ଆଜିକାଲି ବସନ୍ତ
ବସନ୍ତ ବାସୁଛି
ଲତା ବେହେରା
^^^^^^^^^^^^^^^^^
ବସନ୍ତ ଆସିଛି ଫଗୁଣ ହସୁଛି
ଧରାଟି ସୁନ୍ଦର ଦିଶୁଛି
ପ୍ରକୃତି ସୌନ୍ଦର୍ଯ୍ଯ କରୁଛି ଆକୃଷ୍ଟ
ଶୀତଳ ସମୀର ବହୁଛି ।
ପଳାଶ ଫୁଟିଛି ଶିମିଳି ଚାହିଁଛି
କୃଷ୍ଣଚୂଡା ଠାର ମାରୁଛି
ଗଭାରେ ସଜେଇ ହେଉଛି ଫୁଲେଇ
ବସନ୍ତଟି ଚାହିଁ ହସୁଛି ।
ରଙ୍ଗ ରୋଶଣୀରେ ବସନ୍ତ ଆସିଛି
ମହ ମହ ବାସି ଯାଉଛି
ନବ ପଲ୍ଲବିତ ଲାଗୁଛି ଅଦ୍ଭୁତ
ଫଗୁଣ ଫୁଲେଇ ହେଉଛି ।
ଆଣିଛି ବସନ୍ତ ରଙ୍ଗର ଅବିର
ଫଗୁଣ ଖେଳିବ କହୁଛି
ଆମ୍ବ ବଉଳର ବାସ ତା ଛୁଟୁଛି
ବସନ୍ତଟି ବାସି ଯାଉଛି ।
ଯୁଇ ଜାଇ ହେନା ମଲ୍ଲୀ ଚମ୍ପା ବାସ୍ନା
ବସନ୍ତର ଦେହେ ଭରିଛି
ଆଜିକାଲି କାହିଁ କହରେ ବସନ୍ତ
ତୋ ବାସ୍ନା ଏମିତି ହେଉଛି ?
ନିର୍ମଳ ଆକାଶ କଅଁଳ ବୟସ
ଧରିତ୍ରୀକୁ ଚାହିଁ ରହିଛି
ରଙ୍ଗ ଛିଟା ଶାଢୀ ପିନ୍ଧିଛି ପ୍ରକୃତି
ମନକୁ ସେ ମୋହି ନେଉଛି ।
ବସନ୍ତ ଆସିଛି କୋଇଲି ଗାଉଛି
ଫଗୁଣଟି ଆଖି ମାରୁଛି
ମୃଦ୍ୟୁ ମଳୟଟି ବାସ ଚହଟାଇ
ମନକୁ ତା ଆଡେ ଟାଣୁଛି ।
ଋତୁରାଜ ଏଇ ବସନ୍ତଟି ଆଜି
ଧରିତ୍ରୀକୁ ଛୁଇଁ ହସୁଛି
ରଙ୍ଗ ଅବିରରେ ଖେଳିବ ଫଗୁଣ
ସାଥେ ଯୋଡି ତାର ଜମିଛି ।
କୋଇଲି ମୂର୍ଚ୍ଛନା କରେ ଆନମନା
ମନଟି ବିଭୋର କରୁଛି
ଆଜିକାଲି କାହିଁ ରଙ୍ଗର ଫଗୁଣେ
ବସନ୍ତଟି ଏତେ ବାସୁଛି ?
“””””””””””””””””””””””””””””””””””””””
ଲତା ବେହେରା
ଜକା, ଢେଙ୍କାନାଳ
