଫଳରେ ଘରୋଇ ବ୍ୟବହାର ପାଇଁ ଲୋକେ ପାଣି ନେବା ବେଳକୁ ଅସନ୍ତୋଷ ପ୍ରକାଶ କରୁଛନ୍ତି । ଶରଧାପୁର ସାହିରେ ନଳକୂପ ବସିବା ପରେ ଏହି ବର୍ଯ୍ୟ ଜଳ ନିଷ୍କାସନ ପାଇଁ ସୋକ୍ ପିଟ୍ ହୋଇଥିଲା । ହେଲେ ଏହା ମାସେ ବି କାମକୁ ଆସିନି । ନଳକୂପ ନିକଟରେ ସୋକପିଟ୍ ନାହିଁ । ରାସ୍ତା ସେପଟେ ରହିଛି । ନଳକୂପ ଠାରୁ ସୋକପିଟକୁ ଯାଇଥିବ ସୋକପିଟ୍ ଏକ ଛୋଟିଆ ସରୁ ନାଳ ଦ୍ବାରା ଯୋଡି ହୋଇଥିଲା । ଏହାର ଛୋଟିଆ ମୁହଁଟି ମାଟି ଗୋଡି ପଶି ବନ୍ଦ ହେବା ପରେ ପୁରା ବିକଳ ସ୍ଥିତି । ୧୦ ନମ୍ବର ଓ୍ବାର୍ଡ କାଉନସିଲରଙ୍କ ଠାରୁ ଆରମ୍ଭ କରି ଏନଏସି ଯାଏ ଯୋଗାଯୋଗ କରାଯାଇଥିଲେ ମଧ୍ୟ କିଛି ଫଳ ମିଳୁନଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ ।
ପ୍ରାୟ ଦେଢ ବର୍ଷରୁ ଅଧିକ ସମୟ ହେଲାଣି ଏମିତି ସ୍ଥିତିରେ ଅଚଳ ସୋକପିଟ୍ । ରାସ୍ତାରେ ଗଡୁଛି ନଳକୂପର ବଳକା ପାଣି । ଯଦି ପ୍ରଶାସନ ଏଥିପ୍ରତି ଧ୍ୟାନ ଦେଇ ଏକ ମୋଟା ପାଇପ ଜରିଆରେ ସୋକପିଟ୍ ସହ ସଂଯୋଗ ବ୍ୟବସ୍ଥା କରାନ୍ତା, ତେବେ ସମସ୍ୟା ସମାଧାନ ହେବ ବୋଲି ଲୋକେ କହିଛନ୍ତି । ଏହି ନଳକୂପ ଉପରେ ଆଖପାଖ ୨୦ଟି ଘର ନିର୍ଭର କରୁଛନ୍ତି । କିନ୍ତୁ ଏହି ଅବସ୍ଥା କାରଣରୁ ଲୋକେ ବି ପାଣି ବ୍ୟବହାର କରିବାକୁ ଆସିବା ସମୟରେ ଅନେକ ସମୟରେ ରାସ୍ତାକୁ ପାଣି ଆସିବାକୁ ନେଇ କଳିଗୋଳ ଦେଖା ଦେଉଛି । କିଏ ଏହାର ସମାଧାନ କରିବ, କେବେ କରିବ ସେହି ଅପେକ୍ଷାରେ ଶରଧାପୁର ଗ୍ରାମବାସୀ ।
ଶରଧାପୁରକୁ ଯାଇଥିବା ପାଇପ ଯୋଗାଣରେ ବି ଅନେକ ସ୍ଥାନରେ ଫାଟ ହୋଇ ରାସ୍ତାରେ ପାଣି ଗଡୁଛି । ମଙ୍ଗଳା ମନ୍ଦିର ସାମ୍ନାରେ ୩ଟି ସ୍ଥାନରେ ଫାଟ ଫଳରେ ଅନେକ ପାଣି ଅକାରଣରେ ରସ୍ତାରେ ଗଡୁଛି । ଫଳରେ ଲୋକେ ସ୍ବଚ୍ଛ ପାଣି ମୁନ୍ଦାଏ ନପାଇ ହନ୍ତସନ୍ତ ହେଉଛନ୍ତି । ପିଏଚଡି ଅଫିସକୁ ଲୋକେ ଜଣାଇଲେ, ଏହାକୁ ବ୍ୟକ୍ତିଗତ ମରାମତି ପାଇଁ ଜେଇ ମହାଶୟ କହୁଛନ୍ତି । ଯାହାକୁ ନେଇ ଲୋକେ ଅସନ୍ତୋଷ ପ୍ରକାଶ କରିଛନ୍ତି ।
ପ୍ରହ୍ଲାଦ ମୁଦୁଲିଙ୍କ ରିପୋର୍ଟ
