ନିଜ ଦୁଃଖ ଭୁଲି କର୍ତ୍ତବ୍ୟ ତୁଲାଇଲେ
ଲାଞ୍ଜିଗଡ଼ରୋଡ଼ ସରପଞ୍ଚ ମମତା
ଲାଞ୍ଜିଗଡ଼,୦୭/୦୪( )-
ପରିବାରର ଗୋଟିଏ ବୋଲି ଅଲୀ ଅଳି ଝିଅ ସେ । ଅଭାବୀ ପରିବାରର ଝିଅ ହୋଇଥିବାବେଳେ ବାପା-ମାଆଙ୍କ ଉଦ୍ୟମରେ ସ୍ନାତ୍ତକ ଯାଏଁ ପାଠ ପଢିଛନ୍ତି । ତେବେ ଅଞ୍ଚଳବାସୀଙ୍କ ଏକାନ୍ତ ଅନୁରୋଧ ଯୋଗୁଁ ସେ ଏଥର ପଞ୍ଚାୟତ ନିର୍ବାଚନରେ ମଇଦାନକୁ ଓହ୍ଲାଇବା ସହିତ ବିପୁଳ ଭୋଟରେ ବିଜୟୀ ହୋଇ ସରପଞ୍ଚ ଭାବେ ନିର୍ବାଚିତ ହୋଇଛନ୍ତି । ହଁ ଆଜ୍ଞା ଆମେ କହୁଛୁ କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକ ଲାଞ୍ଜିଗଡ଼ରୋଡ଼ ଗ୍ରାମ ପଞ୍ଚାୟତର ନବନିର୍ବାଚିତ ସରପଞ୍ଚ ସୁଶ୍ରୀ ମମତା ଶବରଙ୍କ କଥା ।
ତେବେ ଅତ୍ୟନ୍ତ ଦୁଃଖଦ ପରିସ୍ଥିତିରେ ଏଇ ପାଞ୍ଚଦିନ ତଳେ ତାଙ୍କ ମାଆଙ୍କ ଦେହାନ୍ତ ଘଟିଛି । ମାଆଙ୍କ ମୃତ୍ୟୁ ପରେ ସଂପୂର୍ଣ୍ଣ ଭାବେ ଭାଙ୍ଗି ପଡିଛନ୍ତି ମମତା । ମାଆଙ୍କୁ ହରାଇ ତାଙ୍କ ଆଖିରୁ ଲୁହ ଶୁଖୁନି । ଏଇ ଦୁଃଖଦ ପରିସ୍ଥିତି ମଧ୍ୟରେ ଥିବା ସମୟରେ ସେ ଯେତେବେଳେ ଶୁଣିଲେ ନିଜ ପଞ୍ଚାୟତ ଅଧୀନସ୍ଥ ମାଡ଼ିବନ୍ଧା ଗାଁର ଜଣେ ପଚିଶ ବର୍ଷର ଯୁବକ କର୍ଣ୍ଣ ବିଶି ଙ୍କ ଅକାଳ ମୃତ୍ୟୁ ଘଟିଛି । ମୃତ ଯୁବକଙ୍କ ପରିବାର ସଂପୂର୍ଣ୍ଣ ବେସାହାରା ହୋଇପଡ଼ିଛନ୍ତି । ତୁରନ୍ତ ନିଜ ଆଖିରୁ ଲୁହ ପୋଛି ମୃତକଙ୍କ ଦୁଆରେ ଠିଆ ହୋଇଛନ୍ତି ମମତା । ନିଜ ଦୁଃଖ ଭୁଲି ମୃତ ଯୁବକଙ୍କ ପରିବାର ପ୍ରତି ବଢାଇଛନ୍ତି ସହାୟତାର ହାତ । ହରିଶ୍ଚନ୍ଦ୍ର ଯୋଜନାରୁ ତୁରନ୍ତ ଅର୍ଥ ପ୍ରଦାନ ସହିତ ମୃତକଙ୍କ ପରିବାରକୁ ସାନ୍ତ୍ୱନା ଦେଇଛନ୍ତି । ମମତାଙ୍କ ଏହି ପଦକ୍ଷେପକୁ ଏବେ ସାଧାରଣରେ ପ୍ରଶଂସା କରାଯାଉଥିବାବେଳେ ସରପଞ୍ଚ ହେବ ତ ଏମିତି ବୋଲି ଲୋକେ କୁହାକୁହି ହେଉଛନ୍ତି ।
ଲାଞ୍ଜିଗଡରୁ ସୁଶୀଲ କୁମାର ବାଗଙ୍କ ରିପୋର୍ଟ
