ପାର୍ବଣେ ନବଦୁର୍ଗା
ଶୁଭ୍ରାଂଶୁ ଶେଖର ପାଢୀ
ଆସୁଛ କି ମାଆ ଏ ଧରା ଧାମକୁ
କାଶତଣ୍ଡି ଫୁଲେ ଫୁଲେ ।
ଉତ୍ସବ ମୁଖର ହେଉଅଛି ପରା
ଆଜି ଏ ମହୀ ମଣ୍ଡଳେ ।
ପଲ୍ଲୀଠାରୁ ଦିଲ୍ଲୀ ଖୁସିରେ ନାଚୁଛି
ମାଆ ଆସୁଛନ୍ତି ବୋଲି ।
ପାର୍ବଣର ସାଜ ସଜ୍ଜା ଲାଗି ଅଛି
ଜଗତ ପଡ଼େ ଉଛୁଳି ।
ଦୁର୍ଗତି ନଶିନୀ ଦୁଃଖ ବିନାଶିନୀ
ମାଆ ମହିଷା ମର୍ଦ୍ଦିନୀ ।
ସଙ୍କଟ ହାରିଣୀ ମଙ୍ଗଳ କାରିଣୀ
ତୁମେ ଶକ୍ତି ସ୍ୱରୁପିଣି ।
ହେ ଶାନ୍ତି ଦାୟିନୀ ଆସ ଅବତରୀ
ଜଗତକୁ ହୁଅ ସାହା ।
ଅଧର୍ମ ଅନିତୀ କରିବାକୁ ନାଶ
ଆସ ମାଆ ଯୋଗମାୟା ।
ଧରି ତରବାରୀ ରକ୍ତ ମୁଖା ସାଜେ
ଆଜି ଜଗତ ତୁମରି ।
ଆଗୋ ମହା ଦେବୀ! ଏ ମହା ପାର୍ବଣେ
ଆସ ବାରେ ଅବତରୀ ।
ଦେବତା ମାନଙ୍କ ଦୁର୍ଗତି କାଳରେ
ହୋଇଥିଲ ଆବିର୍ଭୁତା ।
ନଅଟି ରୂପରେ ପୂଜିତା ଯେ ତୁମେ
ନବରାତ୍ରେ ନବ ଦୁର୍ଗା ।
ତୁମେ ଶୈଳପୁତ୍ରୀ ହେ ବ୍ରହ୍ମଚାରିଣୀ
ତୁମେ ମାତା ଚିତ୍ରଘଣ୍ଟା ।
ତୁମେ ସ୍କନ୍ଧମାତା ମାଆ କାର୍ତ୍ୟାୟିନୀ
ହେ ମହା ଦେବୀ କୁଷ୍ମାଣ୍ଡା ।
କାଳରାତ୍ରୀ ତୁମେ ମହାଗୌରୀ ତୁମେ
ତୁମେ ମାଆ ସିଦ୍ଧିଦାତ୍ରୀ ।
ପାର୍ବଣ ଋତୁରେ ତୁମ ପୂଜା ବିଧି
ପାଳିତ ଯେ ନବରାତ୍ରୀ ।
ବୀରମହାରାଜପୁର, ସୁବର୍ଣ୍ଣପୁର
