ଗଣମାଧ୍ୟମ ର ପ୍ରଭାବ,
ଖବର ପ୍ରସାରଣ ପରେ ଉଠା ଜଳସେଚନ କାର୍ଯ୍ୟଳୟ ର ସଫେଇ ଆରମ୍ଭ
ଆସିକା, ୭/୮/୨୬ (ଶିବ ଶଙ୍କର ମିଶ୍ର )ନଧରାକୋଟ ପଞ୍ଚାୟତ ସମିତି କାର୍ଯ୍ୟଳୟ ଓ ବିଜୁ ପଟ୍ଟନାୟକ ପାର୍କ ମଧ୍ୟ ଭାଗରେ ରହିଛି ଉଠା ଜଳସେଚନ ବିଭାଗ କନିଷ୍ଠ ଯନ୍ତ୍ରୀ ଙ୍କ କାର୍ଯ୍ୟଳୟ । ହେଲେ ଏହା ନଥିବା ଭଳି ପ୍ରତୀୟମାନ ହେଉଛି। କାରଣ ଦୀର୍ଘ ଦିନ ହେଲା ଏଠାରେ କୌଣସି କର୍ମଚାରୀ କାର୍ଯ୍ୟରତ ନାହାନ୍ତି । ବ୍ଲକର ଅଠର ଗୋଟି ପଞ୍ଚାୟତ ଭିତରେ ରହିଥିବା ପ୍ରାୟ ଅସିଏ ଗୋଟି ପ୍ରକଳ୍ପ ମଧ୍ୟରୁ ମାତ୍ର ପନ୍ଦର ଗୋଟି ପଏଣ୍ଟ କାର୍ଯ୍ୟ କରୁଥିବା ବେଳେ ବଳକା ସବୁ ଅଚଳ ହୋଇପଡିଥିବା ଦେଖାଦେଇଛି । ସଂପ୍ରତି ଅଭାବୀ ବର୍ଷା ଯୋଗୁଁ ଚାଷୀ ର ମେରୁଦଣ୍ଡ ଦୋହଲି ଯାଇଥିବା ବେଳେ ଅଚଳ ଉଠା ଜଳସେଚନ ପଏଣ୍ଟ ଚାଷିପାଇଁ ଉପହାସ ସଦୃଶ ହୋଇଛି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି କୃଷି ଓ କୃଷକ ଙ୍କ ଆବଶ୍ୟକତାକୁ ଦୃଷ୍ଟିରେ ରଖି ଧରାକୋଟ ରେ ଉଠା ଜଳସେଚନ ବିଭାଗ ର ଏକ କାର୍ଯ୍ୟଳୟ ଖୋଲିଥିଲା । ଜଣେ କନିଷ୍ଠ ଯନ୍ତ୍ରୀ, ଦୁଇ ଜଣ କିରାଣୀ, ପିଅନ ଓ ରାତ୍ରି ଜଗୁଆଳି ସହ ପ୍ରାୟ ଷାଠିଏ ଜଣ ଡ୍ରାଇଭର ଓ ହେଲ୍ପର କାର୍ଯ୍ୟରତ ରହିଥିଲେ । ଏହି ସବୁ ପଏଣ୍ଟ ଗୁଡିକରୁ ନିରନ୍ତର ଭାବରେ ଜଳ ଯୋଗାଣ ଯୋଗୁଁ ଅଞ୍ଚଳର ହଜାର ହଜାର ଏକର ଜମିରେ ଖରିଫ ଓ ରବି ଧାନ ଚାଷ ସହ ପନିପରିବା ଚାଷ କରି ଚାଷୀମାନେ ଆର୍ଥିକ ଦୃଷ୍ଟିରୁ ବେଶ ଲାଭବାନ ହେଉଥିଲେ । ଅଚାନକ କର୍ମଚାରୀ ମାନଙ୍କୁ ସରକାର ଛଟେଇ କରିବା ପରେ ସ୍ଥିତି ବଦଳି ଯାଇଥିଲା । ଧୀରେ ଧୀରେ ଏଠାରୁ କାର୍ଯ୍ୟରତ କନିଷ୍ଠ ଯନ୍ତ୍ରୀ ଙ୍କୁ ମଧ୍ୟ ବଦଳି କରି ତାଙ୍କ ସ୍ଥାନରେ କାହାକୁ ପୋଷ୍ଟିଙ୍ଗ କରାଗଲା ନାହିଁ । ଏଣୁ କାର୍ଯ୍ୟଳୟ ଟି ନଷ୍ଟ ହେବାସହ ଏହାର ପରିସର ଅନାବନା ଗଛ ଲତାରେ ଭରପୂର ହୋଇଗଲା । ଏଣୁ ଏହା ଅସାମାଜିକଙ୍କ ଆଡ୍ଡାସ୍ଥଳୀ ରେ ପରିଣତ ହୋଇଗଲା । ଏ ସମ୍ପର୍କରେ ବିଭିନ୍ନ ସମୟରେ ଅଭିଯୋଗ ପ୍ରକୋଷ୍ଠ ରେ ସ୍ଥାନୀୟ ଗଣ ମାଧ୍ୟମ ପ୍ରତିନିଧି ମାନେ ଅଭିଯୋଗ କରିବା ସହ ଗତ ଜୁଲାଇ 21 ତାରିଖ ଦିନ ବିଭିନ୍ନ ଖବରକାଗଜରେ ଏ ସମ୍ପର୍କରେ ବିସ୍ତୃତ ଭାବରେ ଖବର ପ୍ରକାଶ ପାଇଥିଲା। ଯାହାର ପ୍ରଭାବ ଯୋଗୁଁ ସଂପ୍ରତି କାର୍ଯ୍ୟଳୟ ପରିସରରେ ସଫେଇ କାର୍ଯ୍ୟ ଆରମ୍ଭ ହୋଇଥିବା ଦେଖାଯାଇଛି । କୃଷି ଓ କୃଷକ ପାଇଁ ଉଠା ଜଳସେଚନ ର ଭୂମିକା ଗୁରୁତ୍ୱପୂର୍ଣ୍ଣ । ଚଳିତ ବର୍ଷ ବର୍ଷାର ଅନୀୟ ମିତତା ଯୋଗୁଁ ସ୍ୱଳ୍ପ ବୃଷ୍ଟିପାତ ହୋଇଛି । ଯାହା ଫଳରେ ଚାଷ କାର୍ଯ୍ୟ ବାଧାପ୍ରାପ୍ତ ହୋଇଛି। ଏଭଳି ପରିସ୍ଥିତିରେ ସରକାର ତୁରନ୍ତ ଏହାର ଗୁରୁତ୍ବ ଉପଲବ୍ଧି କରି ଧରାକୋଟ ଉଠା ଜଳସେଚନ କାର୍ଯ୍ୟଳୟ ଖୋଲିବା ସହ ସମସ୍ତ ଅଚଳ ପଏଣ୍ଟ ଗୁଡିକୁ କାର୍ଯ୍ୟକ୍ଷମ ପାଇଁ ଚାଷୀମାନେ ଦାବୀ କରିଛନ୍ତି।
