ଛାଡିଯିବ ଦିନେ ତୋର ଏ ଘଟ
ଆଜିର ମଣିଷ, କାଲି ହୁଏ ପର
ମାଟି ଗ୍ରାସ କରେ ଦେହକୁ ତାର
ରୂପ କାନ୍ତି ବର୍ଣ୍ଣ, ହୋଅଇ ମଳିନ
ଅଗ୍ନିର ଶିଖାରେ ହୁଏ ସେ ଲୀନ ।
ଜନ୍ମର ସଂକେତ, ପାଇଯାଏ ନର
ମୃତ୍ୟୁ ଆଗତୁରା ନ ମାଡ଼େ ଦ୍ୱାର
ସରିଲେ ଆୟୁଷ, ଶରୀରର ଶେଷ
ସଂସାର ହାଟଟି ଲାଗଇ ବିଷ ।
ଦୀର୍ଘ ଦିନ ଦେହ, ହୁଅଇ ଅଚଳ
ଶରୀରକୁ ଆଉ ନ ମିଳେ ବଳ
ଜୁଇର ନିଆଁରେ, ହୁଅଇ ପାଉଁଶ
ଖୋଜିଲେ ମିଲେନା ଏହି ମଣିଷ ।
ଗର୍ବ ଅହଂକାର, ଦାମ୍ଭିକ ପଣିଆ
ଅଢେଇ ଦିନରେ ହୁଏ ପାଣିଆ
ସତ୍ୟ ଧର୍ମ କର୍ମ, ନ ହୁଏ ବିଫଳ
ପର ଜନ୍ମେ ନିଶ୍ଚେ ଦିଏ ତା ଫଳ ।
ସରଳ ସ୍ଵଭାଵ, ହୁଏ ହୀନିମାନ
ପରେ ପରେ ତା’ର ବଢ଼ଇ ମାନ
ସ୍ୱଭାବକୁ କେବେ, ନ କର ବିଫଳ
ଅଢେଇ ଦିନ ଏ ସଂସାର ଖେଳ ।
ସମର୍ପିତ ଭାବ, ରଖ ଶ୍ରୀପୟରେ
ଦାମ୍ଭିକ ପଣରୁ ରୁହ ଦୂରରେ
ଜଗତ କଲ୍ୟାଣେ, ବ୍ରତୀ ହେଲେ ତୁମେ
ଦୀନ ଜନଙ୍କର ଆସିବ କାମେ ।
ହସିବ ଦୁନିଆ, ହସିବ ଜଗତ
ହସିବ ପ୍ରଭୁଙ୍କ ସଂସାରି ଭକ୍ତ
ଅଢେଇ ଦିନର, ସରିଗଲେ ହାଟ
ଛାଡିଯିବ ନିଶ୍ଚେ ତୋ’ର ଏ ଘଟ ।
ଜୟ ଶ୍ରୀଜଗନ୍ନାଥ……..
ରଞ୍ଜନ କୁମାର ପଣ୍ଡା
କୋରାପୁଟ
