୧୨୦ ବର୍ଷ ଐତିହ୍ୟ ଜୁନାଗଡ଼ ପିଡବ୍ଲ୍ୟୁଡି ବଙ୍ଗଳା ର ପୁନରୁଦ୍ଧାର ଦାବି
ଜୁନାଗଡ଼,୧୦/୬(ମନୀ ସ)କଳାହାଣ୍ଡି ଜିଲ୍ଲା ଜୁନାଗଡ଼ ସହରରେ ଅବସ୍ଥିତ ପ୍ରାୟ ୧୨୦ ବର୍ଷ ପୁରୁଣା ଐତିହାସିକ ପିଡବ୍ଲ୍ୟୁଡି ବଙ୍ଗଳା (ଆଇବି)ର ଜରୁରୀ ମରାମତି ଓ ପୁନରୁଦ୍ଧାର ପାଇଁ ସ୍ଥାନୀୟ ମହଳରେ ଦାବି ଜୋର ଧରିଛି। ଏହି ଐତିହାସିକ ଭବନଟି ବର୍ତ୍ତମାନ ଜରାଜୀର୍ଣ୍ଣ ଅବସ୍ଥାରେ ଥିବାବେଳେ ଏହାର ସଂରକ୍ଷଣ ନେଇ ସଚେତନ ନାଗରିକ ଓ ଐତିହ୍ୟପ୍ରେମୀମାନେ ଚିନ୍ତା ପ୍ରକାଶ କରିଛନ୍ତି।ବ୍ରିଟିଶ ଶାସନ କାଳରେ ନିର୍ମିତ ହୋଇଥିବା ଏହି ବଙ୍ଗଳାଟି ପୂର୍ବତନ କଳାହାଣ୍ଡି ରାଜ୍ୟର ପ୍ରଶାସନିକ ବ୍ୟବସ୍ଥା ସହ ଜଡିତ ଏକ ଗୁରୁତ୍ୱପୂର୍ଣ୍ଣ ସ୍ମୃତିଚିହ୍ନ ଭାବେ ପରିଚିତ। ସେହି ସମୟରେ ସରକାରୀ ଅଧିକାରୀ ଓ ଅତିଥିମାନଙ୍କ ରହଣି ପାଇଁ ଏହା ବ୍ୟବହୃତ ହେଉଥିଲା।ଇତିହାସବିଦଙ୍କ ମତାନୁସାରେ ଜୁନାଗଡ଼ ଏକ ଐତିହାସିକ ସହର ଭାବେ ପରିଚିତ ଏବଂ ଏହା ପୂର୍ବତନ କଳାହାଣ୍ଡି ରାଜ୍ୟର ରାଜଧାନୀ ଥିଲା। ନାଗ ବଂଶର ଶାସନ, ମନ୍ଦିର ଓ ଐତିହ୍ୟବାହୀ ସ୍ଥାପତ୍ୟ ଏହି ଅଞ୍ଚଳର ଗୌରବମୟ ଇତିହାସର ସାକ୍ଷୀ ହୋଇ ରହିଛି। ଏହି ପରିପ୍ରେକ୍ଷୀରେ ପିଡବ୍ଲ୍ୟୁଡି ବଙ୍ଗଳା ମଧ୍ୟ ଏକ ମୂଲ୍ୟବାନ ଐତିହ୍ୟ ଭାବେ ଗଣ୍ୟ ହେଉଛି।ସ୍ଥାନୀୟ ବୁଦ୍ଧିଜୀବୀ ଓ ସମାଜସେବୀମାନଙ୍କ କହିବା ଅନୁଯାୟୀ, ଭବନଟିର ତୁରନ୍ତ ମରାମତି ନ କରାଗଲେ ଏହାର ଐତିହାସିକ ମୂଲ୍ୟ ନଷ୍ଟ ହେବାର ଆଶଙ୍କା ରହିଛି। ତେଣୁ ରାଜ୍ୟ ସରକାର ଏହାର ପୁନରୁଦ୍ଧାର ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରି ଏହି ଐତିହାସିକ ସମ୍ପଦକୁ ସଂରକ୍ଷଣ କରିବାକୁ ସାଧାରଣ ଲୋକେ ଦାବି କରିଛନ୍ତି।ଏହି ଐତିହାସିକ ଭବନର ସଂରକ୍ଷଣ କେବଳ କଳାହାଣ୍ଡିର ଗୌରବମୟ ଅତୀତକୁ ସୁରକ୍ଷିତ ରଖିବ ନୁହେଁ, ବରଂ ଆଗାମୀ ପିଢ଼ି ପାଇଁ ଏକ ମୂଲ୍ୟବାନ ଐତିହ୍ୟ ଭାବେ ପରିଗଣିତ ହେବ। ଜୁନାଗଡ ରେ ବହୁମାତ୍ରାରେ ସରକାରୀ ଜମି ଉପଲବ୍ଧ ଥିବା ସତ୍ତ୍ବେ ୧୨୦ବର୍ଷ ରୁ ଅଧିକ ପୁରୁଣା ଐତିହାସିକ ବଙ୍ଗଳା କୁ ପୁନରୁଦ୍ଧାର ନ କରି ସେଠାରେ ମାତୃ ଓ ଶିଶୁ ସ୍ୱାସ୍ଥ୍ୟ ସେବା ଚିକିତ୍ସାଳୟର ସ୍ଥାପନ କରାଯାଉଥିବା ପ୍ରସ୍ତାବ କୁ ନେଇ ବୁଦ୍ଧଜୀବୀ ମହଲ ରେ ଘୋର ନିନ୍ଦା ପ୍ରକାଶ ପାଉଛି।ଏହି ଐତିହ୍ୟ କୁ ନଷ୍ଟ କରିବା ପରିବର୍ତ୍ତେ ଜୁନାଗଡର ଅନ୍ୟ କୌଣସି ଉପଯୁକ୍ତ ସରକାରୀ ଜମିରେ ମାତୃ ଓ ଶିଶୁ ସ୍ୱାସ୍ଥ୍ୟ ସେବା ଚିକିତ୍ସାଳୟ ନିର୍ମାଣ କରିବାକୁ ଜୁନାଗଡବାସୀ ଦାବି କରୁଛନ୍ତି। ଉଭୟ ଉନ୍ନୟନ ଓ ଐତିହ୍ୟ ସଂରକ୍ଷଣକୁ ସମାନ ଗୁରୁତ୍ଵ ଦେଇ ସରକାର ଏ ଦିଗରେ ଉଚିତ ନିଷ୍ପତ୍ତି ନେବାକୁ ସାଧାରଣରେ ମତ ପ୍ରକାଶ ପାଉଛି ।
ନରେନ୍ଦ୍ର କ୍ଷିତି ଙ୍କ ରିପୋର୍ଟ୍
