ଚିନ୍ତା ପ୍ରତିମା ବହୁଭାଷୀ ନାଟ୍ୟ ମହୋତ୍ସବ ଉଦଘାଟିତ ,ଚିନ୍ତାମଣି ଜେନାଙ୍କ ନାଟକ ସୂର୍ଯ୍ୟୋଦୟ ପୂର୍ବେ ମଞ୍ଚସ୍ଥ
ରାଉରକେଲା : “ଚିନ୍ତା- ପ୍ରତିମା ବହୁଭାଷୀ ନାଟ୍ୟ ମହୋତ୍ସବ -୨୦୨୬ ” ସିଭିକ ସେଣ୍ଟର୍ ଠାରେ ଉଦ୍ଘାଟିତ ହୋଇଯାଇଛି। ଉଦଘାଟନ ଦିବସରେ ରଘୁନାଥପାଲୀ ବିଧାୟକ ଦୁର୍ଗା ଚରଣ ତନ୍ତୀ ମୁଖ୍ୟଅତିଥି ଏବଂ ଟେଲି ସିରିୟଲ ଓ ନାଟ୍ୟ ନିର୍ଦେଶକ ଅଛୁ ପ୍ରଧାନ ସମ୍ମାନିତ ଅତିଥି ରୂପେ ଯୋଗ ଦେଇଥିଲେ । ଏହି ଅବସରରେ ଯାତ୍ରା ଓ ନାଟ୍ୟ ନିର୍ଦ୍ଦେଶକ ମନୋଜ ପଟ୍ଟନାୟକଙ୍କୁ “ଚିନ୍ତା- ପ୍ରତିମା ସ୍ମୃତି ସମ୍ମାନ” ପ୍ରଦାନ କରାଯାଇଥିଲା । ଏହାସହ “ନାଟ୍ୟାଚାର୍ଯ୍ୟ ଚିନ୍ତାମଣି ଜେନାଙ୍କ ନାଟ୍ୟସମ୍ଭାର, ଭାଗ ୨” ଶୀର୍ଷକ ଗ୍ରନ୍ଥାବଳୀ ଅତିଥିମାନଙ୍କଦ୍ଵାରା ଲୋକାର୍ପିତ ହୋଇଥିଲା | ଡ ନିବେଦିତା ଜେନାଙ୍କ ସମ୍ପାଦିତ ଏହି ଗ୍ରନ୍ଥାବଳି ରେ ପାଞ୍ଚୋଟି ନାଟକ – “ସୂର୍ଯ୍ୟତୃଷ୍ଣା” (୧୯୬୯), “ସ୍ଵପ୍ନ ଓ ସତ୍ୟ ସମ୍ବନ୍ଧରେ”(୧୯୭୪), “ଚାଲ ଆଲୋକ ଖୋଜିବା”(୧୯୭୫), “ଏବଂ ପ୍ରତିଦ୍ବନ୍ଦ୍ବୀମାନେ”(୧୯୭୮) ଓ ଅମୃତ ( ୧୯୮୦) ରହିଛି | ତନ୍ମଧ୍ୟରୁ ସୂର୍ଯ୍ୟତୃଷ୍ଣାକୁ ଛାଡିଦେଲେ ଅନ୍ୟ ଚାରୋଟି ପରୀକ୍ଷାମୂଳକ ନାଟକ, ପାଠକ ଓ ଦର୍ଶକଙ୍କ ଚିନ୍ତାଜଗତକୁ ଉଦବେଳିତ କରିବାର କ୍ଷମତା ରଖେ ବୋଲି କୁହାଯାଉଛି । ଏହି ନାଟକ ଗୁଡିକ ରଚନା ହେବାର ଅର୍ଦ୍ଧ ଶତାବ୍ଦୀ ଅତିକ୍ରାନ୍ତ ହୋଇଥିଲେ ମଧ୍ୟ ଏଗୁଡିକ ସମକାଳୀନ ସମସ୍ୟାର ସମାଧାନ ସହ ଉପସ୍ଥିତ | ତେଣୁ ଏହି ନାଟକାବଳୀ ସମାଜର ଅଶେଷ ଉପକାର ସାଧନ କରିବ, ଏଥିରେ ଅତ୍ୟୁକ୍ତି ନାହିଁ ବୋଲି ଅତିଥି ମାନେ କହିଥିଲେ। ନାଟ୍ୟାଚାର୍ଯ୍ୟର ସମ୍ପାଦକ ଡଃ ରମେଶ ଚନ୍ଦ୍ର ମଲ୍ଲିକ ଚିନ୍ତାମଣି ଜେନାଙ୍କ ନାଟ୍ୟ ସମ୍ଭାର, ଭାଗ ୨ – ସମ୍ପର୍କରେ ସୂଚନା ପ୍ରଦାନ କରିଥିଲେ । ଶେଷରେ ପ୍ରୟାସ ର ସଭାପତି ଡ଼ ଜେନା ଧନ୍ୟବାଦ ଅର୍ପଣ କରିଥିଲେ।
ନାଟ୍ୟକାର ଚିନ୍ତାମଣି ଜେନାଙ୍କ ନାଟକ “ସୂର୍ଯୋଦୟ ପୂର୍ବେ” ମଞ୍ଚନ କରାଗଲା | ଏହି ନାଟକରେ କିପରି ପାଶ୍ଚାତ୍ୟ ଶିକ୍ଷା ଓ ସଭ୍ୟତା ଯୁବ ପିଢିକୁ ଗର୍ବାନ୍ଧ କରିଦେଇଛି ଓ ସେମାନଙ୍କ ମାନବିକତା ଛଡାଇ ନେଉଛି ଏବଂ ମଣିଷ କ୍ରମଶଃ ସ୍ଵାର୍ଥସର୍ବସ୍ଵ ଯନ୍ତ୍ରରେ ପରିଣତ ହେଉଛି ତାହା ପ୍ରଦର୍ଶିତ ହୋଇଥିଲା । ଏହି ନାଟକରେ ସର୍ବଶ୍ରୀ ବିଶ୍ୱଜିତ୍ ଦାସ, ଅଭିଳାଷ ସାହୁ, ରାଜେଶ ରାୟ, ପ୍ରଫୁଲ୍ଲ ଚନ୍ଦ୍ର ସେଠୀ, ଶୁଭେନ୍ଦୁ ସାମଲ, ବିଶ୍ୱଜିତ୍ ମହାପାତ୍ର, ରମେଶ ଚନ୍ଦ୍ର ସାହୁ, ସୌମ୍ୟରଞ୍ଜନ ବାରିକ, ରାମ ଚନ୍ଦ୍ର ଗୌଡ, ନିବେଦିତା ଜେନା ଓ ସନ୍ତୋଷିନୀ ବାରିକ ପ୍ରମୁଖ ଅଭିନୟ କରିଥିଲେ । ଗଙ୍ଗାଧର ରାଉତ ଓ ଅକ୍ଷୟ ନାୟକ ମଞ୍ଚ ପରିଚାଳନା,ସଙ୍ଗୀତରେ ସୁଶାନ୍ତ କୁମାର ଦଳାଇ ଓ ପ୍ରଫୁଲ୍ଲ ଚନ୍ଦ୍ର ସେଠୀ ନାଟକର ନିର୍ଦ୍ଦେଶନା ଦେଇଥିଲେ।
କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
