ନିଖୋଜ ହେମନ୍ତର ମିଳୁନାହିଁ ପତ୍ତା, ଚିନ୍ତାରେ ପରିବାର
ଖଇରା,୦୮/୯/୨୪ – ବାଲେଶ୍ଵର ଜିଲ୍ଲା ଖଇରା ବ୍ଲକ ବରଦା ପଞ୍ଚାୟତ ଏବଂ ସିମୁଳିଆ ଥାନା ଅଧିନ ବରଦା ଗ୍ରାମର ହେମନ୍ତ କୁମାର ସାହୁ(୧୩) ଗତ ତା ୦୪/୯/୨୪ ରିଖ ଦିନ ସକାଳ ୮ ଘଟିକା ସମୟରେ ଘର ନିକଟ ଛକ ପାଖରୁ ଆସୁଛି ବୋଲି କହି କେଉଁ ଆଡେ ଚାଲି ଯାଇଥିଲା । ପରଦିନ ଅର୍ଥାତ୍ ତା ୦୫/୯/୨୪ ରିଖ ଦିନ ରୁପସା ଥାନାରୁ ସିମୁଳିଆ ଥାନାକୁ ଖବର ଆସିଲା ହେମନ୍ତ ଥାନାରେ ଅଛି । ଥାନା ତରଫରୁ ଏ ଖବର ବରଦା ପଞ୍ଚାୟତ ସରପଞ୍ଚଙ୍କ ନିକଟରେ ପହଞ୍ଚିବା ପରେ ପରିବାର ଲୋକେ ପ୍ରଥମେ ସିମୁଳିଆ ଥାନାରେ ପହଞ୍ଚି ନାତି ନିଖୋଜ ନେଇ ଜେଜେ ପ୍ରହ୍ଲାଦ ସାହୁ ଅଭିଯୋଗ କରିଥିଲେ । ପରେ ଥାନାଧିକାରୀଙ୍କ ଠାରୁ ଲେଖା ନେଇ ରୁପସା ଥାନାରେ ପହଞ୍ଚି ଥିଲେ । ହେଲେ ପରିବାର ଲୋକେ ହେମନ୍ତକୁ ଥାନାରେ ଦେଖିବାକୁ ପାଇ ନଥିଲେ, କେବଳ ତା’ ସାଇକେଲ ଦେଖିବାକୁ ପାଇଥିଲେ । ଏହା ଏକ ସନ୍ଦେହ ଜନକ ଘଟଣା ବୋଲି ମନେହୁଏ । ଆଜକୁ ୫ ଦିନ ବିତି ଯାଇଥିଲେ ମଧ୍ୟ ହେମନ୍ତର କୌଣସି ପତ୍ତା ମିଳୁନଥିବା ପରିବାର ଲୋକେ କହିଛନ୍ତି । ପ୍ରକାଶ ଥାଉକି ହେମନ୍ତ ବରଦା ସ୍କୁଲର ୭ମ ଶ୍ରେଣୀରେ ପଢୁଥିବା ଛାତ୍ର । ଘରୁ ଗଲା ବେଳେ ରେସିଂ ସାଇକେଲ ଚଢ଼ି ଯାଇଛି । ଶ୍ଯାମଳ ବର୍ଣ୍ଣ, ଲାଲ ରଙ୍ଗର ବେନିୟନ, ମାଟିଆ ରଙ୍ଗର ପେଣ୍ଟ, ଉଚ୍ଚତା ୩ ଫୁଟ୍ ୨ ଇଞ୍ଚ ବୋଲି ଜେଜେ ପ୍ରହ୍ଲାଦ ସାହୁ ଅଭିଯୋଗରେ ଉଲ୍ଲେଖ କରିଛନ୍ତି । ହେମନ୍ତର ବାପା ବଳରାମ ସାହୁ, ମାତା ମିତାରାଣୀ ସାହୁ ବାହାରେ ରହୁଥିବାରୁ ଏ ଖବରପାଇ ଘରକୁ ଆସି ବିଭିନ୍ନ ସ୍ଥାନରେ ଖୋଜାଖୋଜି କରି ନିରାଶ ହେବା ପରେ ପୁଅକୁ ଖୋଜି ଆଣିବା ପାଇଁ ବାପାମା ସହିତ ଜେଜେ ସିମୁଳିଆ ଥାନାକୁ ଅନୁରୋଧ କରିଛନ୍ତି । ନିଖୋଜ ହେମନ୍ତକୁ ଠାବ କରିବା ପାଇଁ ଉଭୟ ଥାନା ତରଫରୁ ଉଦ୍ୟମ ଜାରି ରହିଛି । ଯଦି କେହି ସହୃଦୟ ବ୍ଯକ୍ତି ନିଖୋଜ ହେମନ୍ତର ସନ୍ଧାନ ପାଆନ୍ତି ନିକଟସ୍ଥ ଥାନା କିମ୍ବା ନିମ୍ନ ପ୍ରଦତ୍ତ ମୋ – 8458004754, 9178366767, 9938488118, 9777423653 ରେ ଯୋଗାଯୋଗ କରିବା ପାଇଁ ପରିବାର ଲୋକେ ଅନୁରୋଧ କରିଛନ୍ତି ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
