ମାଆନାମ ମଧୁଝରା
ଶ୍ରୀରାମ ସାହୁ
ମାଆ ମୋ ମମତାମୟୀ ସ୍ନେହମୟୀ
କରୁଣାର ବାରିଧାରା।
ବୁଦ୍ଧିଜ୍ଞାନ ଦାତ୍ରୀ ଅଭୟ ଦାୟିନୀ
ଅଟଇ ସୁଖ ପସରା.. ..।୦।
ତା ପଣତକାନି ତଳେ ରହିଥିଲେ
ଜମାଡର ଲାଗେନାହିଁ।
ବାଧାବିଘ୍ନ ଯେତେ ଆସୁ ଜୀବନରେ
ପଛଘୁଞ୍ଚା ଦିଏନାହିଁ।
ଶତ ସିଂହବଳ ଜାଗ୍ରତ ହୁଅଇ
ମାଆନାମେ ଦିହସାରା…।୧।
ପାଳିପୋଷି ମୋତେ ମଣିଷ କରିଛି
ସବୁଦୁଃଖ କଷ୍ଟସହି।
ଖାଇବା ଚାଲିବା କଥା କହିବାରେ
ମାଆସମ ଗୁରୁନାହିଁ।
କିଏ କେବେ ତାର ଋଣକି ଶୁଝିବ
ମାଆ ହୃଦୟ ନିଆରା…..।୨।
ମାତୃ ଦିବସରେ ମାଆଙ୍କୁ ପୂଜିବା
ଲଭିବା ତାର ଆଶିଷ।
ସରଗଠୁ ବଳି ମାଆ ଗରୀୟସି
ମିଳିବ ମନେ ସନ୍ତୋଷ।
ଆଶୀର୍ବାଦ ନେଇ ହୋଇବା ଦୀର୍ଘାୟୁ
ମାଆନାମ ମଧୁଝରା….।୩।
ଫୁଲବାଣୀ।କନ୍ଧମାଳ।
