ଖରାତାତି ଯୋଗୁଁ ଜନଜୀବନ ଅସ୍ତବ୍ୟସ୍ତ
ଲାଞ୍ଜିଗଡ଼,୧୯/୦୪(ମନିସ)-ଆଜି ଅପରାହ୍ନ ଦୁଇଟା ସୁଦ୍ଧା ପ୍ରବଳ ଗରମ ଓ ଗୁଳୁଗୁଳି ସହିତ କଳାହାଣ୍ଡି ଜିଲ୍ଲାର ସର୍ବାଧିକ ଉତ୍ତପ୍ତ ସହର ଭାବେ ପରିଗଣିତ ହୋଇଛି ଲାଞ୍ଜିଗଡ଼ ! କ୍ରମାଗତ ଭାବେ ଚଳିତ ସପ୍ତାହରେ କେବଳ ଲାଞ୍ଜିଗଡ଼ ନୁହେଁ, ଲାଞ୍ଜିଗଡ଼ ବ୍ଲକର ବିଶ୍ବନାଥପୁର, ଲାଞ୍ଜିଗଡ଼ ରୋଡ଼ ଆଦି ଅଞ୍ଚଳରେ ତାପମାତ୍ରା ବଢ଼ି ଚାଲିଥିବାବେଳେ ଆଜି ଲାଞ୍ଜିଗଡ଼ରେ ସର୍ବାଧିକ ୪୨° ଡିଗ୍ରୀ ସେଲସିୟସ ତାପମାତ୍ରା ରେକର୍ଡ କରାଯାଇଛି ! ଲଗାତାର ତାପମାତ୍ରା ବଢ଼ି ଚାଲିଥିବାବେଳେ ପ୍ରବଳ ଖରା ଓ ଲୁ ଯୋଗୁଁ ଦିନ ଦଶଟାରୁ ଘରୁ ବାହାରକୁ ବାହାରିବା ମୁସ୍କିଲ ହୋଇପଡ଼ୁଛି ! ପ୍ରବଳ 
ଗରମ ସାଙ୍ଗକୁ ବାରମ୍ବାର ବିଦ୍ୟୁତ କାଟ ଯୋଗୁଁ ଲୋକେ ହନ୍ତସନ୍ତ ହେଉଥିବାବେଳେ କୁଲିମଜୁରି କରି ପରିବାର ପ୍ରତିପୋଷଣ କରୁଥିବା ଲୋକେ ଆହୁରି ହଇରାଣ ହେଉଛନ୍ତି ! ଖରାତାତି ବଢ଼ିବା ପରେ ସରକାର ଆଉ ଦୁଇଦିନ ସ୍କୁଲ ଓ ଅଙ୍ଗନୱାଡି କେନ୍ଦ୍ର ବନ୍ଦ ରଖିବାକୁ ନିର୍ଦ୍ଦେଶ ଦେଇଛନ୍ତି ! ଏପରିସ୍ଥଳେ ଲାଞ୍ଜିଗଡ଼ ଓ ବିଶ୍ବନାଥପୁର ପରି ଅଞ୍ଚଳରେ ଦୋକାନ ବଜାର, ରାସ୍ତାଘାଟ ସବୁ ଖାଁ ଖାଁ ଲାଗୁଥିବାବେଳେ ଲସି, ସରବତ, ଆଖୁରସ ଆଦି ଦୋକାନରେ ପ୍ରାୟତଃ ଭିଡ଼ ଲାଗି ରହୁଥିବା ଦେଖିବାକୁ ମିଳିଛି ! ସେହିପରି ବ୍ଲକର ଅନେକ ପଞ୍ଚାୟତରେ ଜଳଛତ୍ର ଖୋଲାଯାଇଥିବାବେଳେ କେତେକ ପଞ୍ଚାୟତରେ ଏ ପର୍ଯ୍ୟନ୍ତ ଜଳଛତ୍ର ଖୋଲିନାହିଁ ! ଯାହାଫଳରେ ଯାତ୍ରୀ ଓ ପଥିକ କଷ୍ଟ ଭୋଗୁଥିବା ଲକ୍ଷ୍ୟ କରାଯାଇଛି ! ଏପରିସ୍ଥଳେ ପ୍ରଶାସନ ପକ୍ଷରୁ ଜଳକଷ୍ଟ ଭୋଗୁଥିବା ଗାଁଗୁଡ଼ିକୁ ଚିହ୍ନଟ କରାଯାଇ ନଳକୂପ ଖୋଳିବା, ପାଇପ ଯୋଗେ ଜଳଯୋଗାଣ ପାଇଁ ପଦକ୍ଷେପ ନେବାକୁ ଦାବି ହେଉଛି ! ତେବେ ଲାଞ୍ଜିଗଡ଼ ବ୍ଲକ ପ୍ରଶାସନ ସମ୍ଭାବ୍ୟ ପରିସ୍ଥିତିର ମୁକାବିଲା ପାଇଁ ପ୍ରସ୍ତୁତ ଥିବା ଓ ଆବଶ୍ୟକ ହେଲେ ଟ୍ୟାଙ୍କର ଯୋଗେ ପାନୀୟ ଜଳଯୋଗାଣର ବ୍ୟବସ୍ଥା କରାଯିବ ବୋଲି ସୂଚନା ମିଳିଛି !
ଲାଞ୍ଜିଗଡ଼ ବ୍ଲକରୁ ସୁଶୀଲ କୁମାର ବାଗଙ୍କ ରିପୋର୍ଟ
