‘ସବୁଠୁ ଓଜନିଆ’ ଉପଗ୍ରହ CMS-03ର ସଫଳ ଉତକ୍ଷେପଣ କଲା ISRO
ଶ୍ରୀହରିକୋଟା,୨।୧୧: ଭାରତୀୟ ମହାକାଶ ଗବେଷଣା ସଂସ୍ଥା (ISRO) ରବିବାର ଶ୍ରୀହରିକୋଟା ସ୍ଥିତ ମହାକାଶ କେନ୍ଦ୍ରରୁ ଦେଶର ସବୁଠୁ ଓଜନିଆ ଯୋଗାଯୋଗ ଉପଗ୍ରହ CMS-03କୁ ସଫଳତାର ସହ ଉତକ୍ଷେପଣ କରିଛି। ଏହି ଉପଗ୍ରହକୁ ଭାରତୀୟ ମାଟିରୁ ଜିଓସିଙ୍କ୍ରୋନସ୍ ଟ୍ରାନ୍ସଫର କକ୍ଷପଥ (GTO)କୁ ନିଆଯାଉଥିବା ସବୁଠୁ ଭାରୀ ଉପଗ୍ରହ ବୋଲି କୁହାଯାଉଛି।
୨୪ ଘଣ୍ଟିଆ କାଉଣ୍ଟଡାଉନ୍ ଶେଷ ହେବା ପରେ ଅପରାହ୍ନ ୫.୨୬ ମିନିଟରେ ୪୩.୫ ମିଟର ଉଚ୍ଚତା ବିଶିଷ୍ଟ ରକେଟ୍ ଶ୍ରୀହରିକୋଟାର ଦ୍ୱିତୀୟ ଲଞ୍ଚ୍ ପ୍ୟାଡରୁ ମହାକାଶକୁ ଉଡ଼ାଣ ଭରିଥିଲା। CMS-03 ଉପଗ୍ରହଟି LVM3-M5 ରକେଟ୍ ମାଧ୍ୟମରେ ଉତକ୍ଷେପଣ କରାଯାଇଛି।
ଇସ୍ରୋର ସୂଚନା ଅନୁଯାୟୀ, ପ୍ରାୟ ୧୬-୨୦ ମିନିଟ୍ ଉଡ଼ାଣ ପରେ ଉପଗ୍ରହଟି ପୃଥିବୀଠାରୁ ପ୍ରାୟ ୧୮୦ କିଲୋମିଟର ଉଚ୍ଚତାରେ ରକେଟ୍ ଠାରୁ ଅଲଗା ହୋଇଥିଲା। CMS-03 ହେଉଛି ଏକ ମଲ୍ଟି-ବ୍ୟାଣ୍ଡ ଯୋଗାଯୋଗ ଉପଗ୍ରହ, ଯାହା ଭାରତୀୟ ସ୍ଥଳଭାଗ ସମେତ ବିସ୍ତୃତ ସାମୁଦ୍ରିକ ଅଞ୍ଚଳରେ ଯୋଗାଯୋଗ ସେବା ଯୋଗାଇବ।
ଏହା ପୂର୍ବରୁ ଇସ୍ରୋ ଭାରୀ ଉପଗ୍ରହ ଉତକ୍ଷେପଣ ପାଇଁ ଫ୍ରେଞ୍ଚ ଗୁଇନାର କୌରୁ ଲଞ୍ଚ୍ ବେସ୍ ବ୍ୟବହାର କରୁଥିଲା। ୨୦୧୮ ଡିସେମ୍ବରରେ ଇସ୍ରୋ ସେଠାରୁ ପ୍ରାୟ ୫,୮୫୪ କିଲୋଗ୍ରାମ ଓଜନର GSAT-11 ଯୋଗାଯୋଗ ଉପଗ୍ରହ ଉତକ୍ଷେପଣ କରିଥିଲା। ତେବେ, CMS-03 ହେଉଛି ଭାରତୀୟ ମାଟିରୁ GTOକୁ ଯାଇଥିବା ସବୁଠୁ ଭାରୀ ଉପଗ୍ରହ।
