ବିଦ୍ୟାଳୟ ଯାଉ ନାହାଁନ୍ତି ବାବୁସାହିର ପିଲା ; ଗ୍ରାମବାସୀଙ୍କ ଅଭିଯୋଗ
ରାଇରଙ୍ଗପୁର – ତା.୦୫/୧୦ ; ମୟୁରଭଞ୍ଜ ଜିଲ୍ଲାର ଉଦଳା ବ୍ଲକ ଅଧିନସ୍ଥ ଖଲାଡ଼ି ପଂଚାୟତ ଅନ୍ତର୍ଗତ ବାବୁସାହି ଗ୍ରାମର କୌଣସି ପିଲା ଆଦୌ ବିଦ୍ୟାଳୟ ଯାଉନଥିବାର କଥା ଗ୍ରାମବାସୀ ମାନେ ଜଣାଇଛନ୍ତି । ଏହି ଗ୍ରାମର ୧୨ଜଣ ପିଲା କୋଚିଳାଡ଼ିହା ପଂଚାୟତରେ ଥିବା କଳାପାହାଡ଼ ପ୍ରାଥମିକ ବିଦ୍ୟାଳୟରେ ନାମ ଲେଖାଇଛନ୍ତି । କିନ୍ତୁ ନଦୀ ପାରି ହୋଇ ନିୟମିତ ବିଦ୍ୟାଳୟକୁ ଯିବା ପିଲାଙ୍କ ପକ୍ଷେ ସମ୍ଭବ ହେଉନଥିବାରୁ ପିଲାମାନେ ଯାଉନଥିବାର କଥା ଗ୍ରାମବାସୀ କହିଛନ୍ତି । ପିଲାଏ ବିଦ୍ୟାଳୟକୁ ଆସନ୍ତୁ ବା ନଆସନ୍ତୁ ସରକାରୀ ଫାଇଲ ଚାଷରେ ନିୟମିତ ବିଦ୍ୟାଳୟ କୁ ସମସ୍ତ ପିଲା ଆସୁଛନ୍ତି, ମଧ୍ୟାହ୍ନ ଭୋଜନ ଖାଉଛନ୍ତି ଇତ୍ୟାଦି ଦର୍ଶାଯାଉଥିବାର କଥା ସାଧାରଣରେ ଚର୍ଚ୍ଚା ହେଉଛି । ଏହା ଏକ ନିତି ଦିନିଆ ଘଟଣା ବୋଲି କେତେକ କହିଛନ୍ତି । ତେବେ ଏହି ପିଲାମାନଙ୍କ କ୍ଷେତ୍ରରେ ବାସ୍ତବ ଚିତ୍ର କଣ ତାହା ତଦନ୍ତ ପରେ ଜଣାପଡ଼ିବ ବୋଲି କୁହାଯାଉଛି । ଗ୍ରାମପାଖରେ ଆଉ କୌଣସି ବିଦ୍ୟାଳୟ ନଥିବାରୁ କଳାପାହାଡ଼ ପ୍ରାଥମିକ ବିଦ୍ୟାଳୟରେ ନାମ ଲେଖାଇବାକୁ ବାଧ୍ୟ ହେଉଥିବାର କଥା ଜଣାଇଛନ୍ତି । ଚଳିତ ଅକ୍ଟୋବର ୩ ତାରିଖ ଶନିବାର ଦିନ ଜନଜାଗୃତି ମଂଚର ନେତୃତ୍ୱରେ ଉର୍ମି ଲିଡ଼ର ସସ୍ମିତା ମଢ଼େଇ ଏହି ଗ୍ରାମରେ ଶିକ୍ଷା ଚୌପାଲ କାର୍ଯ୍ୟକ୍ରମ ଆୟୋଜନ କରିଥିଲେ । ଏହି କାର୍ଯ୍ୟକ୍ରମରେ ଉପସ୍ତିତ ଥିବା ଗ୍ରାମବାସୀମାନେ ଏପରି ଏକ ଅଭିଯୋଗ କରିଥିବାର ଜଣାଯାଇଛି । ବିଭାଗୀୟ କର୍ତୃପକ୍ଷ ଏଥିପ୍ରତି ତୁରନ୍ତ ଦୃଷ୍ଟି ଦେବାକୁ ମଂଚରେ କାର୍ଯ୍ୟରତ ଉର୍ମି ଲିଡ଼ର ମୋନାଲି ମୁର୍ମୁ, ଅବନ୍ତି ବେହେରା, ମଂଜୁଲତା ବିନ୍ଧାଣୀ, ମମତା ଟୁଡ଼ୁ ଓ ସାଉଁରି ମୁର୍ମୁ ପ୍ରମୁଖ ଅନୁରୋଧ ଜଣାଇଛନ୍ତି ।
ଖାଦ୍ୟ ସୁରକ୍ଷାରୁ ବାଦ ପଡ଼ିଛନ୍ତି ଗରିବ ପରିବାରର ଛାତ୍ର ଛାତ୍ରୀ
ବାରିପଦା /ଉଦଳା -ତା.୦୫/୧୦ ; ବିଭିନ୍ନ ବିଦ୍ୟାଳୟ ଓ ମହାବିଦ୍ୟାଳୟ ମାନଙ୍କରେ ଅଧ୍ୟୟନରତ ବହୁ ଗରିବ ପରିବାରର ଛାତ୍ର ଛାତ୍ରୀ ଖାଦ୍ୟ ସୁରକ୍ଷା ଯୋଜନାରୁ ବାଦ ପଡ଼ିଥିବାର ଖବର ହସ୍ତଗତ ହୋଇଛି । ମୟୁରଭଞ୍ଜ ଜିଲ୍ଲା,ଉଦଳା ବ୍ଲକ, ଖଲାଡ଼ି ପଂଚାୟତ ଅନ୍ତର୍ଗତ ନରହରିପୁର ଗ୍ରାମର ବାସିନ୍ଦା ସ୍ୱର୍ଗତଃ ହେମେନ୍ଦ୍ର ଟୁଡ଼ୁଙ୍କର ୧୬ ବର୍ଷ ବୟସର ପୁତ୍ର ସୁରେଶ ଟୁଡ଼ୁ ବର୍ତମାନ ରାଢ଼ୋଗ୍ରାମସ୍ଥିତ ଲୁଇପା କନିଷ୍ଠ ମହାବିଦ୍ୟାଳୟର +୨ ପ୍ରଥମବର୍ଷ କଳାର ଛାତ୍ର ଅଟନ୍ତି । ଖାଦ୍ୟ ସୁରକ୍ଷା ଯୋଜନାରୁ ସୁରେଶ ବାଦ ପଡ଼ିଥିବା ଯୋଗୁଁ ସରକାର ଯୋଗାଇ ଦେଉଥିବା ମୁଣ୍ଡପିଛା ୫ କିଗ୍ରା ଚାଉଳ ପାଇପାରୁନଥିବାର ଜଣାଇଛନ୍ତି । ପିଲାଟି ଦିନରୁ ସୁରେଶଙ୍କର ପିତା ଓ ମାତା ଉଭୟଙ୍କର ଦେହାନ୍ତ ହୋଇଯାଇଥିବାରୁ ସେ ସମ୍ପୁର୍ଣ୍ଣ ଅନାଥ ଅଟନ୍ତି । ସେହିପରି ଏହି ପଂଚାୟତର ବେଗୁନିଆଡ଼ିହା ଗ୍ରାମର ବାସିନ୍ଦା ହାଡ଼ିବନ୍ଦୁ ହାଁସଦାଙ୍କର ୨୧ବର୍ଷ ବୟସର କନ୍ୟା ସୁଚିତ୍ରା, ୧୮ବର୍ଷ ବୟସର ପୁତ୍ର ଜୟନ୍ତ ଓ ୧୩ ବର୍ଷ ବୟସର କନ୍ୟା ସୁଜାତା ବିଭିନ୍ନ ବିଦ୍ୟାଳୟ ଓ ମହାବିଦ୍ୟାଳୟରେ ପାଠପଢ଼ୁଛନ୍ତି । କିନ୍ତୁ ପରିବାରକୁ ମିଳିଥିବା ରାସନ କାର୍ଡ଼ରେ ନାମ ଯୋଡ଼ାଯାଇନଥିବାରୁ ସରକାର ଯୋଗାଇ ଦେଉଥିବା ମୁଣ୍ଡପିଛା ୫ କିଗ୍ରା ଚାଉଳ ପାଇବାରୁ ସେମାନେ ବଂଚିତ ଥିବାର ଜଣାଇଛନ୍ତି । ଏ ବାବଦରେ ପଂଚାୟତ କାର୍ଯ୍ୟାଳୟ ଓ ବ୍ଲକ କାର୍ଯ୍ୟାଳୟରେ ବାରମ୍ବାର ଗୁହାରି ଜଣାଇଥିଲେ ମଧ୍ୟ କେହି ଶୁଣୁନଥିବାର ଅଭିଯୋଗ କରିଛନ୍ତି । ତାଛଡ଼ା ଆଦିବାସୀ ଭାଇ ଭଉଣୀ ମାନଙ୍କର ସବୁପ୍ରକାର ସୁଖ ଦୁଃଖ ବୁଝିବା ପାଇଁ ଏଠାରେ ସମନ୍ୱିତ ଆଦିବାସୀ ଉନ୍ନୟନ ପ୍ରକଳ୍ପ କାର୍ଯ୍ୟ କରୁଛି । ଯାହାର କାର୍ଯ୍ୟାଳୟ ଉଦଳାଠାରେ ରହିଛି । ଏହିସବୁ ଆଦିବାସୀ ଛାତ୍ର ଛାତ୍ରୀ ମାନଙ୍କର ଦୁଃଖ ବୁଝିବା ପାଇଁ ଉକ୍ତ ପ୍ରକଳ୍ପ ତତ୍ପରତା ପ୍ରକାଶ ନକରି କାହିଁକି ଚୁପମାରି ବସିଛି ବୋଲି ଅନେକ ପ୍ରଶ୍ନ ଉଠାଇଛନ୍ତି । ରାଜ୍ୟ ସରକାର ଏଥିପ୍ରତି ତୁରନ୍ତ ଦୃଷ୍ଟି ଦେବାକୁ ସ୍ୱେଛାସେବି ମାନେ ଅନୁରୋଧ ଜଣାଇଛନ୍ତି ।
ରାଇରଙ୍ଗପୁର ରୁ ଅକ୍ଷୟ ବିଶ୍ୱାଳ
