ରବି ରାୟ ଶତବାର୍ଷିକୀ ସମାରୋହ
ଏନ୍ଇପି-୨୦ କୁ ଜାତୀୟ ଶିକ୍ଷାନୀତି କୁହାଯାଇପାରିବ ନାହିଁ : ବୀରେନ୍ଦ୍ର ନାୟକ
ବ୍ରହ୍ମପୁର, ୨୯ା୯ : ଲୋକସଭାର ପୂର୍ବତନ ବାଚସ୍ପତି ରବି ରାୟଙ୍କ ଜନ୍ମ ଶତବାର୍ଷିକୀ ଅବସରରେ ବ୍ରହ୍ମପୁରରେ “ନୂଆ ଜାତୀୟ ଶିକ୍ଷାନୀତି ଓ ଆମ ରାଷ୍ଟ୍ରର ଭବିଷ୍ୟତ” ଶୀର୍ଷକ ଏକ ଆଲୋଚନା ଚକ୍ରରେ ବରିଷ୍ଠ ସ୍ତମ୍ଭକାର ତଥା ଉକôଳ ବିଶ୍ୱବିଦ୍ୟାଳୟର ପୂର୍ବତନ ପ୍ରଫେସର ବୀରେନ୍ଦ୍ର ନାୟକ କହିଛନ୍ତି ଯେ ଏନ୍ଇପି-୨୦୨୦କୁ ଜାତୀୟ ଶିକ୍ଷାନୀତି ବୋଲି କୁହାଯାଇପାରିବ ନାହିଁ ।
ନୂତନ ଶିକ୍ଷାନୀତି ଓ ରାଷ୍ଟ୍ରର ଭବିଷ୍ୟତ ସମ୍ପର୍କରେ ଦୁଇଟି ପ୍ରମୁଖ କଥା କହିଛନ୍ତି ପ୍ରଫେସର ବୀରେନ୍ଦ୍ର ନାୟକ । ଏହି ଶିକ୍ଷାନୀତିକୁ ଜାତୀୟ ଶିକ୍ଷାନୀତି କୁହାଯାଇ ପାରିବ ନାହିଁ । ୧୯୬୮ ମସିହାରେ ଡ. ଡି.ଏସ୍ କୋଠାରୀଙ୍କ ନେତୃତ୍ୱରେ ଯେଉଁ ଶିକ୍ଷାନୀତି ପ୍ରଣୟନ ହୋିଥିଲା, ତାହା ଅନ୍ତତଃପକ୍ଷେ ସଂସଦରେ ବହୁ ଆଲୋଚନା ହୋଇ କାହା କାର୍ଯ୍ୟରେ ରୂପାନ୍ତରିତ ହୋଇଥିଲା । ପରେ ୧୯୮୬ ମସିହରାରେ ମଧ୍ୟ ସଂସଦରେ ସେ ସମ୍ପର୍କରେ ପୁନଃ ଆଲୋଚନା ହୋଇଥିଲା । ୨୦୨୦ରେ ଯେଉଁ ନୂଆ ଶିକ୍ଷାନୀତି ଏନ୍ଇପି-୨୦୨୦ ଆରମ୍ଭ କରାଯାଇଛି, ତାହା ସଂସଦରେ କିମ୍ବା କୌଣସି ରାଜ୍ୟର ବିଧାନସଭାରେ ମଧ୍ୟ ଆଲୋଚିତ ହୋଇନାହିଁ । ନିଜକୁ ସୁହାଇଲା ଭଳି କେଉଁ ବିଷୟକୁ ରଖିବା, କାହାକୁ ବାଦ୍ ଦେବା ଏବଂ ସବୁଠୁ ବଡ଼ କଥା ହେଉଛି, କୌଣସି ପ୍ରଗତିଶୀଳ ବାମ ସଙ୍ଗଠନ, ଛାତ୍ର, ଶିକ୍ଷକ, ବୁଦ୍ଧିଜୀବୀ ଫୋରମ୍; କାହାକୁ ମଧ୍ୟ ସାମିଲ ନକରି କେବଳ ଗୈରିକ ଅନୁଷ୍ଠାନ, ବିଶେଷ କରି ଆର୍ଏସ୍ଏସ୍ ତଥା ହିନ୍ଦୁତ୍ୱବାଦୀ ସଙ୍ଗଠନମାନଙ୍କୁ ଏଥିରେ ସାମିଲ କରି ସେମାନଙ୍କ ମତାମତ ଅନୁସାରେ ଶିକ୍ଷାନୀତି ପ୍ରସ୍ତୁତ କରାଯାଇଛି । ଯଦି ସଂସଦ କିମ୍ବା କୌଣସି ରାଜ୍ୟ ବିଧାନସଭାରେ ତାହା ଆଲୋଚନା ହୋଇନାହିଁ, ତେବେ ତାହାକୁ ଜାତୀୟ ଶିକ୍ଷାନୀତି କୁହାଯାଇ ପାରିବ ନାହିଁ । ଏନ୍ଇପି -୨୦ ଏକ ରାଜନୈତିକ ଦଲିଲ, ଶିକ୍ଷାନୀତି ନୁହଁ । ଏଥିରେ ପ୍ରାଚୀନ ଜ୍ଞାନ ପରମ୍ପରା ବଦଳରେ ସନାତନୀ ଧର୍ମକୁ ପ୍ରାଧାନ୍ୟ ଦିଆଯାଇଛି । ଯାହାକୁ କି ଅବଶିଷ୍ଟ ଧର୍ମ, ଜାତି ବା ପ୍ରକଳ୍ପ ଉପରେ ଜବରଦସ୍ତ ଲଦି ଦେବାକୁ ଚେଷ୍ଟା କରାଯାଉଛି । ଶିକ୍ଷାନୀତିରେ ଛାତ୍ର, ଶିକ୍ଷକ, ସେମାନଙ୍କ ଭୌଗୋଳିକ ପୃଷ୍ଠଭୂମି କଥାକୁ ଚିନ୍ତା କରାଯିବା ଉଚିତ । କେଉଁ ପ୍ରକାର ପାଠ, ଛାତ୍ରର, ଦେଶର ଭବିଷ୍ୟତ ନିର୍ମାଣରେ ଉପଯୋଗୀ ହୋଇପାରିବ, ସେ ଅଂଶକୁ ବାଦ୍ ଦିଆଯାଇଛି, ଯାହାକି ଶିକ୍ଷାନୀତିର ପରିପନ୍ଥୀ ବୋଲି ପ୍ରଫେସର ନାୟକ ବ୍ୟକ୍ତ କରିଥିଲେ ।
ରବି ରାୟ ସ୍ମୃତି କମିଟିର ସଭାପତି ତଥା ପରିବେଶବିତ୍ ପ୍ରଫୁଲ୍ଲ ସାମନ୍ତରାଙ୍କ ଅଧ୍ୟକ୍ଷତାରେ ଆୟୋଜିତ କାର୍ଯ୍ୟକ୍ରମକୁ ବରିଷ୍ଠ ସାମ୍ବାଦିକ ତଥା ସମଦୃଷ୍ଟିର ସମ୍ପାଦକ ବିଘ୍ନେଶ୍ୱର ସାହୁ ସଂଯୋଜନା କରି ପ୍ରଥମେ ରବି ରାୟଙ୍କ ଜୀବନୀ ସମ୍ପର୍କରେ ଆଲୋକପାତ କରିଥିଲେ ।
ଅନ୍ୟମାନଙ୍କ ମଧ୍ୟରେ ସମଦୃଷ୍ଟି ଗଣମାଧ୍ୟମ ପ୍ରତିଷ୍ଠାନର ଅଧ୍ୟକ୍ଷ ତଥା ବିଶିଷ୍ଟ ସ୍ତମ୍ଭକାର ସୁଧୀର ପଟ୍ଟନାୟକ ଅନ୍ୟତମ ଅତିଥି ଭାବେ ଯୋଗ ଦେଇ ଆଜିର ଶିକ୍ଷା ବ୍ୟବସ୍ଥାର ଭୟାବହତା ସମ୍ପର୍କରେ ଆଲୋକପାତ କରି ଏବେଠୁ ସତର୍କ ହେବା ଆବଶ୍ୟକ ବୋଲି ମତପୋଷଣ କରିଥିଲେ ।
ଛତ୍ରପୁରର ପୂର୍ବତନ ବିଧାୟକ ଏନ୍. ନାରାୟଣ ରେଡି ରବି ରାୟଙ୍କ ଗଞ୍ଜାମ ସହ ସମ୍ପର୍କ ଏବଂ ଟାଟାବିରୋଧୀ ଆନେ୍ଦାଳନ ପ୍ରତି ତାଙ୍କର ସମର୍ଥନ କଥା ସ୍ମୃତିଚାରଣ କରିଥିଲେ ।
ଲୋହିଆ ଏକେଡେମୀ ଟ୍ରଷ୍ଟର ସମ୍ପାଦକ ଦେବପ୍ରସାଦ ରାୟ ରବିରାୟ ସ୍ମାରକୀ ବକ୍ତୃତାମାଳା ସଂକଳନ ସମ୍ପର୍କରେ ବ୍ୟକ୍ତ କରିଥିବାବେଳେ ସାପ୍ତାହିକୀ ନବୀନର ସମ୍ପାଦକ ରବି ରଥ ସ୍ୱାଗତ ଭାଷଣ ପ୍ରଦାନ କରିଥିଲେ । ଏହି ଅବସରରେ ନବୀନର ରବିରାୟ ସ୍ୱତନ୍ତ୍ର ସଂଖ୍ୟାର ଲୋକର୍ପଣ କରାଯାଇଥିଲା । ଅନ୍ୟମାନଙ୍କ ମଧ୍ୟରେ ଆପ୍ ଦଳର କାର୍ଯ୍ୟକର୍ତା ଆଦିତ୍ୟ ରଥ ପ୍ରମୁଖ ବକ୍ତବ୍ୟ ରଖିଥିବା ବେଳେ ପ୍ରାବନ୍ଧିକା ଡ଼ ବିଧୁପ୍ରଭା ରଥ ଧନ୍ୟବାଦ ଅର୍ପଣ କରିଥିଲେ ।
