ପାଉଡର ମେଟାଲରଜି ଆଣ୍ଡ ସ୍ମାର୍ଟ୍ ମ୍ୟାଟେରିଆଲ ଉପରେ କର୍ମଶାଳା
ରାଉରକେଲା : ଇନଷ୍ଟିଚ୍ୟୁସନ୍ ଅଫ୍ ଇଞ୍ଜିନିୟର୍ସ (ଭାରତ), ରାଉରକେଲା ର ସ୍ଥାନୀୟ କେନ୍ଦ୍ରଠାରେ “ପାଉଡର ମେଟାଲରଜି ଆଣ୍ଡ ସ୍ମାର୍ଟ ମ୍ୟାଟେରିଆଲ” ଥିମ୍ ଉପରେ ଏକ ସର୍ବ ଭାରତୀୟ ଏକ ଦିନିଆ କର୍ମଶାଳା ଆୟୋଜିତ 
ହୋଇଥିଲା। ଉଦ୍ଘାଟନୀ କାର୍ଯ୍ୟ ଦୀପ ପ୍ରଜ୍ଵଳନ ଏବଂ ମାନ୍ୟଗଣ୍ୟ ବ୍ୟକ୍ତିଙ୍କୁ ପୁଷ୍ପଗୁଚ୍ଛ ପ୍ରଦାନ ସହିତ ଆରମ୍ଭ ହୋଇଥିଲା। ଅଧ୍ୟକ୍ଷ ଇଂ ସନ୍ତୋଷ କୁମାର ପୋଲାକି ସ୍ୱାଗତ ଭାଷଣ ପ୍ରଦାନ କରିଥିଲେ। ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲଜି, ରାଉରକେଲା ର ଉକ୍ତ ବିଷୟର ବିଭାଗୀୟ ମୁଖ୍ୟ ପ୍ରଫେସର ଡା. ଦେବାଶିସ ଚାଏରା ମୁଖ୍ୟ ଅତିଥି 
ଭାବରେ ଯୋଗଦାନ ଦେଇଥିଲେ। ସଂଯୋଜକ, ଡା. ସ୍ଵାଧୀନ ପଟେଲ କର୍ମଶାଳା ର ସଂକ୍ଷିପ୍ତ ବିବରଣୀ ଉପସ୍ଥାପନ କରିଥିଲେ। ଉଦ୍ଘାଟନୀ କାର୍ଯ୍ୟ ଶେଷରେ ଅଧ୍ୟକ୍ଷ ଇଂ. ପୋଲାକି ମୁଖ୍ୟ ଅତିଥି ପ୍ରଫେସର ଦେବାଶିସ ଙ୍କୁ ସମ୍ମାନ ଏବଂ ସଫଳତା ପାଇଁ ଅଭିନନ୍ଦନ ଜଣାଇଥିଲେ। ଆୟୋଜକ ସଚିବ ଡ଼ଃ ଅଜିତ ବେହେରା ଧନ୍ୟବାଦ ଅର୍ପଣ କରିଥିଲେ। କର୍ମଶାଳାର ଉଦ୍ଘାଟନୀ ଅଧିବେଶନରେ ୩୪ ଜଣ ସଦସ୍ୟ ଏବଂ ଅତିଥି ଅଂଶଗ୍ରହଣ କରିଥିଲେ। ଦ୍ବିତୀୟ ପର୍ଯ୍ୟାୟ ପୂର୍ବାହ୍ନ ଏବଂ ଅପରାହ୍ନରେ ଅଧିବେଶନରେ ସମୁଦାୟ ୬ ଟି ଅନୁସନ୍ଧାନ ପ୍ରବନ୍ଧ ଉପସ୍ଥାପିତ ହୋଇଥିଲା। ଏହା ବ୍ୟତୀତ ଖ୍ୟାତିସମ୍ପନ୍ନ ଶିକ୍ଷାନୁଷ୍ଠାନ ଏବଂ ଶିଳ୍ପାଞ୍ଚଳ ର ବିଶିଷ୍ଟ ବ୍ୟକ୍ତିବିଶେଷଙ୍କ ଦ୍ୱାରା ୩ ଟି ମୁଖ୍ୟ ବକ୍ତବ୍ୟ ମଧ୍ୟ ପ୍ରଦାନ କରାଯାଇଥିଲା। ଏହା ବ୍ୟତୀତ, ପୋଷ୍ଟର ଅଧିବେଶନରେ, ବିଭିନ୍ନ ସବ୍-ଥିମ୍ ସହିତ ଜଡିତ ପୋଷ୍ଟରଗୁଡିକ ଇଞ୍ଜିନିୟରିଂ ଛାତ୍ରମାନଙ୍କ ଦ୍ୱାରା ପ୍ରଦର୍ଶିତ ହୋଇଥିଲା ଯାହା ସମ୍ପୃକ୍ତ କ୍ଷେତ୍ରର ବିଶେଷଜ୍ଞମାନଙ୍କ ଦ୍ୱାରା ମୂଲ୍ୟାଙ୍କନ କରାଯାଇଥିଲା। ବୈଷୟିକ ଅଧିବେଶନଗୁଡିକ ସମ୍ପୃକ୍ତ କ୍ଷେତ୍ରର ବିଶିଷ୍ଟ ବିଶେଷଜ୍ଞମାନଙ୍କ ଦ୍ୱାରା ପରିଚାଳିତ ହୋଇଥିଲା। ଶେଷ ଅଧିବେଶନରେ, “ପାଉଡର ମେଟାଲରଜି ଆଣ୍ଡ ସ୍ମାର୍ଟ ମ୍ୟାଟେରିଆଲ” ର ବିଭିନ୍ନ ଉପ-ଥିମ୍ ର ଆଲୋଚନାରୁ ଅନେକ ସୁପାରିଶ ଏବଂ ପରାମର୍ଶ ପ୍ରଦାନ କରାଯାଇଥିଲା।
ରାଉରକେଲା ରୁ କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
