ଲିଜ ଏବଂ ଲାଇସେନ୍ସ ଧାରୀଙ୍କ ବାସଗୃହର ସମ୍ପ୍ରସାରଣ ମାମଲା
ସମସ୍ତ ସମ୍ପ୍ରସାରଣକୁ ବୈଧ କରିବା ପାଇଁ ସିଜିଏମଙ୍କୁ ବିଧାୟକ ଶ୍ରୀ ତନ୍ତୀ ଙ୍କ ଚିଠି
ରାଉରକେଲା : ରାଉରକେଲା ଇସ୍ପାତ କାରଖାନା ଅଧୀନରେ ଥିବା କେତେକ ବାସଗୃହକୁ ରାଉରକେଲା ଇସ୍ପାତ କାରଖାନା ସହରସେବା ବିଭାଗ ଦ୍ଵାରା ନିର୍ଧାରିତ ଲକ୍ଷାଧିକ ଟଙ୍କା ଜମା କରି ସେବାନିବୃତ କର୍ମଚାରୀ ଏବଂ କେତେକ ବ୍ୟବସାୟୀ ମାନେ ଲିଜ ଆକାରରେ ୧୧ମାସିଆ/୩୩ମାସିଆ ଲାଇସେନ୍ସ ଆକାରରେ ନେଇଛନ୍ତି । ଲିଜ/ଲାଇସେନ୍ସରେ ନେଇଥିବା ଘର ଗୁଡିକ ମନୁଷ୍ୟ ରହିବା ଉପଯୋଗୀ ନଥିଵା ବେଳେ କେତେକ ଘର ଗୁଡିକ ଲିଜ/ଲାଇସେନ୍ସ ଧାରୀ ପରିବାର ସଦସ୍ୟ ମାନଙ୍କ ରହିବା ପାଇଁ ଯଥେଷ୍ଟ ନଥିବା କାରଣରୁ ନିଜ ପରିବାରର ଆବଶ୍ୟକତା ଅନୁସାରେ ଲିଜ/ଲାଇସେନ୍ସ ଧାରୀ ବ୍ୟକ୍ତି ଉକ୍ତ ଘରେ କିଛିଟା ସମ୍ପ୍ରସାରଣ କରିଥିଲେ । ତେବେ ଇତିମଧ୍ୟରେ ଉକ୍ତ ସମ୍ପ୍ରସାରଣ ଗୁଡିକୁ ଅବୈଧ ଘୋଷଣା କରି ଭାଙ୍ଗିବା ପାଇଁ ଆର ଏସ ପିର ସହରସେବା ବିଭାଗ ପକ୍ଷରୁ ପ୍ରାୟତଃ ସମସ୍ତ ଲିଜ/ଲାଇସେନ୍ସ ଧାରୀଙ୍କୁ ନୋଟିସ ଦିଆଯାଇଛି । ନୋଟିସ ପାଇବା ପରେ ଅନେକ ଲିଜ/ଲାଇସେନ୍ସ ଧାରୀ ବ୍ୟକ୍ତି ମାନେ ଆସି ଏ ସମ୍ବନ୍ଧରେ ରଘୁନାଥପାଲ୍ଲୀ ବିଧାୟକ ଦୁର୍ଗା ଚରଣ ତନ୍ତୀଙ୍କ ଦୃଷ୍ଟି ଆକର୍ଷଣ କରିଥିଲେ । ଲିଜଧାରୀ/ଲାଇସେନ୍ସ ଧାରୀଙ୍କ ସମସ୍ୟାର ସମାଧାନ ପାଇଁ ବିଧାୟକ ଶ୍ରୀ ତନ୍ତୀ ସହରସେବା ପ୍ରଶାସନ ବିଭାଗର ମୁଖ୍ୟ ଟି ଜି କାନେତକର ଏବଂ ପି କେ ସାହୁଙ୍କ ସହିତ ଏକ ମିଟିଙ୍ଗ କରି ବିସ୍ତୃତ ଭାବରେ ଆଲୋଚନା କରିଥିଲେ । ଆଲୋଚନା ସମୟରେ ଵିଧାୟକ ଶ୍ରୀ ତନ୍ତୀ ଗତ ୫୦/୬୦ ବର୍ଷ ତଳେ ସେତେବେଳର ଆବଶ୍ୟକତା କୁ ଦେଖି ନିର୍ମାଣ ହୋଇଥିବା ଘର ଗୁଡିକ ବାସ୍ତବରେ ବର୍ତ୍ତମାନ ଲୋକଙ୍କ ଆବଶ୍ୟକତା ଅନୁସାରେ ପର୍ଯ୍ୟାପ୍ତ ନୁହେଁ । ତେଣୁ ସମସ୍ତେ ନିଜ ନିଜର ପରିବାର ସଦସ୍ୟଙ୍କ ରହିବା ପାଇଁ ସମ୍ପ୍ରସାରଣ କରିବା ସ୍ବାଭାବିକ । ସେଥିପାଇଁ ପୂର୍ବରୁ ହୋଇଥିବା ସମସ୍ତ ସମ୍ପ୍ରସାରଣ କୁ ବୈଧ ବୋଲି ଧରିନେବା ସହିତ ବର୍ତ୍ତମାନ ଯେଉଁମାନେ ଲିଜ/ଲାଇସେନ୍ସ ଆକାରରେ ନେଉଛନ୍ତି ସେମାନଙ୍କୁ ନିଜ ନିଜ ବାସଗୃହରେ ଆବଶ୍ୟକ ସମ୍ପ୍ରସାରଣ ପାଇଁ ଅନୁମତି ଦେବାପାଇଁ ପରାମର୍ଶ ଦେବା ସହିତ ଏ ସମ୍ବନ୍ଧରେ ଏକ ପତ୍ର ଶ୍ରୀ କାନେତକରଙ୍କୁ ପ୍ରଦାନ କରିଛନ୍ତି ।
କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
