ଝିପିଝିପି ବର୍ଷା: ଚିନ୍ତାରେ ଧାନ ଓ କପା ଚାଷୀ
କର୍ଲାମୁଣ୍ଡା: ଗତ କିଛି ଦିନ ହେଲା ମେଘୁଆ ପାଗ ସାଙ୍ଗକୁ ଝିପିଝିପି ବର୍ଷା ଯୋଗୁଁ କର୍ଲାମୁଣ୍ଡା ବ୍ଲକ ଅଞ୍ଚଳର ଚାଷୀ ଚିନ୍ତିତ ହୋଇ ପଡ଼ିଛି l ଏହି ଅଞ୍ଚଳର ପ୍ରାୟ ଚାଷୀ ଧାନ ଫସଲ ଅମଳରେ ଲାଗି ପଡ଼ିଥିବା ବେଳେ ବର୍ଷା ସାଜିଛି ଦାଉ l ଫଳରେ ଅନେକ ଚାଷୀଙ୍କ ଧାନ କଟା ଅଧାରେ ରହିବା, ବିଲରେ ଧାନ ପେଟା ପଡ଼ି ରହିବା, ଧାନ ଖାରୀ 
ସବୁକୁ ପଲିଥିନ ଘୋଡ଼ାଇବା ସାଙ୍ଗକୁ ଅନେକ ଚାଷୀଙ୍କ ଧାନ ଭିଜିଯାଇ ନଷ୍ଟ ହୋଇଥିବା ଅଭିଯୋଗ ହୋଇଛି l କର୍ଲାମୁଣ୍ଡା ବ୍ଲକର କର୍ଲାମୁଣ୍ଡା, ତେରେସିଂହା, ରିଷିଡ଼ା, ପୌରକେଲା, ଗଜବାହାଲ, ରାଜପୁର, ରିଞ୍ଜା, ଏସ୍.ମାଳପଡ଼ା, ବୋରପଦର, ଯୋରାଡବରା, ସାପଲହରା ଗ୍ରାମ ପଞ୍ଚାୟତର ଚାଷୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେବା ସହ କ୍ଷତିଗ୍ରସ୍ତ ହେଉଛନ୍ତି l ସେହିପରି ରେଗଡ଼ା ଗ୍ରାମ ପଞ୍ଚାୟତ ଭୋଇରମୁଣ୍ଡା ଗ୍ରାମର ଚାଷୀ ଏବେ ମୁଣ୍ଡରେ ହାତ ଦେଲେଣି l ଏହି ଗ୍ରାମରେ ପ୍ରାୟ ୧୦୦ ଏକର ପାଖାପାଖି ଜମିରେ କପା ଚାଷ ହୋଇଛି l ଅଦିନିଆ ଲଘୁଚାପ ବର୍ଷା ଯୋଗୁଁ ଧଳା ସୁନା କୁହା ଯାଉଥିବା କପା ଓ ଧାନ କ୍ଷେତରେ ଧାନ ପଡ଼ି ରହିଛି l ଯାହା ଫଳରେ ଚାଷୀର ଦୁଃଖ ଦ୍ଵିଗୁଣିତ ହୋଇ ଯାଇଛି l ଏଣୁ କ୍ଷତିଗ୍ରସ୍ତ ହୋଇଥିବା ଚାଷୀଙ୍କ ନାମ ପଞ୍ଜିକରଣ କରି କ୍ଷତି ପୂରଣ ପ୍ରଦାନ କରିବାକୁ ଚାଷୀ ମହଲରେ ଦାବି ହେଉଛି l
କର୍ଲାମୁଣ୍ଡାରୁ ସୁଶାନ୍ତ ରଣାଙ୍କ ରିପୋର୍ଟ, ମସୀହା
