ମୋହନଗିରି ହାଇସ୍କୁଲ ରେ ଜୀବନ ଶିକ୍ଷା ଶିବିର
ମ.ରାମପୁର,୧୦/୧(ମସୀହା):ମ. ରାମପୁର ବ୍ଲକ ଅନ୍ତର୍ଗତ ମୋହନ ଗିରି ଉଚ୍ଚ ବିଦ୍ୟାଳୟରେ ଏକ ତିନି ଦିନିଆ ଜୀବନ ଶିକ୍ଷା ଶିବିର ଅନୁଷ୍ଠିତ ହୋଇ ଯାଇଛି । ଏଲ.ଟି.ଆଇ.ମାଇଣ୍ଡ ଟ୍ରି ଫାଉଣ୍ଡେସନ ସହାୟତାରେ ମହାଶକ୍ତି ଫାଉଣ୍ଡେସନ ତରଫରୁ ଅନୁଷ୍ଠିତ ଏହି ଶିବିର କୁ ମୋହନଗିରି ସରପଞ୍ଚ ସୁରେନ୍ଦ୍ର ଧାରୁଆ ଓ ଉଚ୍ଚ ମାଧ୍ୟମିକ ବିଦ୍ୟାଳୟ ର ପ୍ରଧାନ ଶିକ୍ଷକ ମହେଶ କୁମାର ପାଠକ ଅତିଥି ଭାବରେ ଯୋଗଦେଇ ଉଦଘାଟନ କରିଥିଲେ। ଏହି କାର୍ଯ୍ୟକ୍ରମରେ ଓଏସିସ ଅଭିଯାନ ବାରୋଦ୍ରା, ଗୁଜୁରାଟ ରୁ କୁମାରୀ ରିୟା ସାହା ଯୋଗ ଦେଇ ତାଲିମ୍ ଶିବିର କୁ ପରିଚାଳନା କରିଥିଲେ ।
କାର୍ଯ୍ୟକ୍ରମ ରେ ଛାତ୍ର ଛାତ୍ରୀ ମାନଙ୍କ ଉତ୍ତମ ଚରିତ୍ର ଗଠନ , ଜୀବନ ର ଲକ୍ଷ୍ୟ, ମୋ ଜୀବନ – ମୋ ପସନ୍ଦ , ଜୀବନ ର ସଫଳତା ର ସୋପାନ, ଭାଗ୍ୟ ଓ କଠିନ ପରିଶ୍ରମ, ଆତ୍ମ ବିଶ୍ବାସ ର ରହସ୍ୟ ଇତ୍ୟାଦି ବିଷୟରେ ବିସ୍ତୃତ ଭାବେ ଆଲୋଚନା କରାଯାଇଥିଲା । କାର୍ଯ୍ୟକ୍ରମ ରେ ଛାତ୍ର ଛାତ୍ରୀ ମାନେ କିଭଳି ନିଜ ଜୀବନ ର ଲକ୍ଷ୍ୟ ସ୍ଥିର କରି ତାହାର ହାସଲ ପାଇଁ କଠିନ ପରିଶ୍ରମ କରିବେ ସେଇ ବିଷୟରେ ବିଶେଷ ଗୁରୁତ୍ଵ ଦିଆଯାଇଥିଲା ।
ଶିବିର ରେ ବିଦ୍ୟାଳୟ ର ୪୦ ଜଣ ଛାତ୍ର ଛାତ୍ରୀ ଯୋଗ ଦେଇଥିବା ବେଳେ ମହାଶକ୍ତି ର ବରିଷ୍ଠ ପରିଚାଳକ ସୁରେଶ ପଟ୍ଟନାୟକ, ପ୍ରକଳ୍ପ ପରିଚାଳକ ଫିରୋଜ୍ କୁମାର ଥାତି, ବ୍ଲକ ସଂଯୋଜକ ଭାଗ୍ୟଶ୍ରୀ ରାଉତ, ମାନବ ସମ୍ବଳ ଅଧିକାରୀ ପୁଷ୍ପାଞ୍ଜଳି ମହାପାତ୍ର, ବ୍ଲକ ଉପ ସଂଯୋଜକ ସମୀର ପୂଜାରୀ , ସୈରେନ୍ଦ୍ରି ସାହୁ ପ୍ରମୁଖ ସହଯୋଗ କରିଥିଲେ।
ମ.ରାମପୁର ରୁ ପରମାନନ୍ଦ ବିଶି ଙ୍କ ରିପୋର୍ଟ
