ଭାବ କଳ୍ପରେ କବି
ବେଣୁଧର ସୂତାର
କେତେ ଭାବ କେତେ
ଭାବନା ଲହରୀ
ଆଶାର ସାୟରୀ ରାଗ ଆଶାବରୀ
ଜାଗିଉଠେ ମନତଳେ
ବୁକୁରେ ଖେଳଇ ନବ ଉନ୍ମାଦନା
ନବ ସୃଜନର ଲଳିତ କଳ୍ପନା
ଭାବନାର ଅନ୍ତରାଳେ ।।
ବରଷା ବସନ୍ତ ଯା ପାଇଁ ସମାନ
ହୃଦ ଆବେଗର ଅନୁଭବ ମାନ
ଅସରନ୍ତି ଆଶା ଜାଗେ
ଶବ୍ଦାୟିତ ହୁଏ କଳ୍ପନାର ଧାରା
ଭାବ ପ୍ରସୂନର ମହକ ପସରା
ଭାଷା ପ୍ରୀତି ଅନୁରାଗେ ।।
ପ୍ରଲୁବ୍ଧ ମନର ଭାବକଳ୍ପ ଝର
ନିଃଶବ୍ଦରେ ତୋଳେ
ଶବ୍ଦର ଝଙ୍କାର
ସୁମୋହନ ସୁର ତାଳେ
ହୃଦୟ ବୀଣାର ମୂର୍ଚ୍ଛନା ମଧୁର
ଶବ୍ଦ ସୁର ଛନ୍ଦ ରସ ସମାହାର
ରମ୍ୟ ରଚନା ଛଳେ ।।
ଭାବ ପୀୟୂଷର ପବିତ୍ର ପ୍ଳାବନ
ସୃଷ୍ଟି ସର୍ଜନା ର ଶ୍ରେଷ୍ଠ ଉପାଦାନ
ସାରସ୍ବତ ପୁଣ୍ୟ ସ୍ରୋତେ
ଲେଖନୀରେ ଭାଷା
କମଳିନୀ ଫୁଟେ
ମନ୍ଦାକିନୀ ଧାରା ମରୁତଟେ ଛୁଟେ
ଚାନ୍ଦ ଉଏଁ ଅମା ରାତେ ।।
କଳ୍ପନା ନୟନ ପାରେ ଅନୁଭବି
ମାଟି ମଟାଳର ନବ ରୂପ ଛବି
ପ୍ରୀତିର ଗୀତିକା ଗାଏ
ପ୍ରେମ ପ୍ରଣୟର ପୂରବୀ ଝଙ୍କାରେ
ବେଦନାର ସୁର ବିରହୀ ଅନ୍ତରେ
ଲେଖନୀରେ ରୂପପାଏ ।।
କଙ୍କାଳ ବୁକୁରେ ତୁମେ ଭର ଭାଷା
ତୃଷାର୍ତ୍ତ ପ୍ରାଣର ହରିନିଅ ତୃଷା
ଭରି ନବ ଉନ୍ମାଦନା
ଭକ୍ତି ଆବେଗର ଭାବାଶ୍ରିତ ସ୍ବର
ହୃଦୟ ଅର୍ଘ୍ୟର ଗୀତି ସୁଧା ଧାର
ଭକ୍ତିମୟ ନିରାଜନା ।।
ସାରସ୍ବତ ବନେ ପ୍ରଜ୍ଞାର ଦୀପାଳି
ତୁମ ଲେଖନୀର ପୂତ ଅର୍ଘ୍ୟାଞ୍ଜଳି
ହରେ ଜନମନ କ୍ଷୁଧା
ମର୍ମଭେଦି ତୁମ ଶବ୍ଦର ଚାତୁରୀ
ଦିବ୍ୟ ସୃଜନର ଅମୃତ ଲହରୀ
ସାରସ୍ୱତ ସ୍ବପ୍ନ ସୁଧା ।।
କେଶଦୁରାପାଳ କେନ୍ଦୁଝର
