ଆର୍ଟ ଅଫ ଗିଭିଂ ଡେ ପାଳନ
ରାଉରକେଲା : ରାଉରକେଲା ରେ ପାଳନ ହେଲା ଆର୍ଟ ଅଫ ଗିଭିଂ ଡେ । ବିଶିଷ୍ଟ ସମାଜସେବୀ ତଥା ଶିକ୍ଷାବିତ୍ ଡ. ଅଚ୍ୟୁତ୍ ସାମନ୍ତଙ୍କ ମହାନ୍ ବିଚାରଧାରାକୁ ଆଧାର କରି ୨୦୧୩ ମସିହା ମେ ୧୭ ତାରିଖରେ ଆରମ୍ଭ ହୋଇଥିଲା ଏହି ଆର୍ଟ ଅଫ ଗିଭିଂ ର ଚିନ୍ତାଧାରା । ଆଉ ସେବେ ଠାରୁ ପ୍ରତିବର୍ଷ ଏହି ଦିବସ ସମଗ୍ର ଓଡ଼ିଶା ଏବଂ ଭାରତର ଅନେକ ସହର ସମେତ ଭାରତ ବାହାରେ ବହୁ ଦେଶରେ ଆନନ୍ଦ ଉଲ୍ଲାସର ସହ ଏହା ପାଳନ ହୋଇ ଆସୁଛି । ଈଶ୍ୱର ଆମକୁ ଯାହା ଦେଇଛନ୍ତି ସେସବୁ କେବଳ ନିଜ ପାଖରେ ନରଖି ସମାଜର ସବୁ ବର୍ଗର ସବୁ ଶ୍ରେଣୀର ଲୋକଙ୍କ ନିକଟରେ ପହଞ୍ଚାଇବାର କଳା ହେଉଛି ଆର୍ଟ ଅଫ ଗିଭିଂ । ଏହି କ୍ରମରେ ରାଉରକେଲା ସହରର ଜଗଦା ସ୍ଥିତ ବାଟମଙ୍ଗଳା ସୋସିଆଲ ହୋମ୍ ସଭାଗୃହରେ ଆର୍ଟ ଅଫ ଗିଭିଂ ଦିବସ ମହା ସମାରୋହରେ ପାଳିତ ହୋଇଯାଇଛି । କଳିଙ୍ଗ ଟିଭି ର ସ୍ଥାନୀୟ ପ୍ରତିନିଧି ଅନୀଲ ମହାନ୍ତି ଙ୍କ ସଂଯୋଜନାରେ ଆୟୋଜିତ ଏହି କାର୍ଯ୍ୟକ୍ରମରେ ରାଉରକେଲା ବିଧାୟକ ସାରଦା ପ୍ରସାଦ ନାୟକ ମୁଖ୍ୟଅତିଥି, ରାଉରକେଲା ଏନଆଇଟି ଅବସରପ୍ରାପ୍ତ ଅଧ୍ୟାପକ ପ୍ରଫେସର ଡଃ ହୃଷୀକେଶ ନାଏକ ଓ ଅବସରପ୍ରାପ୍ତ ବି ଏସ ଏନ୍ ଏଲ କର୍ମଚାରୀ ସଂଘ ନେତା ତଥା ସମାଜସେବୀ ସଞ୍ଜିବ ମହାନ୍ତି ସମ୍ମାନିତ ଅତିଥି, ସାମ୍ବାଦିକ ଅରବିନ୍ଦ ଦାସ ମୁଖ୍ୟ ବକ୍ତା ଭାବେ ଯୋଗଦାନ କରିଥିଲେ । ଅତିଥି ମାନେ ଡ. ଅଚ୍ୟୁତ ସାମନ୍ତଙ୍କ ର ସମାଜ ପାଇଁ ଏପରି ମାର୍ଗଦର୍ଶନକୁ ଭୂୟଂସୀ ପ୍ରଶଂସା କରିବା ସହ ଆର୍ଟ ଅଫ ଗିଭିଂ ର ଚଳିତ ବର୍ଷର ଥିମ୍ “ସେୟାର ଟୁ ସାଇନ୍” ଭଳି ଯୁଗୋପଯୋଗୀ ଥିମ୍ ଭଳି ବିଚାର ଧାରା କୁ ଆହୁରି ଅଧିକରୁ ଅଧିକ ଲୋକଙ୍କ ନିକଟକୁ ପହଞ୍ଚାଇବା ପାଇଁ ଆହ୍ୱାନ ଦେଇଥିଲେ । ଏହି ଅବସରରେ ସମାଜରେ ଦୁଃସ୍ଥ ଓ ଅବହେଳିତ ପାଇଁ କାର୍ଯ୍ୟ କରୁଥିବା ସ୍ୱେଚ୍ଛାସେବୀ ସଂଗଠନ ର ଗୈ।ରୀ କୁମ୍ଭାର, ପୂର୍ଣ୍ଣିମା ମହାନ୍ତି, କଲ୍ୟାଣୀ ଦାସ, ହରେକୃଷ୍ଣ ନାୟକ ବିଶ୍ବଜିତ ରାଉତ ପ୍ରମୁଖଙ୍କୁ ସମାଜସେବାରେ ଉଲ୍ଲେଖନୀୟ ଅବଦାନ ପାଇଁ ମୁଖ୍ୟ ଅତିଥି ସାରଦା ନାୟକ ସମ୍ବର୍ଦ୍ଧିତ କରିଥିଲେ । ଶେଷରେ କିସ ର ଜିଲ୍ଲା ସଂଯୋଜକ ସୁବ୍ରତ ମହାପାତ୍ର ଧନ୍ୟବାଦ ଅର୍ପଣ କରିଥିଲେ l
କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
