ଆଶ୍ଵିନର ମହାଦାନ

ଆଶ୍ଵିନ ଆସନ୍ତେ ଲାଳିତ୍ୟ ଜଗତେ

   ବସୁଧାରୁ ବ୍ୟୋମ ଭରା,

ବିୟତେ ବାଦଲ ଭୂ-ରେ କାଶଫୁଲ

     ଶୁଭ୍ର ସୁଷମା ପସରା l(୧)

କାଶତଣ୍ଡି ଶ୍ଵେତ ଭୂଲୋକେ ମଣ୍ଡିତ

        ତରଙ୍ଗ ପ୍ରାୟେ ଦିଶଇ

ଏ ଦୃଗ ଯୁଗଳେ ଏ ଦୃଶ୍ୟ ଦେଖନ୍ତେ 

       ମନ ବିଭୋର ହୁଅଇ |(୨)

ଶାରଦୀୟ ପୂଜା ମାଆ ଶକ୍ତି ଧ୍ଵଜା

       ଶକ୍ତିପୀଠରେ ଶରତେ 

ବସୁଧାରେ ବିଭା ପୀଠେ ଦିବ୍ୟପ୍ରଭା

    ଦିବ୍ୟତା ଭରେ ମରତେ |(୩)

*ପୁଅଜୀଉନ୍ତିଆ* ପର୍ବ *ମହାଳୟା*

    *ସିଂହଧ୍ଵଜା* ର ଯାତରା,

ମା’ସମଲେଶ୍ଵରୀ ସାଜି ଶୈଳପୁତ୍ରୀ

     ଶୁଭାରମ୍ଭ ଦଶହରା l(୪)

*ଭାଇଜୀଉନ୍ତିଆ* ନବଦୂର୍ଗା ପୂଜା

    ନଅ ରୂପରେ ପୂଜିତା,

କଳାହାଣ୍ଡିଠାରେ ଶୁକ୍ଳ ନବମୀରେ

    ଛିନ୍ନମସ୍ତା *ଛତ୍ର-ଯାତ୍ରା* l(୫)

ମଣ୍ଡପେ-ମନ୍ଦିରେ ଦିବ୍ୟ ସୁରଭିରେ

      ଧୂପ-କର୍ପୂର-ଚନ୍ଦନ, 

ଶୁଦ୍ଧମନ ଶୁଦ୍ଧ ହୃଦୟେ ପୂଜିଲେ

      ପୂର୍ଣ୍ଣ ହୁଏ ମନସ୍କାମ l(୬)

ଆଦିଶକ୍ତିମୟୀ ସେହି ସ୍ନେହମୟୀ

    ଶାମ୍ଭବୀ ସେ ନାରାୟଣୀ,

ମହିଷାମର୍ଦ୍ଦିନୀ ଦୁର୍ଗତିନାଶିନୀ 

     ପର୍ବ ମାତା *ଦୁର୍ଗାଷ୍ଟମୀ* l(୭)

ମାଗୁଅଛି ଆଜି ପୁଷ୍ପାଞ୍ଜଳି କରି

    ସୁଦୟା କର ହେ!ମାତା,

ବିଶ୍ଵର ମଙ୍ଗଳ କର ହେ! ସାଧନ

    ନମାମୀ ଅପରାଜିତା l(୮)

ଅସତ୍ୟ ଉପରେ ସତ୍ୟ ସଦା ଜିତେ

      ପାପକୁ ଜିତଇ ପୂଣ୍ୟ,

*ବିଜୟାଦଶମୀ* *କୁଆଁର ପୁନେଇଁ*

      ଆଶ୍ଵିନର ମହାଦାନ l(୯)

ଶ୍ରୀମତୀ ପ୍ରିୟଦର୍ଶିନୀ ମିଶ୍ର 

ଜୁନାଗଡ଼ (କଳାହାଣ୍ଡି)

ଜନ୍ମଭୂମି-ମଣ୍ଡଳ (ବଲାଙ୍ଗିର)