ବିଭାଗ ଚୁପ୍, ଚାଷୀ କଲେ ଘାଇ ମରାମତି
କର୍ଲାମୁଣ୍ଡା: କର୍ଲାମୁଣ୍ଡା ବ୍ଲକ ଅନ୍ତର୍ଗତ ତେରେସିଂହା ବେଲପଡ଼ା ସ୍ଥିତ ବସ୍ ଷ୍ଟେସନ୍ ନିକଟରେ ଗତ କିଛି ଦିନ ହେଲା ମୁଖ୍ୟ କେନାଲରେ ଏକ ବିରାଟ ଘାଇ ସୃଷ୍ଟି ହୋଇଥିଲା l ଫଳରେ କେନାଲ ତଳ ମୁଣ୍ଡ ଚାଷୀ ମାନେ ପାଣି ପାଇବାରୁ ବଞ୍ଚିତ ହେଉଛନ୍ତି l ଅନେକ ଚାଷୀ ଏଯାଏଁ ରୁଆ ବିହୁଡା଼ କାର୍ଯ୍ୟ ଶେଷ କରିନାହାନ୍ତି l ଏନେଇ ବିଭାଗୀୟ ଅଧିକାରୀଙ୍କୁ ଅନେକ ଥର ଘାଇ ମରାମତି କରିବାକୁ ଦାବି ହୋଇ ଥିଲେ ସୁଦ୍ଧା କେହି କର୍ଣ୍ଣପାତ କଲେ ନାହିଁ l ଫଳରେ କେନାଲ ତଳମୁଣ୍ଡ ଚାଷୀମାନେ ଏକତ୍ରିତ ହୋଇ ବାଲି ବସ୍ତା ପକାଇ ଘାଇ ମରାମତି କରିଥିବା ଦେଖିବାକୁ ମିଳିଛି l ଏଠାରେ ପ୍ରକାଶ ଥାଉକି ମରାମତି ସମୟରେ ବିଭାଗୀୟ କେନାଲ ଖଲାସୀ ମାନେ ମଧ୍ୟ ଉପସ୍ଥିତ ରହିଥିଲେ l ଚାଷୀ ନେତା ତଥା ପୂର୍ବତନ ସରପଞ୍ଚ ହନୁମାନ ଦାସ ଏଥିରେ ସହଯୋଗର ହାତ ବଢ଼ାଇଥିବା ଦେଖାଯାଏ l କେନାଲର ରକ୍ଷଣା ବେକ୍ଷଣାର ଅଭାବ ଓ ଠିକ୍ ସମୟରେ ସଫେଇ କାର୍ଯ୍ୟ ହେଉ ନ ଥିବାରୁ ଅନେକ ସମୟରେ ଏଭଳି ଘାଇ ସୃଷ୍ଟି ହେଉଛି ବୋଲି ଚାଷୀମାନେ ମତ ପ୍ରକାଶ କରିଛନ୍ତି l
କର୍ଲାମୁଣ୍ଡାରୁ ସୁଶାନ୍ତ ରଣାଙ୍କ ରିପୋର୍ଟ, ମସୀହା
