ଜିଲ୍ଲାପାଳଙ୍କୁ ଦାବିପତ୍ର ଦେଲେ ଅଞ୍ଚଳବାସୀ
ଲାଞ୍ଜିଗଡ଼,୨୧/୧୧(ମନିସ)-ସ୍ବାଧୀନତାର ଦୀର୍ଘ ବର୍ଷ ପରେ ବି ସବୁଦିନିଆ ପକ୍କା ରାସ୍ତା ଖଣ୍ଡେ ନଥିବାରୁ ସମସ୍ୟାର ସମ୍ମୁଖୀନ ହେଉଛନ୍ତି କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକ ଛତ୍ରପୁର ଗ୍ରା.ପ. ପତ୍ରାପଡ଼ା ତଥା ଚମ୍ପାଦେଇପୁର ପଞ୍ଚାୟତର ବିଲାଟିପଦର ଗ୍ରାମବାସୀ ! ଏନେଇ ବାରମ୍ବାର ଦାବି ଓ ଅଭିଯୋଗ ସତ୍ତ୍ବେ କୌଣସି ସୁଫଳ ନମିଳିବାରୁ ହତାଶ ଗ୍ରାମବାସୀ କଳାହାଣ୍ଡି ଜିଲ୍ଲାପାଳଙ୍କ ନିକଟରେ ରାସ୍ତା ଖଣ୍ଡିକ ପାଇଁ ଦାବି କରିଛନ୍ତି ! ସୂଚନାଯୋଗ୍ୟ, ଲାଞ୍ଜିଗଡ଼ ବ୍ଲକ ଛତ୍ରପୁର ଗ୍ରାମପଞ୍ଚାୟତର ପତ୍ରାପଡ଼ାରେ ୨୦୦ ପରିବାର ଥିବାବେଳେ ୭୦୦ରୁ ଉର୍ଦ୍ଧ୍ବ ଜନସଂଖ୍ୟା ବସବାସ କରନ୍ତି ! କିନ୍ତୁ ଅତ୍ୟନ୍ତ ଦୁଃଖ ଓ କ୍ଷୋଭର ବିଷୟ ହେଲା, ଆମ ପତ୍ରାପଡ଼ାକୁ ଆଜି ପର୍ଯ୍ୟନ୍ତ ସବୁଦିନିଆ ରାସ୍ତା ଖଣ୍ଡେ ନାହିଁ ! ଯାହାଫଳରେ ଲୋକେ ନାହିଁ ନଥିବା ସମସ୍ୟାର ସମ୍ମୁଖୀନ ହେଉଥିବାବେଳେ ବର୍ଷାଋତୁରେ ଏଇ ସମସ୍ୟା ଦ୍ବିଗୁଣିତ ହୋଇଯାଏ ! ମାଟିକାଦୁଅ ରାସ୍ତାରେ ରୋଗୀ, ଗର୍ଭବତୀ ମହିଳାଙ୍କ ସମେତ ଛାତ୍ରଛାତ୍ରୀମାନେ ଅନେକ ସମସ୍ୟାର ସମ୍ମୁଖୀନ ହୁଅନ୍ତି ! ନଙ୍ଗଳବେଡ଼ା ପିଡବ୍ଲ୍ୟୁଡି ରାସ୍ତାରୁ ପତ୍ରାପଡ଼ା ସମେତ ଚମ୍ପାଦେଇପୁର ପଞ୍ଚାୟତର ବିଲାଟୀପଦର ଗାଁକୁ ମଧ୍ୟ ସବୁଦିନିଆ ରାସ୍ତା ସଂଯୋଗ ନାହିଁ ! ଏହାକୁ ନେଇ ଲୋକେ ବାରମ୍ବାର ଦାବି କରୁଥିଲେ ହେଁ କୌଣସି ସୁଫଳ ମିଳୁନାହିଁ ! ଫଳରେ ଅନ୍ୟ ଉପାୟ ନପାଇ ପତ୍ରାପଡ଼ା ଅଞ୍ଚଳବାସୀ ଜିଲ୍ଲାପାଳଙ୍କୁ ଫେରାଦ ହେବାକୁ ଯାଇଥିବାବେଳେ ଜିଲ୍ଲାପାଳଙ୍କ ଅନୁପସ୍ଥିତିରେ ଅତିରିକ୍ତ ଜିଲ୍ଲାପାଳ ଶରତ ଚନ୍ଦ୍ର ଶ୍ରୀଚନ୍ଦନଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି ! ସେହିପରି ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ତଥା କାର୍ଯ୍ୟ ନିର୍ବାହୀ ଅଧିକାରୀଙ୍କୁ ମଧ୍ୟ ଦାବିପତ୍ର ପ୍ରଦାନ କରିଛନ୍ତି ! ଏହାସହିତ ନଙ୍ଗଳବେଡ଼ା ପିଡବ୍ଲ୍ୟୁଡି ରାସ୍ତାଠାରୁ ପତ୍ରାପଡ଼ା ଭାୟା ବିଲାଟୀପଦରକୁ ପ୍ରଧାନମନ୍ତ୍ରୀ କିମ୍ବା ମୁଖ୍ୟମନ୍ତ୍ରୀ ସଡ଼କ ଯୋଜନାରେ ସାମିଲ କରିବା ସହିତ ରାସ୍ତା ନିର୍ମାଣ ପାଇଁ ପଦକ୍ଷେପ ନେବାକୁ ଦାବି ଜଣାଇଛନ୍ତି ! ଅଞ୍ଚଳବାସୀଙ୍କ ତରଫରୁ ମହେନ୍ଦ୍ର କରୁଆଁ, ସୁବାସ ହିଆଁଲ, ବଲଷ୍ଟି ବିଭାର, ରଘୁସାଏ କରୁଆଁ, ମହାନ୍ତି କରୁଆଁ, ସୁଶୀଲ କୁମାର ବାଗ ପ୍ରମୁଖଙ୍କୁ ନେଇ ଏକ ପ୍ରତିନିଧି ଦଳ ଆଜି ଅତିରିକ୍ତ ଜିଲ୍ଲାପାଳ ଓ ଜିଲ୍ଲା ପରିଷଦ ମୁଖ୍ୟ କାର୍ଯ୍ୟ ନିର୍ବାହୀଙ୍କୁ ଦାବିପତ୍ର ପ୍ରଦାନ କରିଥିବା ଜଣାପଡ଼ିଛି !
ଲାଞ୍ଜିଗଡ଼ ରୁ ସୁଶୀଲ କୁମାର ବାଗ ଙ୍କ ରିପୋର୍ଟ
