ସହଭାଗିତା
ବାସନ୍ତୀ ଲତା ଜେନା
ଦୁଃଖ ସୁଖ ଭରା ଏ ସାରା ଜୀବନ
ସାମାଜିକ ପ୍ରାଣୀ ନର
ଘାତ ପ୍ରତିଘାତ ସହନ କରିଣ
ଜୀବନ କରେ ସୁନ୍ଦର l୧l
ହାତକୁ ହାତ ଯେ ମିଶାଇଣ ଦେଲେ
ହୋଇବ ସହ ଭାଗିତା
ଜଟିଳ କାମଟି ସହଜ ହୋଇବ
ହୋଇବ ଜଗତ ଜିତା l୨l
ସଂସ୍କାର ସଂସ୍କୃତି ଆମର ଚଳଣି
ଦେଶ ସେବା ପରମ୍ପରା
ମେଳା ମହୋତ୍ସବ ସହଭାଗିତାରେ
ହସି ଉଠେ ବସୁନ୍ଧରା l୩l
ପରିବାର ଠାରୁ ଆରମ୍ଭ କରିଣ
ସମାଜର ହିତ ପାଇଁ
ଜାନି ଯାତ୍ରା ହୁଏ ସହ ଭାଗିତାରେ
କର୍ମ କରି ଯିବା ଭାଇ l୪l
ଔପଚାର ଅବା ଅଣଔପଚାର
ସହ ଭାଗିତାରେ କଲେ
କାର୍ଯ୍ୟଟି ସହଜ ସଫଳ ହୁଅଇ
ପ୍ରଗତିର ରଥ ଚଳେ l୫l
ସହ ଭାଗିତାରେ ଶକତି ସାହସ
ବଳ ଦ୍ବିଗୁଣିତ ହୁଏ
ବିନ୍ଦୁ ବିନ୍ଦୁ ଜଳେ ସାଗର ଭରଇ
ବିଶ୍ୱରେ କଲ୍ୟାଣ ହୁଏ l୬l
ମହୁଫେଣା ହୁଏ ସହଭାଗିତାରେ
କୋଣାର୍କ ହୋଇଛି ଗଢ଼ା
ମନ୍ଦିର ମସଜିଦ୍ ସେତୁ ବନ୍ଧ ହୁଏ
ଶତ୍ରୁ ସଂଗେ ହୁଏ ଲଢା l୭l
ମନ ସଙ୍ଗେ ମନ ମିଶି ଗଲେ ଥରେ
ହିଂସା ଇର୍ଷା ଦ୍ୱେଷ ଦୂର
ଶାନ୍ତି ମୈତ୍ରୀ ପ୍ରୀତି ବିଶ୍ୱରେ ପ୍ରତିଷ୍ଠା
ହେଉ ଥିବ ନିରନ୍ତର l୮l
ସାରା ବିଶ୍ୱ ଆମ ଏକ ପରିବାର
ପର ଆପଣାର ନାହିଁ
ସହଭାଗିତାରେ ହାତ ମିଶାଇବା
କୁସଂସ୍କାର ଦୂର ହୁଏ l୯l
ଗାନ୍ଧୀନଗର, ପୋଷ୍ଟ / ଜିଲ୍ଲା : ନବରଙ୍ଗପୁର