ଯୌତୁକ ପାଇଁ ବଧୁ ହତ୍ୟା ଅଭିଯୋଗ : ବାରି ପଛ ପଟୁ ସ୍ୱାମୀଙ୍କୁ ଗିରଫ କଲା ପୋଲିସ
କେନ୍ଦ୍ରାପଡା ଜିଲ୍ଲା ପଟ୍ଟାମୁଣ୍ଡାଇ ଥାନା ଅନ୍ତର୍ଗତ ପୌରାଂଚଳର ଅଳଭା ଗ୍ରାମରେ ଏକ ଅଭାବନୀୟ ଘଟଣା ଘଟିଥିବା ସାମ୍ନାକୁ ଆସିଛି । ସେଠାରେ ଯୌତୁକ ପାଇଁ ବଧୁହତ୍ୟା କରାଯାଇଥିବା ଅଭିଯୋଗ ହୋଇଛି । ବଡମହନପୁର ପଂଚାୟତ ସାନମହନପୁର ଗ୍ରାମର ଧରଣୀଧର ବେହେରାଙ୍କ ଝିଅ ସୁକାନ୍ତି ପାତ୍ର (୩୩) ଙ୍କୁ ଯୌତୁକ ପାଇଁ ହତ୍ୟା କରାଯାଇଥିବା ପରିବାର ପକ୍ଷରୁ ଅଭିଯୋଗ ହୋଇଛି । ପଟ୍ଟାମୁଣ୍ଡାଇ ଆଦର୍ଶ ଥାନାରେ ଏହି ମାମଲା ରୁଜୁ ହେବା ସହ ପୋଲିସ ସ୍ୱାମି ବବ୍ରୁବାହନକୁ ଅଟକ ରଖି ଘଟଣାର ତଦନ୍ତ ଜାରି ରଖିଛି ।
ଯୌତୁକ ପାଇଁ ବଧୁ ହତ୍ୟା ଅଭିଯୋଗ : ସ୍ୱାମୀ ଗିରଫ ଅଭିଯୋଗ ଅନୁଯାଇ ପଟ୍ଟାମୁଣ୍ଡାଇ ଗ୍ରାମାଂଚଳ ଥାନା ଅଧିନ ସାନମହନପୁର ଗ୍ରାମର ଧରଣୀଧରଙ୍କ ଝିଅ ସୁକାନ୍ତି ଅଳଭା ଗ୍ରାମର ମହେଶ୍ୱର ପାତ୍ରଙ୍କ ପୁଅ ବବ୍ରୁବାହନ ପାତ୍ରଙ୍କୁ ଗତ ୧୩ ବର୍ଷ ପୂର୍ବେ ପ୍ରେମ ବିବାହ କରିଥିଲେ । ସେମାନଙ୍କର ଗୋଟିଏ ୧୧ ବର୍ଷର ଝିଅ ଓ ଗୋଟିଏ ଛଅ ବର୍ଷର ପୁଅ ଅଛି । ତେବେ ପାରିବାରିକ ଘଟଣାକୁ ନେଇ ପ୍ରାୟତଃ ସ୍ୱାମୀ -ସ୍ତ୍ରୀ ମଧ୍ୟରେ କଳହ ଲାଗିରହୁଥିଲା । ଯୌତୁକ ବାବଦକୁ ନଗଦ ଟଙ୍କା ଆଣିବା ପାଇଁ ସୁକାନ୍ତି ଉପରରେ ଚାପ ପକାଯାଉଥିଲା । ଏହାକୁ ନେଇ ଉଭୟ ପରିବାର ମଧ୍ୟରେ ଆଲୋଚନା କରାଯାଇ ସମାଧାନ ମଧ୍ୟ ହୋଇଥିଲା । ଗତକାଲି ରାତିରେ କୌଣସି କାରଣରୁ ସ୍ୱାମୀ ସ୍ତ୍ରୀଙ୍କ ମଧ୍ୟରେ କଳହ ଉଗ୍ର ରୂପ ଧାରଣ କରିଥିଲା । ଯାହାଫଳରେ ସ୍ୱାମୀ ବାବ୍ରୁବାହନ ପ୍ରତିକ୍ରିୟାଶୀଳ ହୋଇ ସ୍ତ୍ରୀ ସୁକାନ୍ତିଙ୍କୁ ପିଟି ପିଟି ଜୀବନରୁ ମାରିଦେଇଥିବା ନେଇ ମୃତା ସୁକାନ୍ତିଙ୍କ ବାପା ଧରଣୀଧର ବେହେରା ପଟ୍ଟାମୁଣ୍ଡାଇ ଆଦର୍ଶ ଥାନାରେ ଲିଖିତ ଅଭିଯୋଗ କରିଛନ୍ତି । ଏହାର ନିରପେକ୍ଷ ତଦନ୍ତ ସହ ଅଭିଯୁକ୍ତଙ୍କୁ ଗିରଫ କରାଯାଉ ବୋଲି ପୋଲିସ ନିକଟରେ ନିବେଦନ କରିଥିଲେ । ଏହି ଅଭିଯୋଗପତ୍ରରେ ଧରଣୀଧର ବିବାହ ପରଠାରୁ ଝିଅକୁ ମାନସିକ, ଶାରୀରିକ ଓ ଯୌତୁକ ଜନିତ ନିର୍ଯାତନା ଦିଆଯାଉଥିବା ସମ୍ପର୍କରେ ଉଲ୍ଲେଖ କରିଛନ୍ତି । ମୃତା ସୁକାନ୍ତିଙ୍କ ବାପା ଧରଣୀଧରଙ୍କ ଏତଲା ପାଇବା ପରେ ପଟ୍ଟାମୁଣ୍ଡାଇ ଆଦର୍ଶ ଥାନା ପୋଲିସ ଓ ସାଇଂଟିଫିକ ଟିମ ଘଟଣାସ୍ଥଳରେ ପହଁଚି ମୃତା ମହିଳାଙ୍କ ଶବ ଜବତ କରିବା ସହ ବିଭିନ୍ନ ଦିଗକୁ ନେଇ ତଦନ୍ତ ଆରମ୍ଭ କରିଛି । ସ୍ଥାନୀୟ ପୋଲିସ ବାଡ଼ି ପଛପଟ କେନାଲ ବୁଦା ମୂଳରେ ଲୁଚିଥିବା ସ୍ୱାମୀ ବାବ୍ରୁବାହନକୁ ଧରିଆଣି ଥାନାରେ ଅଟକ ରଖି ପଚରାଉଚୁରା କରୁଛି । ଏହି ଘଟଣା ସ୍ଥାନୀୟ ଅଂଚଳରେ ଆଲୋଡନ ସୃଷ୍ଟି କରିଛି।