ଦୃଶ୍ୟାନ୍ତର

      ଆଦରମଣି ପ୍ରଧାନ,

ଦିନେନା ଦିନେ ଚାଲିଯିବି

ଛାଡି ଚାଲି ଯିବି

ସବୁଦିନ ପାଇଁ,

ଏଇ ପୃଥିବୀ,

ମାୟାବୀ ସୂର୍ଯ୍ୟ ଲୋକ,

ସବୁଜ ବନାନୀ 

ଧୂମାୟିତ ଚା’ କପ 

ଏବଂ

ଶୂନ୍ୟତାର ଫୁଲଦାନୀ

ସବୁ ଛାଡି ଚାଲି ଯିବି,,,

ଆଉ କେବେ ଆସିବିନି

ଆଉ ଫୁଲ ହୋଇ ଫୁଟିବିନି

ବଗିଚାର ନୀଳ ଜରାୟୁରେ,,,,

ଲେଖିବି ନାହିଁ ମୋ ଛାତି ଓ

ନିଆଁ ର କବିତା

ମାଟିର ଶୋଷିଲା ଓଠରେ,,,

ମୋ ଗଲା ପରେ 

ବାତ୍ସଲ୍ୟ ଆଲ୍ହାଦନ ସବୁ

ଫିକା ପଡିଯିବ

ଆକାଶର ମୁହଁରେ 

ଲାଗିଯିବ ଶିଉଳି

ମୋ ବିଚ୍ଛେଦରେ ନୀଳ ଦିଶିବ

ଯମୁନାର ପାଣି,,,

ପବନ ମାତାଲ ହେବ

ଛାର ଖାର କରି ଦେବ

ଖେଦାକ୍ତ ମେଦିନୀ,

ମଞ୍ଚରେ ପଡିଯିବ

ଶେଷ ଯବନିକା,

ଦିନେନା,,,ଦିନେ ଚାଲିଯିବି,,,,

     ଚାନ୍ଦବାଲି , ଭଦ୍ରକ