ଜେକେପୁର ଦୁର୍ଗାପୂଜା ପାଇଁ ଭୂମି ପୂଜନ
ଜେକେପୁର: ରାୟଗଡା ଜିଲ୍ଲାର ପ୍ରସିଦ୍ଧ ଜେକେପୁର ଦୁର୍ଗାପୂଜା ଉତ୍ସବ ପାଇଁ ଆଜି ଅପରାହ୍ଣରେ ବୈଦିକ ରୀତିନୀତି ଓ ପାରମ୍ପରିକ ବିଧିବିଧାନ ଅନୁଯାୟୀ ପବିତ୍ର ଭୂମି ପୂଜନ କାର୍ଯ୍ୟକ୍ରମ ସମ୍ପନ୍ନ ହୋଇଛି। ବେଦମନ୍ତ୍ର ଉଚ୍ଚାରଣ ଓ ପୂଜାର୍ଚ୍ଚନା ମଧ୍ୟରେ ଭୂମି ପୂଜନ କରାଯାଇଥିବା ବେଳେ ଏହା ସହିତ ଚଳିତ ବର୍ଷର ଦୁର୍ଗାପୂଜା ପ୍ରସ୍ତୁତି ଆନୁଷ୍ଠାନିକ ଭାବେ ଆରମ୍ଭ ହୋଇଛି।
ଏହି ଧାର୍ମିକ କାର୍ଯ୍ୟକ୍ରମରେ ଅନୁଷ୍ଠାନର ମୁଖ୍ୟ ବିନୟ ଦ୍ଵିବେଦୀ ପୌରହିତ୍ୟ କରିଥିଲେ। ମା’ ଦୁର୍ଗାଙ୍କ ଆଶୀର୍ବାଦ କାମନା କରାଯିବା ସହିତ ଅଞ୍ଚଳବାସୀଙ୍କ ସୁଖ, ଶାନ୍ତି, ସମୃଦ୍ଧି ଓ ମଙ୍ଗଳ ପାଇଁ ପ୍ରାର୍ଥନା କରାଯାଇଥିଲା।
କାର୍ଯ୍ୟକ୍ରମରେ ଜେକେ ପେପର ମିଲ୍ସର ଉପସଭାପତି (ବାଣିଜ୍ୟ) ବିଶ୍ଵଜିତ ଦ୍ଵିବେଦୀ, ଜେନେରାଲ ମ୍ୟାନେଜର (ଏଚ୍ଆର୍ ଓ ଆଇଆର୍) ସନ୍ଦୀପ ପାଣ୍ଡେ, ଚାନ୍ଦିଲି ଥାନାର ଆଇଆଇସି ଉତ୍ତମ କୁମାର ସାହୁ ପ୍ରମୁଖ ଉପସ୍ଥିତ ଥିଲେ।
ଏଥିସହ ଜେକେ ପେପର ମିଲ୍ସ ସହ ସଂପୃକ୍ତ ତିନୋଟି ୟୁନିଅନର ସଭାପତି, ସମ୍ପାଦକ ଓ ସଦସ୍ୟମାନେ, ଲୋକସମ୍ପର୍କ ଅଧିକାରୀ ସ୍ମୃତିରେଖା କରଙ୍କ ସମେତ ପେପର ମିଲ୍ସର ବହୁ ବରିଷ୍ଠ ଅଧିକାରୀ, ଦୁର୍ଗାପୂଜା କମିଟିର କର୍ମକର୍ତ୍ତା ଓ ସଦସ୍ୟମାନେ ଯୋଗଦେଇଥିଲେ।
ଜେକେପୁର ଦୁର୍ଗାପୂଜା ଦୀର୍ଘଦିନ ଧରି ଅଞ୍ଚଳର ଏକ ପ୍ରମୁଖ ଧାର୍ମିକ ଓ ସାଂସ୍କୃତିକ ଉତ୍ସବ ଭାବେ ପରିଚିତ। ପ୍ରତିବର୍ଷ ଏହି ପୂଜା ଅବସରରେ ଜେକେପୁର ସମେତ ଆଖପାଖ ଅଞ୍ଚଳରୁ ବହୁ ଶ୍ରଦ୍ଧାଳୁଙ୍କ ସମାଗମ ହୋଇଥାଏ। ଦୁର୍ଗାପୂଜାକୁ କେନ୍ଦ୍ର କରି ଧାର୍ମିକ କାର୍ଯ୍ୟକ୍ରମ ସହିତ ବିଭିନ୍ନ ସାମାଜିକ ଓ ସାଂସ୍କୃତିକ ଆୟୋଜନ ମଧ୍ୟ ହୋଇଥାଏ।
ଭୂମି ପୂଜନ ସମ୍ପନ୍ନ ହେବା ପରେ ଆୟୋଜକ ଓ ଅଞ୍ଚଳବାସୀଙ୍କ ମଧ୍ୟରେ ଚଳିତ ବର୍ଷର ଦୁର୍ଗାପୂଜାକୁ ନେଇ ଉତ୍ସାହ ବୃଦ୍ଧି ପାଇଛି। ଆଗାମୀ ଦିନରେ ପୂଜା ମଣ୍ଡପ, ସାଜସଜ୍ଜା, ଆଲୋକସଜ୍ଜା ଓ ଅନ୍ୟାନ୍ୟ ବ୍ୟବସ୍ଥାର ପ୍ରସ୍ତୁତି ଜୋରଦାର ହେବ ବୋଲି ଆଶା କରାଯାଉଛି। ଭକ୍ତି, ଶ୍ରଦ୍ଧା ଓ ଭାଇଚାରାର ପରିବେଶରେ ଚଳିତ ବର୍ଷର ଦୁର୍ଗାପୂଜା ମହୋତ୍ସବ ସଫଳତାର ସହ ସମ୍ପନ୍ନ ହେବ ବୋଲି ଆୟୋଜକମାନେ ଆଶାବାଦୀ ଅଛନ୍ତି।
ଗୌରୀ ପଟ୍ଟନାୟକ ଙ୍କ ରିପୋର୍ଟ୍
