ଧନ୍ୟ ହେ ଠାକୁରେ ଧନ୍ୟ ତୁମ ଲୀଳା
ଧନ୍ୟ ହେ ଠାକୁରେ ଧନ୍ୟ ତୁମ ଲୀଳା
ଧନ୍ୟ ତୁମ କରାମତି
ସୃଷ୍ଟି ଭିଆଇଛ ସଂଯୋଗ କରିଛ
ବିଚ୍ଛେଦେ ଦେଇଛ ମତି ।
ଲୀଳାମୟ ତୁମେ ଲୀଳାର ପ୍ରକାଶ
ଅହରହ କରୁଅଛ
ଦୁଃଖ ସୁଖ ଭଳି ମହୋଷଧି ଧରି
ଜଗତକୁ ଚଳାଇଛ ।
ଋଣ ଶୁଝିବାକୁ ସମ୍ପର୍କ ଗଢିଛ
ଭିନ୍ନ ଭିନ୍ନ ରୂପ ଦେଇ
ଋଣ ସୁଝିଗଲେ ଫେରାଇ ନେଉଛ
ନୂତନ ମାର୍ଗ ବତାଇ ।
ଛାଇ ଆଲୋଅର ଖେଳ ଖେଳାଉଛ
ହେ ପ୍ରଭୁ ଜଗତ ସାଇଁ
ରାଗ ଅଭିମାନ ତୁମରି ଭିଆଣ
ସମ୍ପର୍କ ସୁଦୃଢ଼ ପାଇଁ ।
ଆସନ୍ତି ମରତେ ଜୀବ ଭିନ୍ନ ରୂପେ
ଭିନ୍ନାଭିନ୍ନ ମତ ନେଇ
ତୁମରି ଇଙ୍ଗିତେ କର୍ମ ଆଚରନ୍ତି
ତୁମ ପାଦେ ମଥା ଥୋଇ ।
ଜ୍ଞାନ ଗୁଣ ଦେଇ ସୃଜିଛ ମାନବ
ତୁମ ସୃଷ୍ଟି ରକ୍ଷା ପାଇଁ
ଅଜ୍ଞାନୀ ମାନବ ଧ୍ବଂସ ଆଚରୁଛି
ନିଜ ନିଜ ସ୍ୱାର୍ଥେ ଧାଇଁ ।
ଚମତ୍କାର ତୁମ ସଂଯୋଗ ବିଯୋଗ
ଚମତ୍କାର ତୁମ ଲୀଳା
କାହାକୁ ଯୋଡୁଛ କାହାକୁ ଭାଙ୍ଗୁଛ
ଚମତ୍କାର ତୁମ ଭେଳା ।
ସମୟ ସ୍ରୋତରେ ଗତି କରାଉଛ
ସମୟକୁ ସାକ୍ଷୀ ରଖି
ସମୟର ମୂଲ୍ୟ ନ ବୁଝେ ମାନବ
ସ୍ୱାର୍ଥରେ ତାହାର ଆଖି ।
ଗର୍ବ ବଡ଼ପଣ ସବୁ ଅକାରଣ
କାରଣକୁ ଯିଏ ଛାଡେ
ଆଦେଖା ଦଉଡ଼ି ବ୍ରହ୍ମାଣ୍ଡ ଜୀବଙ୍କୁ
ନିଜ କର୍ମପଥେ ଭିଡ ।
କାରଣ କାରକ ତୁମେ ମହାପ୍ରଭୁ
ଜଗତ ଉଦ୍ଧାର କର
ସମ୍ପର୍କର ଡୋର ତୁମ ଠାରେ ଥାଉ
ଅହଂଭାଵ କର ଦୂର ।
ଜୟ ଶ୍ରୀଜଗନ୍ନାଥ………
ରଞ୍ଜନ କୁମାର ପଣ୍ଡା
କୋରାପୁଟ
