ସକାଳ ଜଣାଣ
ସୂର୍ଯ୍ୟ ଆଗମନେ କୋଇଲିର ତାନେ
ସକାଳ ଆସଇ ମାଡ଼ି,
ନିଦ ଭାଙ୍ଗୁନି କି ମଣିମା ତୁମର
ସିଂହାସନେ ଅଛ ପଡ଼ି।
ଭକତଙ୍କ ଡାକ ଶୁଭୁନି ତୁମଙ୍କୁ
ବଧିର ହୋଇଲ ଆଜି,
କିପରି ଛୁଇଁବି ତୁମ ଶ୍ରୀମନ୍ଦିର
ତୁମ ଭକ୍ତଟିଏ ସାଜି।
ଦୁଃଖତ ଲେଖିଲ ମଣିଷଟେ କଲ
ଦେଖେଇଲ ଆଲୋକକୁ,
ତୁମ ବିନା ପ୍ରଭୁ କେମିତି ଜିତିବି
ମିଛ ମାୟା ଦୁନିଆକୁ।
ଶଙ୍ଖଚକ୍ର ଧାରି ହେ ବିଶ୍ଵବିହାରୀ
ମୋ ପାଇଁ ହେଲ ପଥର,
କାହାକୁ କହିବି ଏ କଷ୍ଟ କାହାଣୀ
ତୁମେତ କରିଲ ପର।
ସବୁ କିଛି ଜାଣି ନୀରବ ସାଜିଛ
କେମିତିକା ଦିଅଁ ତୁମେ,
ଏତେ ଲୁହ ଦେଇ ମନ ବୁଝୁ ନାହିଁ
ଏତିକି ନିଷ୍ଠୁର ତୁମେ।
ଆହେ ଦୟାମୟ କରୁଣା ସାଗର
ଡାକେ ତୁମ ପାଦେ ପଡ଼ି,
କୃପା ଦୃଷ୍ଟି ଟିକେ ଦିଅ ମୋ ଉପରେ
ଏ ଜୀବନ ଯାଉ ଛାଡ଼ି।
ଶୁଭଶ୍ରୀ ପ୍ରଧାନ
କୋଣାର୍କ , ପୁରୀ
