ସରକାର ବଦଳିଲା ହେଲେ ସୁଧୁରୁ ନାହିଁ ରାସ୍ତା ଅବସ୍ଥା, ଦୃଷ୍ଟି ପଡିବ କି ବିଧାୟକ ?
ଖଇରା,୧୮/୭/୨୪- ଧାରଣା ଥିଲା ସରକାର ବଦଳିଲେ ଜନସାଧାରଣଙ୍କ ସମସ୍ୟା ଦୂର ହେବ ହେଲେ କ’ଣ ହେବ ସରକାର ବଦଳିଲା ସତ କିନ୍ତୁ ବାଲେଶ୍ଵର ଜିଲ୍ଲା ଖଇରା ବ୍ଲକ ଆଳଦା ଛକ ଠାରୁ ଡୁଙ୍ଗୁରା ପର୍ଯ୍ୟନ୍ତ ଯାଇଥିବା ରାସ୍ତାର ଅବସ୍ଥା ସୁଧୁରୁ ନାହିଁ । ପୂର୍ବ ସରକାର ସମୟରେ ଏ ବିଷୟରେ ବାରମ୍ବାର ଗଣମାଧ୍ୟମରେ ଖବର ପ୍ରଚାର ପ୍ରସାର ପରେ ମଧ୍ୟ ସେତେବେଳର ବିଧାୟକ ଜ୍ଯୋତିପ୍ରକାଶ ପାଣିଗ୍ରାହୀ ଏଥିପ୍ରତି ଦୃଷ୍ଟି ଦେଲେ ନାହିଁ । ବହୁ ଅଭିଯୋଗ ପରେ କାମ ଆରମ୍ଭ ହୋଇଥିଲା ସତ କିନ୍ତୁ ଅଧାରୁ ଠିକାଦାର ମାରିଲେ ଚମ୍ପଟ । ସମସ୍ୟା ସମସ୍ୟାରେ ହିଁ ରହିଗଲା । ଦୁଃଖିନୀ ଖଇରା କହି କହି ପାଣିଗ୍ରାହୀ ବିଧାୟକରୁ ବିଦା ହେଲେ ଆସିଲେ ପଦ୍ମଲୋଚନ ପଣ୍ଡା । ଶ୍ରୀ ପଣ୍ଡା ପୂର୍ବରୁ ମଧ୍ୟ ବିଧାୟକ ଥିଲେ ଏବେ ମଧ୍ୟ ଅଛନ୍ତି । ତାଙ୍କ ନିକଟରେ ଅଭିଯୋଗ ମଧ୍ୟ ହେଉଛି ହେଲେ ଶ୍ରୀ ପଣ୍ଡା ଦୁଃଖିନୀ ଖଇରା କହି ଖଇରା ବାସୀଙ୍କୁ ଦୁଃଖ ଦେବାକୁ ପଛାଉ ନାହାନ୍ତି । ଆହୁରି ମଧ୍ୟ କହୁଛନ୍ତି ଓଡିଶା ମାନଚିତ୍ରରେ ଖଇରା ବ୍ଲକର ସ୍ଥାନ ନାହିଁ । ଖଇରା ବ୍ଲକର ଉନ୍ନତି କରିବାକୁ ହେଲେ ପ୍ରଥମେ ମାନଚିତ୍ରକୁ ଆଣିବାକୁ ପଡିବ । ଏଠାରେ ବିଧାୟକ ଶ୍ରୀ ପଣ୍ଡାଙ୍କୁ ଗୋଟିଏ ପ୍ରଶ୍ନ – ହେ ବିଧାୟକ ମହୋଦୟ, ଆପଣ ଯେତେବେଳେ କଂଗ୍ରେସ ଦଳରେ ବିଧାୟକ ଥିଲେ ଓ ରାଜ୍ୟରେ କଂଗ୍ରେସ ସରକାର ଥିଲା ସେତେବେଳେ ମାନଚିତ୍ରରେ ଖଇରା ବ୍ଲକର ସ୍ଥାନ ଥିଲା । ବର୍ତ୍ତମାନ ବିଜେପି ଦଳରେ ବିଧାୟକ ହେଲା ପରେ ମାନଚିତ୍ରରୁ ଖଇରା ବ୍ଲକ ହଟିଲା କେମିତି ? ସେତେବେଳେ ଦୁଃଖିନୀ ଖଇରାର ଉନ୍ନତି ଚିନ୍ତା କରୁଥିଲେ କିପରି ? ଉନ୍ନତି ନାଁ ଆସୁଥିବା ଅର୍ଥ ହେଉଥିଲା କ’ଣ ? ଜବାବ ଦିଅନ୍ତୁ ବିଧାୟକ ମହୋଦୟ । ଅଞ୍ଚଳବାସୀ ବହୁ ଚିନ୍ତାକରି ସରକାର ବଦଳ ନିମନ୍ତେ ଆପଣଙ୍କୁ ଭୋଟ ଦେଲେ ସରକାର ବଦଳି ଗଲା, ହେଲେ ତା’ର ଫଳ କ’ଣ ଏଇଆ ଯେ ସେହି ଖରାପ ରାସ୍ତାରେ ଚାଲିବା । ବାରମ୍ବାର ସିମୁଳିଆ ନେତା ବିଧାୟକ ହେଉଥିବାରୁ ଖଇରା ବ୍ଲକକୁ ମାନଚିତ୍ରରୁ ଲିଭାଇବା ଚିନ୍ତା କରୁ ନାହାନ୍ତି ତ ? କ’ଣ ପାଇଁ ପଡୁନି ବିଧାୟକଙ୍କ ଦୃଷ୍ଟି ? ଯାହା ଜନସାଧାରଣଙ୍କ ମଧ୍ୟରେ ଆଲୋଚନା ହେଉଥିବାର ରିପୋର୍ଟ ସଂଗ୍ରହରୁ ଜଣା ଯାଇଛି । ଜନସାଧାରଣଙ୍କ ଦାବି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏଥିପ୍ରତି ସୁଦୃଷ୍ଟି ଦିଅନ୍ତୁ ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
