ଭତ୍ତା ଟଙ୍କା ହେରଫେର ଅଭିଯୋଗ
ବଲାଙ୍ଗୀର : ବଲାଙ୍ଗିର ଜିଲ୍ଲା ଖପ୍ରାଖୋଲ ବ୍ଲକ ସାହାଜପାଣି ପଞ୍ଚାୟତ ଅନ୍ତର୍ଗତ ଫୁଲକିମୁଣ୍ଡା ଏବଂ ବାଗଡିଆ ଗ୍ରାମବାସି ଗତ ଫେବୃଆରୀ ମାସର ବାର୍ଦ୍ଧକ୍ୟ ଭତ୍ତା, ବିକଳାଙ୍ଗ ଭତ୍ତା ଓ ବିଧବା ମହିଳା ଭତ୍ତା ପାଇ ନ ଥିବା ଅଭିଯୋଗ କରିଛନ୍ତି। ସୂଚନା ଅନୁଯାୟୀ ସାହାଜପାଣି ପଞ୍ଚାୟତ କାର୍ଯ୍ୟ ନିର୍ବାହୀ ଅଧିକାରୀ ନୀଳାମ୍ବର ମାଝୀ ହିତାଧିକାରୀ ମାନଙ୍କ ଭତ୍ତା ଟଙ୍କା ଉଠାଇ ବାଣ୍ଟିବା ପାଇଁ ପଞ୍ଚାୟତ କାର୍ଯ୍ୟାଳୟକୁ ଯାଇଥିଲେ । ସେ ସମୟରେ ତାଙ୍କର ପୁତୁରାଙ୍କ ମୃତ୍ୟୁ ହୋଇଥିବା ଖବର ପାଇ ସାହାଜପାଣି ପଞ୍ଚାୟତ ସରପଞ୍ଚ ପ୍ରଫୁଲ୍ଲ ମାଝୀଙ୍କୁ ଭତ୍ତା ବାଣ୍ଟିବାର ଦାୟିତ୍ୱ ଦେବା ସହ ୩ ଲକ୍ଷ ୩୭ ହଜାର ଟଙ୍କା ଦେଇଥିବା ପ୍ରକାଶ କରିଛନ୍ତି । ସରପଞ୍ଚ ମାଝୀ ନିଜଗାଁ ସାହାଜପାଣି ଏବଂ ସୁଲିଆବାହାଲ ଗ୍ରାମରେ ଭତ୍ତା ଟଙ୍କା ହିତାଧିକାରୀଙ୍କୁ ବାଣ୍ଟିଦେଇଥିଲେ କିନ୍ତୁ ଫୁଲକିମୁଣ୍ଡା ଏବଂ ବାଗଡିଆ ଗ୍ରାମର ହିତାଧିକାରୀଙ୍କୁ ଭତ୍ତା ନଦେଇ ସେମାନଙ୍କ ଭତ୍ତା ଟଙ୍କା ପାଖାପାଖି ୧ ଲକ୍ଷ ୮୦ ହଜାର ଟଙ୍କା ହଡପ କରିନେଇଥିବା ହିତାଧିକାରୀମାନେ ଅଭିଯୋଗ କରିଛନ୍ତି । ହିତାଧିକାରୀମାନେ ବାରମ୍ବାର ବ୍ଲକ କାର୍ଯ୍ୟାଳୟକୁ ଆସି ଅଭିଯୋଗ କଲେ ମଧ୍ୟ ତାଙ୍କ ଗୁହାରୀ କେହି ଶୁଣୁ ନାହାନ୍ତି ବୋଲି କହିଛନ୍ତି । ଏନେଇ ବ୍ଲକ ବିଏସ୍ଏସ୍ଓ କନିଷ୍କ ବିଭାରଙ୍କୁ ଫୋନ ଯୋଗେ ଯୋଗାଯୋଗ କରିଥିଲେ ମଧ୍ୟ ସେ ଫୋନ ଉଠାଇ ନଥିଲେ । ହିତାଧିକାରୀମାନେ ଭତ୍ତା ଟଙ୍କା ପାଇବାରେ ଅସୁବିଧାର ସମ୍ମୁଖୀନ ହେଉଛନ୍ତି । ପ୍ରଶାସନ ଏଥି ପ୍ରତି ଦୃଷ୍ଟି ଦେଇ ଦୋଷୀଙ୍କ ବିରୋଧରେ ଉଚିତ୍ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି କରିଛନ୍ତି ।
ଦୁର୍ଯୋଧନ ବର୍ଗେ ଙ୍କ ରିପୋର୍ଟ୍
