ଅର୍ଥନୈତିକ ସ୍ଵାଧୀନତା ପାଇଁ ଯୁଦ୍ଧ
ଅଗଷ୍ଟ ୯ ରେ ପାଳିଲେ ଆମେ ସବୁ, କ୍ରାନ୍ତି ଦିବସ
ଓ ବିଶ୍ୱ ଆଦିବାସୀ ଦିବସ
ଭାବିଲେକି ସେଇ ମାନଂକର ଅବଦାନ କଥା ଯାହା
ପାଇଁ ହୋଇଛି ସଭ୍ୟତାର ବିକାଶ |୧|
ସବୁଠୁ ସର୍ବାଧିକ ମୂଲ୍ୟ ଦେବାକୁ ପଡିଛି ଆଦିବାସୀଙ୍କୁ
ବିକାଶ ଧାରାର ପ୍ରକ୍ରିୟାରେ
ତିଆରି ହୋଇଛି ନଦୀ ବନ୍ଧ, ବିଦ୍ୟୁତ, ଶିଳ୍ପ, ଖଣି ଖାଦାନ,
ଅଭୟାରଣ୍ୟ ସବୁକିଛି ସେମାନଙ୍କ ଅଂଚଳରେ |୨|
ସେମାନେ ନିଜର ସର୍ବସ୍ବ ହରେଇ ହୋଇଛନ୍ତି ଵାସ୍ତୁହରା
ସେଇ ବିକାଶ ଧାରାର ପ୍ରକ୍ରିୟାରେ
ରହିନିକି ସେମାନଙ୍କ ଅଂଚଳ ଗୁଡିକ ସବୁଠୁ ପଛୁଆ ଅଂଚଳ
ଓ ତଳ ସ୍ଥାନେ ଦାରିଦ୍ର୍ୟର ସୁଚକାଙ୍କରେ |୩|
ହତାଶାର କଳା ବାଦଲ ଛାଇ ହୋଇ ରହିଛି, ସମୟର
ଘୁରି ବୁଲିବା ଅତଳ ଗହୀରି ଭିତରେ
ଚିତ୍ରଣ କରୁନକି କୁହ ସେହି ଅଂଚଳ ଗୁଡିକୁ ଦୁର୍ଗମ, ରୋଗ
ପ୍ରବଣ, ମାଓ ପ୍ରବଣ, ଅନ୍ଧାରି ଇଲାକା ଆଦି ନାମରେ |୪|
ସେମାନଙ୍କ ପ୍ରାପ୍ୟ ଦେବାରେ ପୁଂଜିପତିର ସରକାର
କେତେଦିନ ଯତ୍ନ ନନେଇ ସମ୍ବେଦନହୀନ ରହିବ
ଇତିହାସ ଶିଖାଏ ହତାଶାର ଭାବନା ଅଗ୍ନିର ସ୍ପର୍ଶରେ
ଲେଲିହମାନ ହୋଇ ଉର୍ଦ୍ଧ୍ଵକୁ ଦିନେ ଉଠିବ |୫|
ସେମାନଙ୍କ ଅଖଣ୍ଡ ନୀରବତା ଭିତରୁ ଦିନେ ନା ଦିନେ
ନିଶ୍ଚିତ ସୃଜନୀର ବୀଣା ବାଦନ ଶୁଭିବ
ପାଉଁଶ ଭିତରେ ଲୁଚି ରହିଥିବା ସୃଜନୀ, ଅର୍ଥନୈତିକ
ସ୍ଵାଧୀନତା ପାଇଁ ଅନ୍ତିମ ଯୁଦ୍ଧର ଡ଼ାକରା ଆସିବ |୬|
ଚିତ୍ତ ରଞ୍ଜନ ନନ୍ଦ
ଜଗତପୁର, କଟକ
