ଯୀଶୁ ଖ୍ରୀଷ୍ଟଙ୍କର ଜନ୍ମଦିନ
ତୃପ୍ତି ରାଣୀ ପାତ୍ର
ହେ ଈଶ୍ୱ ନନ୍ଦନ ରାଜଧିରାଜନ
ମହାମହିମ ଈଶ୍ୱର
ଆଶ୍ଚର୍ଯ୍ୟ ସମ୍ଭୂତ ପରାକ୍ରାନ୍ତ ଲଗ୍ନ
ନଥିଲା ସ୍ଥାନ ତୁମ୍ଭର ।
ଜନ ଗଣନାର କରମ ସେଦିନ
ନାମ ଲେଖାଇବା ପାଇଁ
ଚାଲିଚାଲି ପାଦେ କରିଲ ସମ୍ପନ୍ନ
ମାତା ମରିୟମ ନାମ୍ନୀ ।
ଚତୁର୍ଦ୍ଦିଗ ଭରା ଜନ ସମାଗମ
ନମିଳିଲା ଗୃହେ ସ୍ଥାନ
ଈଶ୍ୱରଙ୍କ ଇଚ୍ଛା ହୋଇଲା ପୂରଣ
ଜନ୍ମିଲ ଗୋରୁ ଅଙ୍ଗନ ।
ରାଜା ମାନଙ୍କର ମହାନ ରାଜନ
ଇମାନୁୟେଲ ସୁ ନାମେ
ବିଚଳିତ ହୋଇ ହେରୋଦ ରାଜନ
ଚକିତ ହେଲେ ଶ୍ରବଣେ ।
କୁମନ୍ତ୍ରଣା କରି ମାରିବା ନିମନ୍ତେ
ଗୁପ୍ତରେ ଯୋଜନା କଲେ
ଈଶ୍ୱ ତନୟସେ କେ ମାରିବ ସତେ
ବଞ୍ଚି ଶକ୍ତି ପ୍ରକାଶିଲେ ।
ଦୟା କ୍ଷମା ପ୍ରେମ ହୃଦୟେ ଆଚରି
ଦିବ୍ୟ ଶକ୍ତି ପ୍ରକାଶିଲେ
ମୃତକୁ ଜୀବନ ବଧୀରେ ଶ୍ରବଣ
ପିତା କର୍ମ ସମ୍ପାଦିଲେ ।
ସେଦିନର ବଡ଼ଦିନ ଅବସରେ
ଶିଶୁ ଯୀଶୁ ଜନ୍ମିଥିଲେ
ଏହି ବଡ଼ଦିନେ ଉଦ୍ଦୀପିତ କରେ
ପ୍ରତି ଅନ୍ତର ଆତ୍ମାରେ।
ଅନ୍ତରେ ଜନମି ଦିଅ ଏହି ଦିନେ
ତୁମରି ଗୁଣ ସୁରଭି
ସ୍ୱର୍ଗଲୋକରେ ଦେଖି ପାରି ମନେ
ଝରିବ ପ୍ରେମ ଦୁନ୍ଦୁଭି ।
ନାହାଁନ୍ତି ଆଜି ସେ ବେଥଲିହିମରେ
ଅଛନ୍ତି ପ୍ରତି ଅନ୍ତରେ
ନେବାକୁ ଜନମ ଆବିଳ ହୃଦୟେ
ଡାକନ୍ତି କେତେ ଆତୁରେ ।
ସହଦେବଖୁଣ୍ଟା,ବାଲେଶ୍ଵର
