ଭକ୍ତି ନୈବେଦ୍ୟ
ତୁମେ ଶ୍ରୀରାଧାଙ୍କ
ଶ୍ରୀପଦ ପଲ୍ଲବେ
ଦେହୀ ମୁଦାରମ୍ ପ୍ରୀତି ।
ଶ୍ରୀଗୀତ ଗୋବିନ୍ଦ
ଲେଖନୀ ଆଧାରେ
ଶ୍ରୀହସ୍ତର ସ୍ବୀକାରୋକ୍ତି ।।
ତୁମେ ଯାଜ୍ଞସେନୀ
ଭଗ୍ନାଶ ପଣତେ
ଆହ୍ଲାଦିତ ପ୍ରିୟ ସଖା ।
ତୁମ ପ୍ରତିଦାନ
ଅମୂଲ୍ୟ ଅମୋଘ
ସିଦ୍ଧି ସମର୍ପଣେ ଲେଖା ।।
ଅଣଲେଉଟା ସେ
ରୁକୁଣା ରଥରେ
ପୀରତି ସନ୍ଦେଶ ବାର୍ତ୍ତା ।
ସତ୍ୟଭାମା ପ୍ରେମ
ପ୍ରଗଣା କାନନେ
ମଣି ମାଣିକ୍ୟ ର ଗାଥା ।।
ଅଭିଶପ୍ତା ସେଇ
ଅହଲ୍ୟା ଆଶାରେ
ତୁମେ କୃପାରେଣୁ ଧାର ।
ଶବରୀ ବିଶ୍ୱାସ
ଜୀବନ ସଞ୍ଜ ରେ
ଆତିଥ୍ୟ ର ଉପହାର ।।
ମୀରା ଅଞ୍ଜଳିର
ଆଞ୍ଜୁଳେ ଛନ୍ଦରେ
ତୁମେ ମହକିତ ସ୍ମୃତି ।
ମାଣିକ ଶ୍ରଦ୍ଧା ର
ରତ୍ନମୁଦ୍ରିକା ରେ
ତୁମେ ଭିନ୍ନ କିମ୍ବଦନ୍ତୀ ।।
ତୁମେ ଆବେଗର
ମନ୍ଦାକିନୀ ଧାରା
ଭାବ ଭକତି ର ମନ ।
ମୋ ପାପୀ ଓଠରୁ
ଝରି ଆସୁଥିବା
ତୁମେ ଶ୍ରୀ ବିଷ୍ଣୁ ସହସ୍ର ନାମ ।।
ସସ୍ମିତା ପଣ୍ଡା
କଟିକଟା, କଟକ