ଟ୍ରାକ୍ଟର ଚାଳିତ ମାଣ୍ଡିଆ ମଞ୍ଜିବୁଣା ଯନ୍ତ୍ରର କ୍ଷେତ୍ର ପ୍ରଦର୍ଶନ
୧୪/୦୮/୨୦୨୪ // ସେମିଲିଗୁଡା // ଓଡିଶା କୃଷି ଓ ବୈଷୟିକ ବିଶ୍ଵବିଦ୍ୟାଳୟ (OUAT) ଓ ଏକ୍ରିସାଟ (ICRISAT), ହାଇଦ୍ରାବାଦର ମିଳିତ ପ୍ରୟାସରେ କୋରାପୁଟ ଜିଲ୍ଲାର ସେମିଲିଗୁଡା ବ୍ଲକ ଅନ୍ତର୍ଗତ ମୁଖିବିଡ଼େଇ ଗ୍ରାମଠାରେ, ତା ୧୪/୦୮/୨୦୨୪ ଦିନ, ଟ୍ରାକ୍ଟର ଚାଳିତ ମାଣ୍ଡିଆ ମଞ୍ଜିବୁଣା ଯନ୍ତ୍ରର କ୍ଷେତ୍ର ପ୍ରଦର୍ଶନ ଆୟୋଜନ କରା ଯାଇଥିଲା । ସମ୍ପ୍ରତି ଏହି ଅଞ୍ଚଳରେ ରାଷ୍ଟ୍ରୀୟ କୃଷି ବିକାଶ ଯୋଜନା (RKVY) ପ୍ରକଳ୍ପ ମୁରୋ ମାଧ୍ୟମରେ ଓୟୁଏଟି ଓ ଏକ୍ରିସାଟ ତରଫରୁ ବିଭିନ୍ନ ପୃଷ୍ଟିଶସ୍ୟର ଉତ୍ପାଦନ ବୃଦ୍ଧିପାଇଁ ଗବେଷଣା ଜାରି ରହିଛି । ଓୟୁଏଟି ଅଧିନସ୍ଥ ସର୍ବ ଭାରତୀୟ ସମନ୍ୟୁତ କୃଷି ଯନ୍ତ୍ରପାତି ଗବେଷଣା ପ୍ରକଳ୍ପ ତରଫରୁ ଏକ ଟ୍ରାକ୍ଟର ଚାଳିତ ନଅ ଧାଡିଆ ମାଣ୍ଡିଆ ମଞ୍ଜିବୁଣା ଯନ୍ତ୍ରର କ୍ଷେତ୍ର ପ୍ରଦର୍ଶନ ଆୟୋଜନ କରା ଯାଇଥିଲା । ଏହା ଦ୍ଵାରା ଏକ ଘଣ୍ଟାରେ ଏକ ଏକର ଜମିରେ ଏକର ପିଛା ୩ କେ॰ ଜି॰ ବିହନ ଧାଡିରେ ବୁଣାଯାଇ ପାରିବ । ଏତଦ ବ୍ୟତୀତ ଏକ୍ରିସାଟ ତରଫରୁ ପ୍ରଦଶିତ ଟ୍ରାକ୍ଟର ଚାଳିତ ଚାରିଧାଡ଼ିଆ ମାଣ୍ଡିଆ ମଞ୍ଜିବୁଣା ଯନ୍ତ୍ର ସାହାଯ୍ୟରେ ଏକର ପିଛା ୨ କେ॰ ଜି॰ ବିହନ ଓ ଏକ ଘଣ୍ଟାରେ ଏକ ଏକର ଜମିରେ ବୁଣା ଯାଇ ପାରୁଛି ।
ଧାଡିରେ ଯାନ୍ତ୍ରିକ ପ୍ରଣାଳୀରେ ମଞ୍ଜିବୁଣିବା ଦ୍ଵାରା ଜମିରେ ସଠିକ ଗଛ ସଂଖ୍ୟା ରହି ଥାଏ ଓ ଉତ୍ପାଦନ ବଡିବାରେ ସହାୟକ ହୁଏ । ପାରମ୍ପାରିକ ପଦ୍ଧତି ତୁଳନାରେ, ଏହି ପ୍ରଣାଳୀରେ କମ ଖର୍ଚରେ, କମ ସମୟରେ କମ ପରିଶ୍ରମରେ ମଞ୍ଜି ବୁଣା କାମ କରା ଯାଇ ପାରୁଛି ।
ରାଜ୍ୟରେ ପୃଷ୍ଟିଶସ୍ୟ ଫସଲର ଚାଷ ଆଶାତୀତ ଭାବରେ ବୃଦ୍ଧିପାଇବା ପରେ, ଏହିପରି ଯାନ୍ତ୍ରିକ ପ୍ରଣାଳୀରେ ଧାଡିବୁଣା କାମ କରାଗଲେ, ଚାଷୀମାନେ ବିଶେଷଭାବରେ ଉପକୃତ ହେବେ ବୋଲି ଉପସ୍ଥିତ ବୁଦ୍ଧିଜୀବିମାନେ ମତ ଦେଇଥିଲେ । ଏହି କାର୍ଯ୍ୟକର୍ମରେ ଜିଲ୍ଲାର ମୁଖ୍ୟ କୃଷି ଅଧିକାରୀ, ସହକାରୀ କୃଷିଯନ୍ତ୍ରୀ ଗଣ, ସ୍ଥାନୀୟ କୃଷି ବିଜ୍ଞାନ କେନ୍ଦ୍ରର ଓ ଆଞ୍ଚଳିକ ଗବେଷଣା କେନ୍ଦ୍ରର ବଜ୍ଞାନିକ ଗଣ ଯୋଗଦାନ କରିଥିଲେ । ଆଖପାଖ ଅଞ୍ଚଳରୁ ଶତାଧିକ ଚାଷୀ ଉକ୍ତ କାର୍ଯ୍ୟକର୍ମରେ ଯୋଗଦାନ କରିବା ସହିତ ମଞ୍ଜିବୁଣା ଯନ୍ତ୍ର ବିଷୟରେ ଜ୍ଞାନ ଅର୍ଜନ କରିଥିଲେ ।
ଗୌରୀ ପଟ୍ଟନାୟକ ଙ୍କ ରିପୋର୍ଟ୍
